អ្នកជំនាញផ្ដើមពង្រឹងខឿនគ្រឹះរបស់តួប៉មកណ្តាលប្រាសាទទ្រមូង ក្រោយអង្កេតឃើញសភាពទ្រុឌទ្រោមខ្លាំង

ភ្នំពេញ៖ ក្រុមអ្នកជំនាញនាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរា កំពុងអនុវត្តគម្រោងជួសជុលប្រាសាទទ្រមូង ស្ថិតនៅខាងលិច នៃខ្លោងទ្វារតាកាវ ក្រុងអង្គរធំ ឱ្យរឹងមាំឡើងវិញ ក្រោយប្រាសាទនេះរងការខូចខាតខ្លាំង។ នេះបើតាមអាជ្ញាធរជាតិអប្សរាបញ្ជាក់នៅថ្ងៃទី៥ ខែវិច្ឆិកា ឆ្នាំ២០២៤។

បុរាណវិទូ និងជាប្រធានការងារការដ្ឋាន លោក ជា សារិទ្ធ ថ្លែងក្នុងបទសម្ភាសរបស់អាជ្ញាធរជាតិអប្សរាថា ប្រាសាទទ្រមូង ជាមន្ទីរពេទ្យបុរាណមួយក្នុងចំណោមមន្ទីរពេទ្យបុរាណចំនួន៤ របស់អតីតរាជធានីអង្គរធំ បច្ចុប្បន្ន កំពុងរងការខូចខាតជាខ្លាំង ជាពិសេស នៅត្រង់តួប៉មកណ្តាល ដោយមានការដួលរលំស្ទើរតែទាំងស្រុង ពោលគឺនៅសល់ទ្រង់ទ្រាយដើមប្រហែល២០ទៅ៣០ភាគរយប៉ុណ្ណោះ។ លោកបន្ថែមថា ដោយឡែក ចំពោះថ្មចាប់ពីជញ្ជាំងរហូតទៅដល់ផ្នែកដំបូលវិញបានរលំ និងធ្លាក់ចុះមកលើដីទាំងស្រុង ដោយនៅសេសសល់ តែស៊ុមទ្វារផ្នែកខាងមុខ ខឿនផ្នែកខាងត្បូង និងផ្នែកខាងកើត។ ចំណែក រចនាសម្ព័ន្ធផ្នែកខាងលិច និងខាងជើង ក៏បាត់ថ្មអស់ប្រហែល៥០ភាគរយដែរ។

បុរាណវិទូរូបនេះរៀបរាប់បន្តថា ដោយសារតែប្រាសាទទ្រមូង រងការខូចខាតធ្ងន់ធ្ងរ ទើបបច្ចុប្បន្ន ក្រុមការងារនៃអាជ្ញាធរជាតិអប្សរា ចាប់ផ្ដើមអនុវត្តគម្រោងជួសជុល ថែទាំឡើងវិញទៅតាមដំណាក់កាល។ ដំណាក់កាលទី១ គឺក្រុមការងារ ចាប់ផ្ដើមធ្វើសម្រង់ប្លង់បច្ចុប្បន្នរបស់ប្រាសាទ ធ្វើការវិភាគវិនិច្ឆ័យលក្ខណៈរបស់សំណង់ និងការខូចខាត ដើម្បីឈានដល់ការជួសជុល។ ចំណែកដំណាក់កាលទី២ គឺធ្វើការចុះបញ្ជីថ្មដែលកំពុងរាយប៉ាយ ដើម្បីកំណត់មុខងារ និងទីតាំងរបស់ថ្ម។

លោក ជា សារិទ្ធ បញ្ជាក់ថា តាមការចុះបញ្ជីកន្លងមក អាចឱ្យដឹងថា ថ្មដែលនៅរាយប៉ាយលើដី នាផ្នែកខាងលិចនៃប្រាសាទ គឺមានចំនួនរហូតទៅដល់៥០០ដុំ ផ្នែកខាងជើងមានចំនួន៦០០ដុំ។ ថ្មទាំងនោះ បានកំណត់អត្តសញ្ញាណរួចហើយមានដូចជា ថ្មដំបូល ថ្មជញ្ជាំង ថ្មខឿន ផ្តែរ សសរពេជ្រ និងទ្វារបញ្ឆោតរបស់ប្រាសាទជាដើម ។ល។ ក្នុងពេលបច្ចុប្បន្ន ក្រុមការងារនៃអាជ្ញាធរជាតិអប្សរា កំពុងដំណើរការជួសជុលប្រាសាទទ្រមូងនេះ ដោយចាប់ផ្ដើមពីដំណាក់កាលនៃការពង្រឹងខឿន គ្រឹះរបស់តួប៉មកណ្តាល៕