ភ្នំពេញ៖ ដោយមានឈ្មោះវិទ្យាសាស្រ្តថា Anastomus oscitans ចង្កៀលខ្យងជាប្រភេទរងគ្រោះតិចតួច (Least Concern) ស្ថិតក្នុងបញ្ជីក្រហមរបស់ IUCN។
ចង្កៀលខ្យងមានមាឌធំ មានកម្ពស់ពី ៦៨ ទៅ ៨១សង់ទីម៉ែត្រ។ ចំពុះមានលក្ខណៈចំហរវាងគម្របទាំងពីរ ។ ខ្លួនពណ៌ស ។ពេលហើរវាបង្ហាញស្លាបផ្នែកខាងក្រោយនិងកន្ទុយមានពណ៌ខ្មៅ។
ទីជម្រករបស់វាគឺរស់នៅព្រៃលិចទឹក វាលលិចទឹក និងវាលស្រែ ហើយភាគច្រើនគេប្រទះឃើញនៅតំបន់ជុំវិញបឹងទន្លេសាប ជាមួយបន្ទាយពងកូនដ៏ធំនៅតំបន់ស្នូលព្រែកទាល់នៃឋបនីយជីវមណ្ឌលបឹងទន្លេសាប។
ជាទូទៅ វាស៊ីខ្យងជាអាហារ និងចូលចិត្តរកស៊ីជាហ្វូង។ គេប្រទះឃើញវាមានវត្តមានពេញមួយឆ្នាំនៅកម្ពុជា។ រដូវបន្តពូជរបស់ចង្កៀលខ្យង គឺចាប់ពីខែ តុលា ដល់ មេសា និងមានពងចំនួនពី ២ ទៅ ៥គ្រាប់៕
