គណ:កម្មការទឹ៨នៃរដ្ឋសភា ពិភាក្សាពីកិច្ចប្រជុំពាក់ព័ន្ធនឹងការអនុវត្តផែនការសន្និសីទអន្តរជាតិស្ដីពី ប្រជាជននិងការអភិវឌ្ឍន៍ ICPD 30
ភ្នំពេញ៖ នារសៀលថ្ងៃទី២៧ ខែសីហា ឆ្នាំ២០២៤ គណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារីនៃរដ្ឋសភា (គណៈកម្មការទី៨) ដឹកនាំដោយ លោកជំទាវ ឡោក ខេង ប្រធានគណៈកម្មការ បានអនុញ្ញាតឱ្យលោកស្រី Sandra Bernklau តំណាងនៃអង្គការ UNFPA ប្រចាំនៅកម្ពុជា លោក ម៉ៃ ទុំ តំណាងរងនៃអង្គការ UNFPA ប្រចាំនៅកម្ពុជាចូលជួបពិភាក្សាលើកិច្ចប្រជុំនៅទីក្រុងអូស្លូ នៃប្រទេសNorway នាពេលកន្លងមក និងការអនុវត្តផែនការសន្និសីទអន្តរជាតិស្ដីពី ប្រជាជន និងការអភិវឌ្ឍន៍ ( ICPD 30) នៅវិមានរដ្ឋសភា។
នៅក្នុងជំនួបពិភាក្សាការងារនេះ លោកជំទាវ ឡោក ខេង ប្រធានគណៈកម្មការ បានចែករំលែកអំពីសកម្មភាពការងាររបស់គណៈកម្មការទី៨ ក្នុងនីតិកាលពី៧ លើវិស័យក្រោមបន្ទុករបស់គណៈកម្មការរួមមានវិស័យសុខាភិបាល សង្គមកិច្ច និងយុវនីតិសម្បទា ការងារ និងបណ្ដុះបណ្ដាលវិជ្ជាជីវៈ និងកិច្ចការនារី ព្រមទាំងផ្សារភា្ជប់ជាមួយសកម្មភាពការងាររបស់ CAPPD រួមមានយុវជន ស្រ្ដី និងមនុស្សចាស់ ដែលបច្ចុប្បន្ន លោកជំទាវ ជាអនុប្រធានប្រចាំការផងដែរ។
លោកជំទាវបានបន្តទៀតថា តួនាទីរបស់សភាសំខាន់ណាស់ក្នុងការការពារផលប្រយោជន៍របស់ប្រជាពលរដ្ឋ ដែលស្របតាមគោលនយោបាយរបស់រាជរដ្ឋាភិបាលក្នុងនឺតិកាលទីកាល៧ដឹកនាំដោយសម្តេចបវរធិបតី ហ៊ុន ម៉ាណែត នាយករដ្ឋមន្ត្រី បានយកចិត្តទុកដាក់លើសុខភាព និងជនងាយរងគ្រោះ។ រាជរដ្ឋាភិបាលកម្ពុជាបានពង្រឹងវិស័យសុខាភិបាលនៅតាមមូលដ្ឋាន និងឈានទៅគ្របដណ្តប់សុខភាពជាសកល ដែលបច្ចុប្បន្ននេះគណៈ កម្មការទី៨ បានដាក់ចេញនូវពាក្យស្លោកមួយស្របតាមគោលនយោបាយរបស់រាជរដ្ឋាភិបាលគឺ សុខភាពជាកូនសោរគន្លឹះក្នុងការកាត់បន្ថយភាពក្រីក្រជូនប្រជាពលរដ្ឋ។
ជាកិច្ចឆ្លើយតប លោកស្រី Sandra Bernklau តំណាង UNFPA បានកោតសរសើរ និងស្ញប់ស្ញែងចំពោះសមិទ្ធផល និងការប្ដេជ្ញាចិត្តយ៉ាងមោះមុតរបស់គណៈកម្មការទី៨ និងស.ស.ក.ប្រ.អ។ ក្នុងនោះ តំណាង UNFPA ក៏បានគាំទ្រ និងចូលរួមសហការជាមួយគណៈកម្មការទី៨ ក្នុងការអនុវត្តគំនិតផ្ដួចផ្ដើម និងសកម្មភាពនានាដែលជាចក្ខុវិស័យរួម និងបម្រើឱ្យសុខុមាលភាពរបស់ប្រជាជនកម្ពុជា ជាពិសេសស្រ្ដី យុវជន និងមនុស្សចាស់ ដែលជាកោសិកាដ៏សំខាន់នៃសង្គម ជាពិសេសតាមរយៈការតាមដាន និងជំរុញការអនុវត្តកម្មវិធីសកម្មភាព ICPD ៕
