អាវុធហត្ថចាប់ជនជាតិចិន ៦នាក់ ក្រោយចាក់សម្លាប់ជនជាតិចិនដូចគ្នា នៅចំណុចអគារព្រីនស៍ផ្លាស្សា ក្នុងសង្កាត់ទន្លេបាសាក់
ភ្នំពេញ៖ យ៉ាងហោចណាស់ជនជាតិចិនម្នាក់ បានដេកស្លាប់ក្នុងថ្លុកឈាម ខណៈមនុស្ស៦នាក់ផ្សេងទៀត ត្រូវកងរាជអាវុធហត្ថចាប់ខ្លួនពាក់ព័ន្ធករណីហិង្សារហូតឈានដល់ការប្រើប្រាស់អាវុធមុតស្រួចចាក់សម្លាប់គ្នា បង្កការភ្ញាក់ផ្អើលទាំងកណ្ដាលអធ្រាត្រថ្ងៃទី២៥ ខែកញ្ញា ឆ្នាំ២០២៤ ចំណុចអគារព្រីនស៍ផ្លាស្សា ស្ថិតក្នុងសង្កាត់ទន្លេបាសាក់ ខណ្ឌចំការមន។
យោងតាមប្រភពព័ត៌មានពីកន្លែងកើតហេតុបានឱ្យដឹងថា មុនដំបូងគេឃើញក្រុមជនជនជាតិមួយក្រុមមានគ្នាប្រមាណ៦នាក់ ឈ្លោះប្រកែកគ្នាជាមួយគូទំនាស់ជាចិនដូចគ្នា មួយសន្ទុះក្រោយមកទំនងជាទប់កំហឹងមិនបាន ក៏ធ្វើសកម្មភាពវាយទៅលើជនរងគ្រោះ មិនត្រឹមតែប៉ុណ្ណោះ ថែមទាំងបានយកអាវុធមុតស្រួចចាក់បណ្ដាលឱ្យបុរសរងគ្រោះរងរបួសធ្ងន់ធ្ងរដេកស្លាប់ក្នុងថ្លុកឈាមតែម្ដង។ បន្ទាប់ពីកើតហេតុរួចក្រុមជនដៃដល់បានព្យាយាមរត់គេចខ្លួន ប៉ុន្តែត្រូវប្រជាពលរដ្ឋបានរាយការណ៍ជូនកម្លាំងសមត្ថកិច្ចកងរាជអាវុធហត្ថឃាត់ខ្លួនបានទាន់ពេលវេលា។
ក្រោយកើតហេតុ ក្រុមជនសង្ស័យត្រូវកម្លាំងជំនាញ បញ្ចូនខ្លួនទៅកាន់ការិយាល័យកងរាជអាវុធហត្ថរាជធានីភ្នំពេញ ដើម្បីធ្វើការសាកសួរ ខណៈសពជនរងគ្រោះនៅមិនទាន់ស្គាល់អត្តសញ្ញាណនៅឡើយទេ និងកំពុងរង់ចាំសាច់ញាតិមកទទួល។ ទោះបីជាយ៉ាងណា ជុំវីញករណីឃាតកម្មខាងលើនេះ កម្លាំងកងរាជអាវុធហត្ថនៅមិនអាចទាន់ទម្លាយមូលហេតុពិតប្រាកដនៅពីក្រោយអំពើនៃការចាក់សម្លាប់គ្នានេះបាននៅឡើយទេ ដោយរង់ចាំសាកសួរព័ត៌មានពីជនជាប់ចោទទាំង៦នាក់នោះ។
