ទំហំពាណិជ្ជកម្មកម្ពុជា និងអេមីរ៉ាត់អារ៉ាប់រួម ក្នុងរយៈពេល១០ខែ ឆ្នាំនេះ មានការកើនឡើងប្រមាណ៧ភាគរយ បើធៀបនិងឆ្នាំមុន
ភ្នំពេញ៖ ក្រសួងពាណិជ្ជកម្មបញ្ជាក់នៅថ្ងៃទី២០ ខែវិច្ឆិកា ឆ្នាំ២០២៤នេះថា ទំហំពាណិជ្ជកម្មរវាងកម្ពុជា និងអេមីរ៉ាត់អារ៉ាប់រួម ក្នុងរយៈពេល១០ខែ ឆ្នាំ២០២៤ មានការកើនឡើងប្រមាណ៧ភាគរយ បើធៀបនិងឆ្នាំមុន ខណៈក្រសួងពាណិជ្ជកម្មថា កម្ពុជាមានកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយទ្វេភាគី ដែលអនុញ្ញាតឱ្យនាំទំនិញមួយចំនួនទៅកាន់ទីផ្សារអេមីរ៉ាត់អារ៉ាប់រួមដោយមិនបង់ពន្ធ…។
ក្រសួងពាណិជ្ជកម្មបានបន្តថា ទំហំពាណិជ្ជកម្មរវាងកម្ពុជា និងអេមីរ៉ាត់អារ៉ាប់រួម ក្នុងរយៈពេល១០ខែនេះ មានប្រមាណ៧៥លានដុល្លារអាម៉េរិក កើនឡើង៧ភាគរយ។ ក្នុងនោះកម្ពុជានាំចេញប្រមាណ៥៥លានដុល្លារអាម៉េរិក និងនាំចូលប្រមាណ២០លានដុល្លារអាម៉េរិក។ ចំពោះទំនិញនាំចេញសំខាន់ៗពីកម្ពុជារួមមាន៖ សម្លៀកបំពាក់ ស្បែកជើង កាបូប យានយន្ត និងគ្រឿងបង្គុំ ផលិតផលកៅស៊ូ។ រីឯទំនិញនាំចូលសំខាន់ៗពីអេមីរ៉ាត់អារ៉ាប់រួមរួមមាន៖ ប្រេង និងកៅស៊ូប៊ីទីម ថ្នាំជក់ ផលិតផលប្លាស្ទិក ម៉ាស៊ីន និងឧបករណ៍អគ្គិសនី ចំណីកែច្នៃសម្រាប់សត្វ និងគ្រឿងសង្ហារឹម-ល-។
ទន្ទឹមនឹងការសម្រេចទំហំពាណិជ្ជកម្មនេះ លោកជំទាវតឹករ៉េត កំរង រដ្ឋលេខាធិការក្រសួងពាណិជ្ជកម្ម ក្នុងពិធីបើកសិក្ខាសាលាផ្សព្វផ្សាយពីអត្ថប្រយោជន៍នៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា និងអេមីរ៉ាត់អារ៉ាប់រួម (Cambodia-UAE CEPA) បានលើកឡើងពីសារសំខាន់នៃកិច្ចព្រមព្រៀង ដែលបានចូលជាធរមានកាលពីថ្ងៃទី៣១ ខែមករា ឆ្នាំ២០២៤ កន្លងទៅ។ ដោយកិច្ចព្រមព្រៀងនេះជាសមិទ្ធផល ពង្រឹងនិងពង្រីកទំនាក់ទំនងទ្វេភាគី ជំរុញការធ្វើសមាហរណកម្មស៊ីជម្រៅក្នុងសកម្មភាពពាណិជ្ជកម្មទំនិញ សេវាកម្ម និងការទាក់ទាញវិនិយោគ និងការធ្វើពិពិធកម្មទីផ្សារនាំចេញទំនិញទៅកាន់ទីផ្សារអេមីរ៉ាត់អារ៉ាប់រួម តំបន់អារ៉ាប់ និងតំបន់ក្បែរខាង។
តាមរយៈកិច្ចព្រមព្រៀងនេះ កម្ពុជា អាចនាំទំនិញទៅទីផ្សារអេមីរ៉ាត់អារ៉ាប់រួមជាមួយអត្រាពន្ធសូន្យលើមុខទំនិញសំខាន់ៗ ដូចជា៖ កាបូបធ្វើដំណើរ ស្បែកជើង មុខទំនិញវាយនភណ្ឌ សម្លៀកបំពាក់ កង់ បន្ទះសូឡា គ្រឿងបង្គុំអេឡិចត្រូនិក រថយន្តអគ្គិសនី កៅស៊ូ (Latex) អង្ករ ដំឡូងមី គ្រាប់ស្វាយចន្ទី ម្រេច គ្រាប់កាហ្វេ បន្ទះខ្លឹមចន្ទន៍ បន្លែ ផ្លែឈើ ម្ហូបអាហារកំប៉ុង អាហារកែច្នៃពីអង្ករ និងប្រភេទទំនិញកសិកម្មកែច្នៃជាច្រើនប្រភេទ។ បន្ថែមពីនេះ កិច្ចព្រមព្រៀងក៏នឹងអនុញ្ញាតឱ្យកម្ពុជា អាចផ្គត់ផ្គង់សេវាពាណិជ្ជកម្មសំខាន់ៗ ដូចជា៖ សេវាកម្មអាជីពនិងធុរកិច្ច សេវាកម្មសំណង់និងវិស្វកម្ម និងសេវាកម្មបរិស្ថាន ផងដែរ។
ហេតុនេះក្រសួង រំពឹងថា វិស័យឯកជនកម្ពុជានឹងចូលរួមចំណែកក្នុងការប្រើប្រាស់កិច្ចព្រមព្រៀងពាណិជ្ជកម្មមួយនេះឱ្យបានពេញលេញ ដើម្បីចូលរួមជំរុញកំណើនពាណិជ្ជកម្ម និងវិនិយោគទ្វេភាគី ដែលការណ៍នេះស្របតាមយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាល ពោលគឺការធ្វើពិពិធកម្មសេដ្ឋកិច្ច និងការពង្រឹងភាពប្រកួតប្រជែង ព្រមទាំងចូលរួមចំណែកគាំទ្រដល់ដំណើរការចាកចេញពីប្រទេសអភិវឌ្ឍន៍តិចតួចរបស់កម្ពុជានាពេលខាងមុខ៕
