ឯកឧត្តម សរ សុពុត្រា ប្តេជ្ញានឹងដណ្ដើមប្រៀបឈ្នះក្នុងព្រះរាជពិធីបុណ្យអុំទូក រយៈពេល៣ថ្ងៃ ជូនពលរដ្ឋនៅក្នុងខេត្តស្ទឹងត្រែង

ភ្នំពេញ៖ នៅព្រឹកថ្ងៃទី១២ ខែវិច្ឆិកា ឆ្នាំ២០២៤នេះ ឯកឧត្តម សរ សុពុត្រា អភិបាល នៃគណៈអភិបាលខេត្តស្ទឹងត្រែង បានអញ្ជើញជាអធិបតីក្នុងពិធីសំណេះសំណាលជាមួយក្រុមកីឡាករចំណុះទូក «ង» ខេត្តស្ទឹងត្រែង ដើម្បីត្រៀមទៅចូលរួមការប្រណាំងក្នុងព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នៅរាជធានីភ្នំពេញ ដែលនឹងប្រព្រឹត្តទៅនៅថ្ងៃទី១៤-១៥-១៦ ខែវិច្ឆិកា ឆ្នាំ២០២៤ ខាងមុខនេះ។

ក្នុងឱកាសនោះ ឯកឧត្តម សរ សុពុត្រា អភិបាលខេត្តស្ទឹងត្រែង បានមានប្រសាសន៍ថា ក្នុងនាមគណៈអភិបាលខេត្តស្ទឹងត្រែង ឯកឧត្តមពិតជាមានសេចក្តីសោមនស្សរីករាយដែលទទួលបានការអនុញ្ញាតពីគណៈកម្មការរៀបចំបុណ្យជាតិ និងអន្តរជាតិ ដែលបានឱ្យទូករបស់ខេត្តស្ទឹងត្រែង ចុះឈ្មោះដើម្បីប្រណាំងក្នុងព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ខាងមុខនេះ។

ឯកឧត្តមអភិបាលខេត្ត បានបញ្ជាក់ថា ខេត្តស្ទឹងត្រែង បានយកចំនួន២ ដើម្បីចូលរួមប្រណាំងក្នុងព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ខាងមុខនេះ រួមមាន៖ ទី១. ទូកឈ្មោះ “ស្ទឹងត្រែងសែនជ័យបារមីព្រះអង្គធំ” និងទី២. ទូកឈ្មោះ “មហាសែនតេជៈកងចក្រស្ទឹងត្រែង” ដែលជាទូកថ្មីទាំងពីរ ហើយកន្លងមកយើងមានទូកតែមួយទេសម្រាប់ចូលរួមប្រណាំង ប៉ុន្តែសម្រាប់ឆ្នាំ២០២៤នេះ យើងបានបន្ថែមមួយទូកទៀត ដើម្បីជាការចាប់ផ្តើមដំណើររបស់យើង នៅក្នុងចូលរួមព្រះរាជពិធីបុណ្យអុំទូកនេះ។

ឯកឧត្តមអភិបាលខេត្ត បានបញ្ជាក់បន្ថែមថា បើទោះជាទូករបស់ខេត្តស្ទឹងត្រែងថ្មី និងចំណុះថ្មីក៏ដោយ ឯកឧត្តមបានប្តេជ្ញាចិត្តនឹងដណ្ដើមប្រៀបឈ្នះក្នុងព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ រយៈពេល៣ថ្ងៃនេះ ជូនប្រជាពលរដ្ឋនៅក្នុងខេត្តស្ទឹងត្រែង ផងដែរ។

ជាមួយគ្នានេះ ឯកឧត្តម សរ សុពុត្រា បានណែនាំដល់ក្រុមកីឡាករចំណុះទូកទាំងអស់ត្រូវយកចិត្តទុកដាក់បញ្ចេញនូវទេពកោសល្យ និងសមត្ថភាព និងរួមសាមគ្គីគ្នាក្នុងការប្រកួតដើម្បីដណ្តើមយកជ័យជម្នះ ដល់ក្រុមរបស់ខ្លួន និងខេត្ត និងត្រូវចេះថែទាំសុខភាពឱ្យបានល្អនិងត្រូវចេះរស់នៅស្អាត ហូបស្អាត និងផឹកស្អាត។

បន្ថែមពីនេះ ឯកឧត្តមអភិបាលខេត្ត បានគូសបញ្ជាក់ថា ចាញ់ និងឈ្នះជារឿងមួយ ប៉ុន្តែអ្វីដែលយើងខ្ញុំ និងប្រជាពលរដ្ឋខេត្តស្ទឹងត្រែងចង់បានគឺការឈ្នះរបស់បងប្អូនយើងទាំង៣ថ្ងៃ ហើយអ្វីដែលយើងចង់បានបន្ថែមទៀតនោះគឺការគោរពវិន័យ គោរពបទបញ្ជាផ្ទៃក្នុង មានសីលធម៌ និងមានសុជីវធម៌នៅក្នុងការប្រកួត បើទោះបីជាមានការប៉ះទង្គិចអារម្មណ៍គ្នាទៅវិញទៅមកបន្តិចបន្តួចក្តី ប៉ុន្តែត្រូវតែឈរលើគោលការណ៍ជាអ្នកកីឡាបើយើងឈ្នះត្រូវឈ្នះទាំងអស់គ្នា និងសូមឱ្យនៅចូលរួមរហូតដល់ចប់ ជាពិសេសក្នុងពិធីកាត់ព្រ័ត្របិទបញ្ចប់ នៃព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ តែម្ដង ៕