នាយករដ្ឋមន្រ្ដី ហ៊ុន ម៉ាណែត ធានាដល់អ្នកវិនិយោគបរទេសថា កម្ពុជាមានបរិយាកាសសុវត្ថិភាព និងស្ថិរភាពសម្រាប់ការវិនិយោគ
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា មានប្រសាសន៍បញ្ជាក់ធានាដល់អ្នកវិនិយោគបរទេសថា កម្ពុជាមានបរិយាកាសសុវត្ថិភាព និងស្ថិរភាពសម្រាប់ការវិនិយោគ។
សម្ដេចធិបតី ហ៊ុន ម៉ាណែត បានមានប្រសាសន៍បញ្ជាក់បែបនេះ ក្នុងឱកាស អញ្ជើញជាអធិបតីក្នុងពិធីជួបសំណេះសំណាល និងពិសាភោជនាហារសាមគ្គីជាមួយសហគ្រិន ត្រកូលលីន ពិភពលោកនៅរសៀលថ្ងៃទី១២ ខែវិច្ឆិកា ឆ្នាំ២០២៤នេះ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ។
ក្នុងឱកាសនោះ សម្ដេចធិបតី ហ៊ុន ម៉ាណែត បានថ្លែងថា វិនិយោគិនពិតជាត្រូវការនូវបរិយាកាសវិនិយោគមួយដែលប្រកបដោយស្ថិរភាព និងសុខសន្តិភាព ជាពិសេសវិនិយោគិនបរទេស នៅក្នុងចំណុចនេះ សម្ដេចធិបតីបានបញ្ជាក់ថា កម្ពុជាមានបរិយាកាសល្អនៅក្នុងការបោះទុនវិនិយោគ ចំនួន ៣ចំណុចសំខាន់ៗ ដែលក្នុងនោះមានដូចជា៖
ទី១.កម្ពុជាគឺជាប្រទេសដែលមានស្ថិរភាពនយោបាយ និងសុខសន្តិភាព ហើយថែមទាំងធានាបាននូវសុខសុវត្ថិភាពដល់វិនិយោគិនទាំងអស់រួមទាំងទេសចរផងដែរ។
ទី២.កម្ពុជាជាប្រទេសដែលបានដាក់ឱ្យមានប្រព័ន្ធម៉ាក្រូសេដ្ឋកិច្ចដែលផ្ដល់នូវឱកាសវិនិយោ គច្រើនដល់វិនិយោគិន។
ទី៣.កម្ពុជាបានកែសម្រួលច្បាប់វិនិយោគ និងលក្ខខណ្ឌវិនិយោគនានា ដើម្បីបង្កភាពកាន់តែងាយស្រួលដល់វិនិយោគិន។
សម្ដេចធិបតី នាយករដ្ឋមន្ត្រី បានបញ្ជាក់ថា កម្ពុជាគឺជាប្រទេសបើកចំហ និងមានលក្ខខណ្ឌវិនិយោគងាយស្រួល ហេតុនេះ សម្ដេចសង្ឃឹមថា ជំនួបជាមួយវិនិយោគិនត្រកូលលីនពិភពលោកនៅថ្ងៃនេះ វិនិយោគិនទាំងអស់នឹងនាំអ្នកវិនិយោគមកបណ្ដាក់ទុននៅកម្ពុជាឱ្យបានកាន់ តែច្រើនថែមទៀត ៕
