នាយករដ្ឋមន្ត្រីចិន លី ឈាង ស្ដីបន្ទោសកងកម្លាំងខាងក្រៅ ចំពោះការជ្រៀតជ្រែកកិច្ចការក្នុងតំបន់
វៀងចន្ទន៍៖ មេដឹកនាំអាស៊ីអាគ្នេយ៍ បានបង្កើនសម្ពាធលើបងធំប្រចាំតំបន់ ចិន ឱ្យគោរពច្បាប់អន្តរជាតិ បន្ទាប់ពីការប៉ះទង្គិចគ្នានៅក្នុងសមុទ្ទចិនខាងត្បូង ដែលមានជម្លោះ ប៉ុន្តែនាយករដ្ឋមន្ត្រីចិន លី ឈាង បានស្ដីបន្ទោសកងកម្លាំងខាងក្រៅ ចំពោះការជ្រៀតជ្រែកក្នុងកិច្ចការតំបន់។
លោក លី បានឆ្លើយតបដោយនិយាយថា សមុទ្ទចិនខាងត្បូង គឺជាផ្ទះរួម ហើយថា ប្រទេសចិន មានកាតព្វកិច្ចការពារអធិបតេយ្យភាពរបស់ខ្លួន។ នេះបើយោងតាមមន្ត្រីអាស៊ានម្នាក់ ដែលបដិសេធមិនបញ្ចេញឈ្មោះ ដោយសារតែភាពរសើបនៃការពិភាក្សា។ ក្រោយមកលោក លី បាននិយាយថា ការជ្រៀតជ្រែកដោយកងកម្លាំងបរទេស កំពុងបង្កើតជម្លោះនៅក្នុងតំបន់។ លោក លី បាននិយាយក្នុងអំឡុងពេលកិច្ចប្រជុំអាស៊ានបូកបី ជាមួយប្រទេសចិន ជប៉ុន និងកូរ៉េខាងត្បូងថា៖«យើងត្រូវតែដឹងថាការអភិវឌ្ឍរបស់យើង ក៏កំពុងប្រឈមមុខនឹងកត្តាមិនស្ថិតស្ថេរ និងមិនច្បាស់លាស់មួយចំនួនផងដែរ។ ជាពិសេស កងកម្លាំងខាងក្រៅតែងតែជ្រៀតជ្រែក ហើយថែមទាំងព្យាយាមណែនាំការប្រឈមមុខដាក់គ្នាក្នុងប្លុក និងជម្លោះភូមិសាស្ត្រនយោបាយទៅក្នុងអាស៊ី»។
លើសពីនោះ លោកសង្កត់ធ្ងន់ថា «យើងទាំងអស់គ្នាឱ្យតម្លៃលើឯករាជ្យភាព និងការពឹងផ្អែកលើខ្លួនឯង។ បញ្ហាទាក់ទងនឹងអាស៊ី គួរតែត្រូវបានដោះស្រាយតាមរយៈការពិភាក្សាក្នុងចំណោមប្រជាជនអាស៊ី និងជោគវាសនារបស់អាស៊ី ត្រូវតែស្ថិតនៅក្នុងដៃរបស់យើងផ្ទាល់»។ លោក លី មិនបានបញ្ចេញឈ្មោះកងកម្លាំងបរទេសនោះទេ ប៉ុន្តែចិនធ្លាប់បានព្រមានសហរដ្ឋអាម៉េរិក កុំឱ្យជ្រៀតជ្រែកក្នុងជម្លោះទឹកដីក្នុងតំបន់។
គួររំឭកថា ម្សិលមិញ លោក លី បានជួបពិភាក្សាជាមួយមេដឹកនាំអាស៊ាន។ កិច្ចប្រជុំរបស់សមាគមប្រជាជាតិ អាស៊ីអាគ្នេយ៍ទាំង១០ ជាមួយ លោក លី បានធ្វើឡើងទន្ទឹមនឹងការប្រឈមមុខដាក់គ្នាដោយហិង្សានាពេលថ្មីៗនេះ នៅសមុទ្ទចិនខាងត្បូង រវាងប្រទេសចិន និងសមាជិកអាស៊ានហ្វីលីពីន និងវៀតណាម។
ក្នុងអំឡុងកិច្ចប្រជុំ ប្រធានាធិបតីហ្វីលីពីន លោក ហ្វឺឌីណាន់ ម៉ាកូស បានអំពាវនាវឱ្យប្រទេសនានា កាត់បន្ថយភាពតានតឹងនៅសមុទ្ទចិនខាងត្បូង។ លោក ម៉ាកូស បានលើកឡើងថា៖«យើងនៅតែបន្តទទួលរងនូវការយាយី និងការគំរាមកំហែង។ ភាគីនានាត្រូវតែបើកចំហដោយស្មោះស្ម័គ្រ ដើម្បីគ្រប់គ្រងភាពខុសគ្នាយ៉ាងយកចិត្តទុកដាក់ និងកាត់បន្ថយភាពតានតឹង»៕
