ឯកឧត្តម អ៊ុំ រាត្រី អញ្ជើញកាត់វិញ្ញាសាប្រឡង នៅវិទ្យាល័យសិរីសោភ័ណ និងជូនពរបេក្ខជនឱ្យទទួលបានលទ្ធផលល្អទាំងអស់គ្នា

បន្ទាយមានជ័យ៖ នៅឆ្នាំ២០២៤នេះ ការប្រឡងសញ្ញាបត្រមធ្យមសិក្សាទុតិយភូមិ នៅក្នុងខេត្តបន្ទាយមានជ័យ មានបេក្ខជនចូលរួមប្រឡងជាង៦ពាន់នាក់ មានមណ្ឌលប្រឡងសរុបមានចំនួន៨ ដែលបែងចែកនៅថ្នាក់វិទ្យាសាស្ត្រ និងថ្នាក់វិទ្យាសាស្ត្រសង្គម។

នៅក្នុងថ្ងៃបើកដំណើរការនៃការប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៤ ព្រឹកថ្ងៃទី០៨ ខែតុលា ឯកឧត្តម អ៊ុំ រាត្រី អភិបាលខេត្ត ក៏បានអញ្ជើញក្នុងការកាត់វិញ្ញាសាប្រឡង នៅវិទ្យាល័យសិរីសោភ័ណ។

ក្នុងឱកាសនោះដែរ ឯកឧត្តម ក៏បានធ្វើការជូនពរទៅដល់ក្មួយៗដែលជាបេក្ខជន ដែលបានចូលរួមប្រឡង ឱ្យទទួលបានលទ្ធផលល្អទាំងអស់គ្នា ដោយត្រូវខិតខំបំពេញនូវកិច្ចការងារប្រកដោយភាពទទួលខុសត្រូវ ពិនិត្យឱ្យបានម៉ត់ចត់ ជាពិសេសបំពេញនូវព័ត៌មានឱ្យបានត្រឹមត្រូវ នៅលេីសន្លឹកកិច្ចការ។ ដោយប្រឹងប្រែងឱ្យអស់ពីលទ្ធភាព អ្នកចេះ គឺជាប់។

លោក ឈូ ប៊ុនរឿង ប្រធានមន្ទីរអបរំ យុវជន និងកីឡាខេត្តបន្ទាយមានជ័យ បានឱ្យដឹងថា ៖ ឆ្នាំ២០២៤ បេក្ខជនចូលរួមប្រឡង៦២៣៥ នាក់/ស្រី៣៥៦៩នាក់ បេីធៀបនឹងឆ្នាំ២០២៣ មានចំនួន៦១៦៨នាក់/ស្រី៣៣៧៧នាក់។ ចំណែកមណ្ឌលប្រឡងមានចំនួន៨មណ្ឌល សរុបចំនួន២៥០បន្ទប់ ចែកចេញជា២ ៖ ថ្នាក់វិទ្យាសាស្រ្ត មាន៣មណ្ឌល មានសាលាបឋមសិក្សា ហ៊ុន សែន សូភី , វិទ្យាល័យ ហ៊ុន សែន ខ្លាកូន និងសាកលវិទ្យាល័យជាតិ មានជ័យ សរុបមានចំនួន៧៤បន្ទប់។ ថ្នាក់វិទ្យាសាស្រ្តសង្គម មាន៥មណ្ឌល មានវិទ្យាល័យ សិរីសោភ័ណ, វិទ្យាល័យ សម្តេច ឪ, សាកលវិទ្យាល័យ UME, វិទ្យាល័យ អូរអំបិល និងអនុវិទ្យាល័យ ទឹកថ្លា សរុបមានចំនួន១៧៦បន្ទប់។ បេីធៀបនឹងឆ្នាំ២០២៣ មានតែចំនួន២៤៧បន្ទប់៕