ទុងប្រផេះ ជាសត្វស្លាបកម្រ បង្ហាញវត្តមានកាន់តែច្រើនក្នុងតំបន់ការពារទេសភាពបឹងព្រែកល្ពៅ
ភ្នំពេញ៖ ទុងប្រផេះ ដែលជាប្រភេទសត្វស្លាបកម្រ កំពុងបង្ហាញវត្តមានកាន់តែច្រើន នៅក្នុងតំបន់ការពារទេសភាពបឹងព្រែកល្ពៅ ខេត្តតាកែវ។ បើតាម អង្គការជីវិតធម្មជាតិនៅកម្ពុជា (NCO) ក្នុងឆ្នាំ២០២៤ តំបន់ដីសើមនេះ មានទុងប្រផេះរហូតដល់៣៤ក្បាល។
បើតាម អង្គការជីវិតធម្មជាតិនៅកម្ពុជា កាលពីថ្ងៃទី២៤ តុលា បានបញ្ជាក់ថា ក្នុងរយៈពេល១០ឆ្នាំចុងក្រោយនេះ វត្តមានសត្វទុងប្រផេះក្នុងតំបន់ការពារទេសភាពបឹងព្រែកល្ពៅ បានកើនឡើងជាបន្តបន្ទាប់ ជាពិសេសក្នុងឆ្នាំ២០២៤ ដែលមានរហូតដល់ ៣៤ក្បាល។ ការកើនឡើងចំនួនសត្វស្លាបទឹកនេះ បានបញ្ជាក់ថា តំបន់ដីសើមបឹងព្រែកល្ពៅពិតជាមានសារៈសំខាន់ខ្លាំងណាស់ ក្នុងការទ្រទ្រង់ជីវៈចម្រុះដ៏សម្បូរបែប។
ទុងប្រផេះ ត្រូវបានពិភពលោកចុះឈ្មោះក្នុងបញ្ជីក្រហម IUCN ដែលជាប្រភេទសត្វកំពុងទទួលរងការគំរាមកំហែង និងជិតផុតពូជ ដោយសារការបាត់បង់ទីជម្រក និងការបរបាញ់។ សត្វប្រភេទនេះ ភាគច្រើនធ្វើសម្បុកពងកូននៅតំបន់ទន្លេសាប ជាពិសេសតំបន់រ៉ាមសារព្រែកទាល់ ដែលជាកន្លែងបន្តពូជចុងក្រោយគេ ក្នុងតំបន់អាស៊ីអាគ្នេយ៍ ហើយបន្ទាប់មកពួកវានឹងផ្លាស់ទីរកចំណីពាសពេញតំបន់សើមក្នុងប្រទេសកម្ពុជា។ តំបន់ដីសើមបឹងព្រែកល្ពៅ គឺជាទីតាំងរកចំណីសំខាន់មួយសម្រាប់សត្វស្លាបនេះ និងតែងតែមានវត្តមានជារាងរាល់ឆ្នាំចាប់ពីខែមេសា ទៅដល់ខែវិច្ឆិកា។
នៅឆ្នាំ២០២១ មានសត្វទុងប្រផេះចំនួន ៣ពាន់ក្បាល កំពុងរស់នៅ និងបន្តពូជ ដែលប្រហែល ៣០ភាគរយ នៃចំនួនសរុបលើពិភពលោក។ នេះបើតាមក្រសួងបរិស្ថាន។
សសូមបញ្ជាក់ថា ការពារទេសភាពបឹងព្រែកល្ពៅ ដែលមានផ្ទៃដី៨,៣០៥ហិកតា លាត សន្ធឹងលើផ្ទៃស្រុកបុរីជលសារ និងស្រុកកោះអណ្ដែត ខេត្តតាកែវ ត្រូវបានបង្កើតឡើងនៅខែតុលា ឆ្នាំ២០០៧ ដើម្បីគ្រប់គ្រង និងអភិរក្សដែនបម្រុងសត្វក្រៀល និងសត្វស្លាបផ្សេងៗទៀត។
ចាប់តាំងពីឆ្នាំ២០០១ រហូតទល់ឆ្នាំ២០២០នេះ ក្នុងតំបន់ការពារដីសើមនេះ មានវត្តមានសត្វស្លាបប្រមាណជា ១៣០ប្រភេទ ក្នុងនោះចំនួន ១១៨ប្រភេទ ជាសត្វស្លាបមានបង្គួរ។ ចំពោះសត្វស្លាបងាយរងគ្រោះចំនួន ៦ប្រភេទដូចជា ស្មោញ ត្រយ៉ងខ្លួនស រនាលពណ៌ ទង់ប្រផេះ ចាបពូកទ្រូងលឿង និងខ្វែកសមុទ្រតូចពណ៌ត្នោត។ រីឯសត្វរងគ្រោះមានចំនួន ៣ប្រភេទរួមមាន ត្រដក់ធំ ចាបព្រៃវែង និងត្រយ៉ងចំពុះស្លាបព្រា។ ចំណែកឯសត្វពីរប្រភេទទៀតកំពុងរងគ្រោះគឺ ក្រៀល និងត្រដក់តូច។ ឯសត្វមួយប្រភេទគឺខ្សឹប ជាសត្វជិតផុតពូជ។ នេះបើតាម អង្គការជីវិតធម្មជាតិនៅកម្ពុជា ៕
