រដ្ឋបាលខេត្តឧត្តមានជ័យ ណែនាំឱ្យផ្អាកបណ្ដោះអាសន្ននូវអាជីវកម្មថតចម្លងឯកសារ អ៉ីនធើណិត និងអាជីវកម្មពាក់ព័ន្ធផ្សេងទៀត ជុំវិញមណ្ឌលប្រឡងបាក់ឌុប

ភ្នំពេញ៖ រដ្ឋបាលខេត្តឧត្តរមានជ័យ ជូនដំណឹងដល់សាធារណជនទាំងអស់នៅក្នុងខេត្តឧត្តរមានជ័យ មេត្តាជ្រាបថា ក្រសួងអប់រំ យុវជន និងកីឡា នឹងរៀបចំការប្រឡងសញ្ញាបត្រមធ្យមសិក្សាទុតីយភូមិ សម្រាប់ឆ្នាំសិក្សា២០២៣-២០២៤ សម័យប្រឡង ០៨ តុលា ២០២៤ រយៈពេល ០២ថ្ងៃ គឺនៅថ្ងៃអង្គារ ទី០៨ និងថ្ងៃពុធ ទី០៩ ខែតុលា ឆ្នាំ២០២៤ ខាងមុខនេះ។

ក្នុងន័យនេះដើម្បីចូលរួមចំណែកឱ្យដំណើរការប្រឡងសញ្ញាបត្រមធ្យមសិក្សាទុតិយភូមិនៅក្នុងខេត្ត ឧត្តរមានជ័យ ប្រព្រឹត្តទៅដោយរលូន និងជោគជ័យ ជាពិសេសធានារក្សាបាននូវសន្តិសុខ សុវត្ថិភាព សណ្តាប់ធ្នាប់ តម្លាភាព និងរបៀបរៀបរយសាធារណៈនៅជុំវិញមណ្ឌលប្រឡងទាំង ០៣ រួមមាន៖ មណ្ឌលវិទ្យាល័យតេជោ សែន សំរោង មណ្ឌលវិទ្យាល័យ ហ៊ុន សែន ឧត្តរមានជ័យ (ខាងលិច) និងមណ្ឌលវិទ្យាល័យ ហ៊ុន សែន ឧត្តរមានជ័យ (ខាងត្បូង) រដ្ឋបាលខេត្តឧត្តរមានជ័យ សូមជូនដំណឹងដល់បងប្អូនអាជីវករដែលប្រកបរបរអាជីវកម្ម ជុំវិញបរិវេណមណ្ឌលប្រឡងដូចខាងក្រោម៖

១- ផ្អាកជាបណ្ដោះអាសន្នចំពោះទីតាំងអាជីវកម្មថតចម្លងឯកសារ អិនធឺណិត និងអាជីវកម្មលក់សម្ភារៈ សិក្សាគ្រប់ប្រភេទ ចាប់ពីថ្ងៃទី០៨ ដល់ថ្ងៃទី០៩ ខែតុលា ឆ្នាំ២០២៤។

២- ផ្អាកជាបណ្ដោះអាសន្ននូវអាជីវកម្មនានា ដូចជា ភោជនីយដ្ឋាន អាហារដ្ឋាន ការដ្ឋានសំណង់នានា ដែលស្ថិតនៅក្នុង និងជិតបរិវេណមណ្ឌលប្រឡង ចាប់ពីថ្ងៃទី០៨ ដល់ថ្ងៃទី០៩ ខែតុលា ឆ្នាំ២០២៤។

៣- ទីតាំងអាជីវកម្មផ្សេងទៀតដែលស្ថិតនៅជិតបរិវេណមណ្ឌលប្រឡង ហាមបង្កសំឡេងរំខាន ឬសកម្មភាព នានាដែលធ្វើឱ្យប៉ះពាល់ដល់ដំណើរការប្រឡងរបស់បេក្ខជន។

៤- សម្រាប់ការផ្ញើទោចក្រយាន ទោចក្រយានយន្ត (កង់-ម៉ូតូ)នៅមណ្ឌលប្រឡង មិនតម្រូវឱ្យបង់ប្រាក់ឡើយ។ អាស្រ័យហេតុនេះ សូមសាធារណជន និងបងប្អូនអាជីវករទាំងអស់មេត្តាជ្រាប និងយោគយល់ដោយ សេចក្តីអនុគ្រោះ។ បន្ទាប់ពីផុតរយៈពេលនៃការប្រឡងនេះ បងប្អូនអាជីវករទាំងអស់អាចបើកដំណើរការអាជីវកម្មជា ធម្មតាឡើងវិញ។

ទទួលបានសេចក្ដីជូនដំណឹងនេះ នាយករដ្ឋបាលសាលាខេត្ត ស្នងការដ្ឋាននគរបាលខេត្ត បញ្ហាការដ្ឋាន កងរាជអាវុធហត្ថខេត្ត បញ្ជាការដ្ឋានតំបន់ប្រតិបត្តិការសឹករងខេត្ត រដ្ឋបាលក្រុងសំរោង មន្ទីរជំនាញ និងបងប្អូនអាជីវករ ពាក់ព័ន្ធ ត្រូវផ្សព្វផ្សាយនិងអនុវត្តសេចក្តីជូនដំណឹងឱ្យមានប្រសិទ្ធភាព និងប្រកបដោយស្មារតីទទួលខុសត្រូវខ្ពស់៕