តំបន់ប្រតិបត្តិការសឹករងកំពង់ឆ្នាំង បានទទួលអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត

ភ្នំពេញ៖ ឯកឧត្តម នាយឧត្តមសេនីយ៍ គីម ប៊ុនថាន រដ្ឋមន្ត្រីប្រតិភូអមនាយករដ្ឋមន្ត្រី នៅថ្ងៃទី៤ ខែវិច្ឆិកា ឆ្នាំ២០២៤ បានអញ្ជើញមកសំណេះសំណាល និងប្រគល់អំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និង លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ក្នុងនោះមាន អង្ករ៥តោន មីជាតិ ៥០០កេស ទឹកត្រី ៣០០យួរ ទឹកស៊ីអ៉ីវ ៣០០យួរ ឧបត្ថម្ភដល់ បញ្ជាការដ្ឋានតំបន់ប្រតិបត្តិការសឹករងកំពង់ឆ្នាំង ដើម្បីធ្វើការងារមនុស្សធម៌ ។

នៅក្នុងរបាយការណ៍ស្វាគមន៍របស់ ឯកឧត្តមឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង បានបញ្ជាក់ថា ចាប់ពីខែកក្កដា ដល់ខែតុលា ឆ្នាំ២០២៤ អង្គភាព តំបន់ប្រតិបត្តិការសឹករងកំពង់ឆ្នាំង ក៏ដូចជាគណៈកម្មាធិការសមាគមអតីតយុទ្ធជនកម្ពុជាខេត្ត បាននាំយកអំណោយដ៏ថ្លៃថ្លារបស់ សម្ដេចមហាបវរធិបតីនាយករដ្ឋមន្ត្រី នៃព្រះរាជាណាចក្រកម្ពុជា ទៅឧបត្ថម្ភដល់ អតីតយុទ្ធជន កងទ័ព ប្រជាពលរដ្ឋក្រីក្រ ជួបការលំបាក រងគ្រោះដោយគ្រោះមហន្តរាយផ្សេងៗ ចំនួន៨១លើក ក្នុងនោះបានចំណាយ អង្ករ ១៤,៥៧៥គីឡូក្រាម ៤៩៤កេស ត្រីខ ៤៩៤យួរ ទឹកត្រី ៤៨៦យួរ ទឹកស៊ីអ៉ីវ ៤៨៦យួរ ស័ង្កសី ២,៧៩៥សន្លឹក ស៊ីម៉ងត៍ ៣៧៧ការ៉ុង និង ថវិកាចំនួន ៣៩,៣៣៩,០០០រៀល និងបានប្រើប្រាស់ប្រេងសាំង ២,៧៣០លីត្រ ប្រេងម៉ាស៊ូត ២,៦៧០លីត្រ សម្រាប់ដោះស្រាយមធ្យោបាយធ្វើដំណើរបម្រើឲ្យការងារមនុស្សធ៌មខាងលើនេះ ។

អញ្ជើញមានមតិសំណេះសំណាល ក្នុងឱកាសនេះ ឯកឧត្តម នាយឧត្តមសេនីយ៍ គីម ប៊ុនថាន រដ្ឋមន្ត្រី ប្រតិភូអមនាយករដ្ឋមន្ត្រី បាននាំយកនូវប្រសាសន៍ផ្តាំផ្ញើសួរសុខទុក្ខរបស់សម្តេចធិបតី នាយករដ្ឋមន្ត្រី និងលោកជំទាវបណ្ឌិត ជូនចំពោះ នាយ-ពលទាហាន ទាំងអស់ ។ ឯកឧត្តម រដ្ឋមន្ត្រី បានថ្លែងកោតសរសើរដល់ ឯកឧត្តម មេបញ្ជាការ តំបន់ប្រតិបត្តិការសឹករងកំពង់ឆ្នាំង ព្រមទាំង នាយទាហាន នាយទាហានរង និង ពលទាហាន ក្រោមឱវាទទាំងអស់ ដែលមានសាមគ្គីផ្ទៃក្នុងខ្ពស់ ក្នុងការបម្រើការងារជូនអង្គភាព និង ការចុះជួយ ប្រជាពលរដ្ឋ នៅទូទាំងខេត្តកំពង់ឆ្នាំង បានទាន់វេលា ។

ឯកឧត្តម បានបន្តថា សម្ដេចធិបតី និង លោកជំទាវ មានការសប្បាយរីករាយ និង សរសើរខ្លាំងណាស់ ដែលបានឃើញគ្រប់សកម្មភាពរបស់កងកម្លាំងតំបន់ប្រតិបត្តិការសឹករងកំពង់ឆ្នាំង ក្រោមការដឹកនាំរបស់ ឧត្តមសេនីយ៍ត្រី អ៊ុំ សុភា បានចុះជួយ ក៏ដូចជា នាំយកអំណោយរបស់សម្តេច និង លោកជំទាវ ឧបត្ថម្ភដល់ប្រជាពលរដ្ឋដែលកំពុងខ្វះខាត និង កំពុងត្រូវការជំនួយពិតប្រាកដមែន ។

ជំនួសមុខឲ្យ មេបញ្ជាការរង នាយទាហាន នាយទាហានរង និងពលទាហាន ទូទាំង តំបន់ប្រតិបត្តិការសឹករងកំពង់ឆ្នាំង ឯកឧត្តម ឧត្តមសេនីយ៍ត្រី អ៊ុំ សុភា សូមគោរពថ្លែងអំណរគុណ យ៉ាងជ្រាលជ្រៅបំផុតចំពោះ សម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ដែលតែងតែឧបត្ថម្ភ អង្ករ សម្ភារៈ និង គ្រឿងឧបភោគបរិភោគ ដល់អង្គភាព តំបន់ប្រតិបត្តិការសឹករងកំពង់ឆ្នាំង និងសូមប្តេជ្ញាថែរក្សា និងប្រើប្រាស់សម្ភារទាំងអស់ឲ្យចំគោលដៅ ដើម្បីប្រយោជន៍ជាតិមាតុភូមិ ៕