រដ្ឋមន្រ្តីក្រសួងអប់រំ អញ្ជើញបើកសិក្ខាសាលាឆ្លុះបញ្ចាំងស្ដីពី ការអនុវត្តកម្មវិធីបំណិនជីវិត”ការដាក់ទុនលើជំនាញថ្មីដើម្បីអនាគត” នៅតាមសាលាមធ្យមសិក្សាចំណេះទូទៅ

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា នាថ្ងៃទី២៩ ខែវិច្ឆិកា ឆ្នាំ២០២៤ បានអញ្ជើញចូលរួមជាអធិបតី ក្នុងពិធីបើកសិក្ខាសាលាឆ្លុះបញ្ចាំងស្ដីពី ការអនុវត្តកម្មវិធីបំណិនជីវិត”ការដាក់ទុនលើជំនាញថ្មីដើម្បីអនាគត” នៅតាមសាលាមធ្យមសិក្សាចំណេះទូទៅ ដោយមានការចូលរួមពី ឯកឧត្តម លោកជំទាវ ថ្នាក់ដឹកនាំក្រសួង នាយកប្រតិបត្តិ អង្គការខេប និងមន្ត្រីពាក់ព័ន្ធក្រោមឱវាទ តំណាងនាយកដ្ឋានតម្រង់ទិសវិជ្ជាជីវៈនៃក្រសួងអប់រំ យុវជន និងកីឡា តំណាងក្រុមហ៊ុន Gap Inc គណៈគ្រប់គ្រងសាលា នាយក នាយិកា លោកគ្រូ អ្នកគ្រូមកពីរាជធានី-ខេត្ត។

សិក្ខាសាលានេះរៀបចំឡើងក្នុងគោលបំណង៖
១). បង្កើតទំនាក់ទំនងរវាងថ្នាក់ជាតិ និងថ្នាក់ក្រោមជាតិក្នុងគោលបំណងអភិវឌ្ឍវិស័យអប់រំឱ្យកាន់តែប្រសើរ
២).ស្វែងយល់កាន់តែប្រសើរអំពីគោលនយោបាយកម្មវិធីអប់រំបំណិនជីវិតតាមមូលដ្ឋាន
៣). ចែករំលែកបទពិសោធន៍នៃការអនុវត្តកម្មវិធីសិក្សាបំណិនជីវិតភែស (កម្មវិធី P.A.C.E ដែលមានន័យពេញលេញថាជាការដាក់ទុនលើជំនាញថ្មីដើម្បីអនាគត – Personal Advancement and Career Enhancement)
៤). ពង្រឹង និងពង្រីកការអនុវត្តកម្មវិធីបំណិនជីវិត ដើម្បីបណ្តុះបំណិនសតវត្សរ៍ទី២១ ដល់សិស្សានុសិស្ស និងគ្រូបង្រៀន។

មានប្រសាសន៍ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណយ៉ាងជ្រាលជ្រៅដល់ អង្គការខេប ក្រុមហ៊ុន Gap Inc និងនាយកដ្ឋានតម្រង់ទិសវិជ្ជាជីវៈនៃក្រសួងអប់រំ យុវជន និងកីឡា ដែលបានសហការគ្នាសម្រេចបាននូវសមិទ្ធផលជាច្រើននាពេលកន្លងមក ជាពិសេស សម្រាប់ការអនុវត្តកម្មវិធីបំណិនជីវិត “ការដាក់ទុនលើជំនាញថ្មីដើម្បីអនាគត(P.A.C.E)” នៅតាមសាលាមធ្យមសិក្សាចំណេះទូទៅនេះផ្ទាល់ និងបានវាយតម្លៃខ្ពស់ដល់ គណៈគ្រប់គ្រង នាយក នាយិកា លោកគ្រូ អ្នកគ្រូ ដែលបានសិក្សាស្វែងយល់ពីវិធីសាស្ត្របង្រៀនថ្មីៗ ប្រើប្រាស់ទាំងទ្រឹស្តី និងការអនុវត្តនៅក្នុងការបង្រៀន ចូលរួមចំណែកក្នុងការអភិវឌ្ឍគុណភាពអប់រំក្នុងប្រទេសកម្ពុជា ដោយបានគូសបញ្ជាក់ថា សាលារៀនគោលដៅទាំងអស់នឹងត្រូវប្រើប្រាស់សៀវភៅបំណិនជីវិតដើម្បីបង្រៀននៅបឋមសិក្សាពីថ្នាក់ទី (៤-៦) និងមធ្យមសិក្សាពីថ្នាក់ទី(៧-៩)ហើយត្រូវមានកាលវិភាគច្បាស់លាស់ ដោយបង្រៀនសិស្សឱ្យមានសមត្ថភាពស្វែងយល់ពីបញ្ហា ចេះស្វែងរកនូវដំណោះស្រាយដែលកើតមានជាក់ស្តែងក្នុងសហគមន៍មូលដ្ឋាន និងក្នុងបរិបទពិភពលោក និងអាចឱ្យសិស្សរួមចំណែកក្នុងការបង្កើតឱកាសផ្សេងៗ ដើម្បីអភិវឌ្ឍខ្លួន គ្រួសារ និងសហគមន៍របស់ពួកគេផងដែរ។

ដើម្បីឱ្យការអនុវត្តកម្មវិធីការអប់រំបំណិនជីវិតតាមសាលារៀនដំណើរការបានដោយភាពរលូនល្អ និងមានប្រសិទ្ធភាព ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្តល់អនុសាសន៍ណែនាំដូចខាងក្រោម៖ (១) សូមអង្គភាពពាក់ព័ន្ធទាំងអស់ធ្វើការសហការគ្នាជាមួយដៃគូពាក់ព័ន្ធដូចជា អង្គការយូនីសេហ្វ និងអង្គការរូមធូរីដ លើការអនុវត្តកម្មវិធីបំណិនជីវីត ដើម្បីប្រមូលរួមបញ្ចូលឱ្យទៅជាកម្មវិធីតែមួយ រៀបចំជាឯកសាររួមសម្រាប់ក្រសួងអប់រំ ដាក់ឱ្យអនុវត្តជាផ្លូវការក្នុងកម្មវិធីសិក្សា ដើម្បីឱ្យមានភាពជាម្ចាស់លើគម្រោង និងធានាបាននូវនិរន្តរភាពក្រោយ បញ្ចប់គម្រោង។ (២) ត្រូវអនុវត្តវិធីសាស្រ្តបង្រៀនថ្មីៗ ព្រោះសៀវភៅបំណិនជីវិតតែមួយមុខ គឺមិនគ្រប់គ្រាន់នោះទេ លោកគ្រូ អ្នកគ្រូ ត្រូវសិក្សាស្វែងយល់ពីវិធីសាស្ត្របង្រៀនសម្រាប់សិស្សសតវត្សទី២១ ដោយត្រូវបង្រៀនសិស្សឱ្យសិក្សាស្វែងយល់ ស្រាវជ្រាវ សរសេរ និងចេះរៀនដោយខ្លួនឯង តាមរយៈការអនុវត្តផ្ទាល់ ការធ្វើពិសោធន៍ផ្សារភ្ជាប់នឹងទ្រឹស្តី ការបង្កើតចម្ងល់ ស្វែងរកព័ត៌មាន វិភាគ និងរកដំណោះស្រាយ និងផ្លាស់ប្តូរជាវិជ្ជមានពីរបៀបគិត របៀបរៀន របៀបធ្វើការ និងរបៀបរស់នៅ ប្រកបដោយសុខដុមរមនា និងបណ្តុះស្មារតីសិស្សឱ្យស្រឡាញ់ការរៀនសូត្រ ដើម្បីឱ្យពួកគាត់ក្លាយជាមូលធនមនុស្សសម្រាប់ចូលរួមក្នុងការអភិវឌ្ឍសេដ្ឋកិច្ចសង្គមជាតិ។
គួរបញ្ជាក់ដែរថា អង្គការខេបបានអនុវត្តកម្មវិធីអប់រំបំណិនជីវិតចាប់តាំងពីឆ្នាំ២០១៨ និងបានបណ្តុះបណ្តាលគ្រូបំណិនជីវិតចំនួន ៣១១នាក់ មកពីសាលាមធ្យមសិក្សាចំនួន ១០៨ និងមានសិស្ស ប្រមាណ ៤៣ ០០០នាក់ (ស្រី ២២ ០០០ នាក់) បាននិងកំពុងសិក្សាថ្នាក់បំណិនជីវិតក្នុងឆ្នាំសិក្សា ២០២៣-២០២៤។ ជាមួយនេះ សៀវភៅបំណិនជីវិតចំនួន៨ ក្បាល សម្រាប់កុមារវ័យជំទង់ និងមនុស្សពេញវ័យ ត្រូវបានរៀបចំឡើង រួមមាន ចំណងជើង៖ ១). ខ្ញុំ និងបរិស្ថានជុំវិញខ្ញុំ ២). ខ្ញុំ និងរាងកាយខ្ញុំ ៣). ខ្ញុំ អារម្មណ៍ខ្ញុំ និងទំនាក់ទំនងរបស់ខ្ញុំ ៤). ខ្ញុំ និងបំណងប្រាថ្នារបស់ខ្ញុំ ៥). ខ្លួនឯង ៦). ស្វ័យប្រសិទ្ធភាព ៧). សមត្ថភាពធ្វើការ និង ៨). សមត្ថភាពរកការងារ៕