សម្ដេចធិបតី៖ ឧបនាយករដ្ឋមន្ត្រី សាយ សំអាល់ មានគម្រោងសិក្សាក្នុងការស្ថាបនាផ្លូវរត់ និងផ្លូវជិះកង់តភ្ជាប់ពីខេត្តកែប រហូតដល់ខេត្តកោះកុង

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងឲ្យដឹងថា ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់មានគម្រោងធ្វើការសិក្សាក្នុងការស្ថាបនាផ្លូវរត់ និងផ្លូវជិះកង់តភ្ជាប់ពីខេត្តកែបរហូតដល់ខេត្តកោះកុង ដោយស្ថាបនានៅជាប់នឹងមាត់សមុទ្រតែម្តង ខណៈដែលកម្ពុជាមានខេត្តជាប់មាត់សុទ្រចំនួន៤ តែប៉ុណ្ណោះ រួមមាន ខេត្តកែប ខេត្តកំពត ខេត្តព្រះសីហនុ និងខេត្តកោះកុង។

ក្នុងឱកាសនៃពិធីសម្ពោធដាក់ឱ្យប្រើប្រាស់ វិថីតេជោសន្តិភាពឆ្នេរអង្កោលខេត្តកែប នាថ្ងៃទី១១ ខែវិច្ឆិកា ឆ្នាំ២០២៤នេះ សម្តេចធិបតី បានមានប្រសាសន៍ថា ខេត្តជាប់មាត់សមុទ្ររបស់កម្ពុជាទាំង៤នេះ គឺសុទ្ធតែមានសក្តា នុពលរៀងៗខ្លួនរបស់វា ដែលយើងអាចពិនិត្យមើលពីគម្រោងនៃការស្ថាបនាផ្លូវជិះកង់ ព្រោះថាអ្នកខ្លះ អាចជិះកង់ពីភ្នំពេញមកកាន់ខេត្តកែបដើម្បីជាការកម្សាន្តផង ដើម្បីសុខភាពផង និងអាចបន្តដំណើរទៅ កាន់ខេត្តផ្សេងៗទៀត ខណៈដែលវិថីតេជោសន្តិភាពឆ្នេរអង្កោលខេត្តកែប ប្រវែងជាង ១២គីឡូម៉ែត្រ នេះគឺជាបណ្តាញនៃតភ្ជាប់ទៅកាន់សហគមន៍ដ៏មានសារៈសំខាន់។

សម្តេចធិបតី បានវាយតម្លៃខ្ពស់ចំពោះក្រសួងសាធារណការ និងដឹកជញ្ជូន និងបណ្តាក្រសួង ស្ថាប័នពាក់ព័ន្ធដទៃទៀត ដែលបានខិតខំប្រឹងប្រែងយកចិត្តទុកដាក់ក្នុងការជំរុញបន្តអភិវឌ្ឍន៍ហេដ្ឋារចនាសម្ព័ន្ធដែលជាគោលដៅដ៏សំខាន់របស់រាជរដ្ឋាភិបាលនៅគ្រប់អាណត្តិគឺ មនុស្ស ផ្លូវ ទឹក ភ្លើង ហើយក្នុងនោះផ្លូវគឺជា ការងារដ៏សំខាន់ដែលយើងត្រូវតែធ្វើ ព្រោះវាជាមូលដ្ឋានមួយនៅក្នុងការធានាចំពោះការរីកចម្រើនខាងផ្នែកសេដ្ឋកិច្ចប្រកបដោយចីរភាព និងផ្តល់ផលប្រយោជន៍ដោយផ្ទាល់ដល់ប្រជាពលរដ្ឋរបស់យើង តាមរយៈការដឹកជញ្ជូន ការប្រើប្រាស់ និងការបង្កើតសេដ្ឋកិច្ចបន្ថែមទៀតនៅក្នុងមូលដ្ឋាន។

សម្តេចធិបតីបានលើកឡើងថា ក្នុងរយៈពេលជិត ១៥ខែនៃរាជរដ្ឋាភិបាលនីតិកាលទី៧ នៃរដ្ឋសភា គឺយើងសម្រេចបាននូវហេដ្ឋារចនាសម្ព័ន្ធជាច្រើនសម្រាប់ការរួមចំណែកដល់ការអភិវឌ្ឍសេដ្ឋកិច្ចរបស់កម្ពុជា ៕