ខូណាគ្រី៖ ការសម្រេចចិត្តរបស់អាជ្ញាកណ្ដាលដ៏ចម្រូងចម្រាសបានបង្កឱ្យមានអំពើហិង្សា និងការប៉ះទង្គិចដ៏សាហាវនៅឯព្រឹត្តិការណ៍ប្រកួតបាល់ទាត់មួយនៅភាគអាគ្នេយ៍នៃប្រទេសហ្គីណេ ដោយបានបណ្តាលឱ្យមនុស្ស ៥៦នាក់ស្លាប់។
ករណីមានមនុស្សស្លាប់ដ៏ច្រើននេះបានកើតឡើងក្នុងកំលុងពេលការប្រកួតវគ្គផ្តាច់ព្រាត់ដណ្តើមពានរង្វាន់កិត្តិយសមេដឹកនាំរបបយោធារបស់ប្រទេសហ្គីណេលោក ម៉ាម៉ាឌី ឌូប៊ូយ៉ា(Mamady Doumbouya) នៅឯកីឡដ្ឋានមួយក្នុងទីក្រុង Nzerekore ដែលជាទីក្រុងធំបំផុតមួយរបស់ប្រទេសអាហ្វ្រិកខាងលិចមួយនេះ។ សេចក្តីថ្លែងការណ៍របស់រដ្ឋាភិបាលបានបង្ហាញថា អ្នកគាំទ្របានគប់ដុំថ្ម បង្កឱ្យមានភាពចលាចល បង្កអោយមានការភ័យស្លន់ស្លោ និងការប៉ះទង្គិចគ្នាដ៏សាហាវ ខណៈរដ្ឋាភិបាលកំពុងបើកការស៊ើបអង្កេត។
សាក្សីអះអាងថា ការសម្រេចផ្តល់កាតក្រហមរបស់អាជ្ញាកណ្ដាលនៅនាទី ៨២ នៃការប្រកួតបានបង្កឱ្យផ្ទុះកំហឹង និងបង្កឱ្យមានអំពើហិង្សាកើតឡើង ដោយដុំថ្មហោះពេញមេឃ ខណៈប៉ូលិសបានបាញ់ឧស្ម័នបង្ហូរទឹកភ្នែកដើម្បីបញ្ឈប់អំពើហិង្សា។ ដោយឡែក ប៉ូលិសបង្ហាញថា ក្រុមមនុស្សបានប្រញាប់ប្រញាល់រត់ចេញពីកន្លែងប៉ះទង្គិចគ្នាដ៏គ្រោះថ្នាក់ ដោយមនុស្សរាប់សិបនាក់រត់ជាន់គ្នា និងខ្លះទៀតឡើងផ្លោះជញ្ជាំងដើម្បីគេចខ្លួន។
ជុំវិញបញ្ហានេះ ប្រធានាធិបតីដែលត្រូវបានធ្វើរដ្ឋប្រហារទម្លាក់ចេញពីតំណែងដោយរបបយោធាលោក អាល់ហ្វា ខុនដេ (Alpha Conde) បានអះអាងថា ព្រឹត្តិការណ៍នេះត្រូវបានរៀបចំស្របពេលប្រទេសកំពុងស្ថិតក្នុងភាពអាណាធិបតេយ្យ។ លោកបន្តថា ៖«ប្រទេសនេះកំពុងស្ថិតក្នុងបរិបទតានតឹង និងវឹកវររួចទៅហើយ។ គ្រោះថ្នាក់នេះគឺជាសោកនាដកម្មដែលគ្មានការទទួលខុសត្រូវ»៕
