លោកជំទាវបណ្ឌិត ជា សេរី៖ ក្រដាស់ប្រាក់២០ម៉ឺនរៀលបោះពុម្ពចំនួនត្រឹមតែ ២០លានសន្លឹកតែប៉ុណ្ណោះ

ភ្នំពេញ៖ លោកជំទាវបណ្ឌិត ជា សេរី ទេសាភិបាល ធនាគារជាតិនៃកម្ពុជាបានបញ្ជាក់ថា ក្រដាស់ប្រាក់២០ម៉ឺនរៀលបានបោះពុម្ពចំនួនត្រឹមតែ២០លានសន្លឹកតែប៉ុណ្ណោះ ដើម្បីអបអរសាទរខួប២០ឆ្នាំនៃការគ្រងព្រះបរមសិរីរាជសម្បត្តិ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។

តាមរយៈវិដេអូឃ្លីប នាថ្ងៃទី១៦ ខែតុលា ឆ្នាំ២០២៤នេះ ដើម្បីពន្យល់ដល់សាធារណជនបន្ថែមទាក់ទងនឹងធនប័ត្រអនុស្សាវរីយ៍ប្រភេទថ្មី ២០០០០០រៀលនេះ លោកជំទាវ ជា សេរី អះអាងថា ការដាក់ឲ្យចរាចរ នូវធនប័ត្រអនុស្សាវរីយ៍ប្រភេទថ្មី ២០០០០០រៀល(២០ម៉ឺនរៀល) នាពេលនេះគឺនឹងមិនធ្វើឲ្យប៉ះពាល់ ដល់រូបិយវត្ថុ និងសេដ្ឋកិច្ចរបស់កម្ពុជានោះឡើយ។

លោកជំទាវបណ្ឌិតបន្តថា នាពេលកន្លងមកមានការព្រួយបារម្ភពីសំណាក់បងប្អូនប្រជាពលរដ្ឋ ពេលដែលធនាគារជាតិនៃកម្ពុជា ដាក់ចេញនូវក្រដាស់ប្រាក់ថ្មីម្តងៗនោះ ថាធនាគារជាតិ ឬរាជរដ្ឋាភិបាលខ្វះលុយជាដើមនោះគឺមិនមែននោះទេ ពោលគឺការដាក់ឲ្យចរាចរនូវក្រដាស់ប្រាក់ថ្មីនេះ គឺគ្រាន់តែជំនួសក្រដាស់ប្រាក់ចាស់ ទក់ រហែក ដែល ធនាគារជាតិបានដកចេញពីចរាចរតែប៉ុណ្ណោះ។

ជាមួយគ្នានេះ លោកជំទាវបណ្ឌិតក៏បានអំពាវនាវដល់បងប្អូនជនរួមជាតិកុំឲ្យមាន ការយល់ច្រឡំ ចំពោះការដាក់ឲ្យចរាចរនូវក្រដាស់ប្រាក់២០ម៉ឺនរៀននេះ ហើយត្រូវរួមគ្នាថែរក្សា និងការពារនូវក្រដាស់ប្រាក់រៀលរបស់ខ្មែរឲ្យបានគ្រប់ៗគ្នាឲ្យបានកាន់តែច្រើនបន្ថែមទៀតផងដែរ៕