បរទេស៖ លោក គ្រីស្ណា ស្រ៊ីនីវ៉ាសាន ប្រធាននាយកដ្ឋានអាស៊ី និងប៉ាស៊ីហ្វិករបស់ មូលនិធិរូបិយវត្ថុអន្តរជាតិ (IMF) បាននិយាយថា អាស៊ីដែលកំពុងរួមចំណែក៦០ភាគរយដល់កំណើនពិភពលោក គឺជាមហាអំណាចនៃសេដ្ឋកិច្ចពិភពលោក។
លោក ស្រ៊ីនីវ៉ាសាន បានប្រាប់ទីភ្នាក់ងារសារព័ត៌មានចិនស៊ីនហួ នៅក្នុងបទសម្ភាសមួយកាលពីដើមសប្តាហ៍នេះថា៖«នេះគឺជាតំបន់ដែលមានថាមពលខ្លាំងបំផុតរបស់ពិភពលោក។ វាមានបរិមាណកម្លាំងពលកម្មច្រើន។ ភាគច្រើនក៏ជាកម្លាំងពលកម្មជំនាញផងដែរ។ ជាតំបន់ដែលត្រូវបានរួមបញ្ចូលយ៉ាងខ្ពស់ទៅក្នុងខ្សែច្រវាក់ផ្គត់ផ្គង់សកល។ ហើយចុងក្រោយវាគឺជាតំបន់ដែលមានការកើនឡើងយ៉ាងខ្លាំងនៃកំណើនផលិតភាព»។
លោក បន្ត ថា សម្រាប់ ហេតុផល ទាំង បី នេះ តំបន់ នេះ បាន រួមចំណែក ច្រើន ជាង តំបន់ ផ្សេង ទៀត ។
នៅក្នុងរបាយការណ៍ចុងក្រោយបំផុតរបស់ទស្សនវិស័យសេដ្ឋកិច្ចពិភពលោក (WEO) ដែលបានចេញផ្សាយកាលពីថ្ងៃអង្គារទី២៩តុលា IMF បានរក្សាការព្យាករកំណើនសកលរបស់ខ្លួននៅឆ្នាំ២០២៤ នៅត្រឹម៣,២ភាគរយស្របតាមការព្យាកររបស់ខ្លួននៅក្នុងខែកក្កដា។ ទន្ទឹមនឹងនោះ សេដ្ឋកិច្ចអាស៊ីដែលកំពុងរីកចម្រើន និងកំពុងអភិវឌ្ឍ ត្រូវបានគេរំពឹងថានឹងកើនឡើង៥,៣ភាគរយ។
ទោះយ៉ាងណា មន្ត្រី IMF បានកត់សម្គាល់ថា តំបន់អាស៊ីក៏នឹងត្រូវប្រឈមមុខនឹងហានិភ័យនៃការបែងចែកភូមិសាស្ត្រសេដ្ឋកិច្ច ផលប៉ះពាល់នៃបញ្ញាសិប្បនិម្មិត (AI) ផលប៉ះពាល់នៃការប្រែប្រួលអាកាសធាតុជាដើម។
ប្រធាននាយកដ្ឋានអាស៊ី និងប៉ាស៊ីហ្វិករបស់ មូលនិធិរូបិយវត្ថុអន្តរជាតិ រូបនេះដដែលបាន បន្ត ថា ឥទ្ធិពល នៃ ការ បែក បាក់ ភូមិសាស្ត្រ សេដ្ឋកិច្ច នៅ អាស៊ី គឺ មាន ការ ព្រួយ បារម្ភ ជា ពិសេស។ យោងតាមការប៉ាន់ប្រមាណរបស់ IMF មានវិធានការរឹតត្បិតពាណិជ្ជកម្មប្រហែល១០០០ ក្នុងឆ្នាំ២០១៩ ប៉ុន្តែនៅឆ្នាំ២០២៣ ចំនួននេះបានកើនដល់៣០០០។
លោក ស្រ៊ីនីវ៉ាសាន បានជំរុញឱ្យអ្នកបង្កើតគោលនយោបាយ ផ្តោតលើមធ្យោបាយដើម្បីកាត់បន្ថយការរឹតបន្តឹងពាណិជ្ជកម្មទាំងនេះ។ កិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ផ្តល់នូវវេទិកាដ៏ល្អមួយសម្រាប់កិច្ចសន្ទនាបែបនេះ ព្រោះនេះគឺជាក្រុមនៃសេដ្ឋកិច្ចចំនួន២១ប្រទេស មានផ្នែកធំនៃពាណិជ្ជកម្មពិភពលោក។
របាយការណ៍ចុងក្រោយរបស់ WEO បានបង្ហាញថា សេដ្ឋកិច្ចចិនត្រូវបានគេរំពឹងថានឹងកើនឡើង៤,៨ភាគរយនៅឆ្នាំនេះ ធ្លាក់ចុះ០,២ភាគរយពីការព្យាករពីមុន។ ដោយកត់សម្គាល់ថា វិធានការជាច្រើនដែលបានប្រកាសដោយអាជ្ញាធរចិននាពេលថ្មីៗនេះគឺស្របទៅនឹងការផ្ដល់យោបល់របស់ IMF នៅក្នុងរបាយការណ៍ លោក ស្រ៊ីនីវ៉ាសាន បាននិយាយថា នៅតែត្រូវការការគាំទ្រផ្នែកសារពើពន្ធកាន់តែច្រើនពីរដ្ឋាភិបាលកណ្តាលដើម្បីស្តារវិស័យអចលនទ្រព្យឡើងវិញ៕
