សម្តេចធិបតី៖ ការពង្រីកកំពង់ផែខេត្ដព្រះសីហនុនាពេលនេះ នឹងជួយជំរុញសេដ្ឋកិច្ចកម្ពុជានៅគ្រប់ទីកន្លែង

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា ការពង្រីកកំពង់ផែខេត្ដព្រះសីហនុនាពេលនេះ នឹងជួយប្រទេសជាតិមានលំនឹង មានសក្កានុពលនាពេលអនាគត និងអាចមានការប្រកួតប្រជែង ដើម្បីជួយជំរុញសេដ្ឋកិច្ចកម្ពុជានៅគ្រប់ទីកន្លែង។

ក្នុងឱកាសអញ្ជើញសម្ពោធដាក់ឱ្យប្រើប្រាស់ជាផ្លូវការចំណតផែកុងតឺន័របន្ថែម ប្រវែង ២៥៣ម៉ែត្រ របស់កំពង់ផែស្វយ័តក្រុងព្រះសីហនុ នាព្រឹកថ្ងៃទី១២ ខែកញ្ញា ឆ្នាំ២០២៤នេះ សម្តេចធិបតី បានមានប្រសាសន៍ថា ការពង្រីកកំពង់ផែ នឹងធ្វើឱ្យផែរបស់កម្ពុជា អាចមានការប្រកួតប្រជែកជាមួយប្រទេសជិតខាងបាន បន្ទាប់ពីចំណតផែកុងតឺន័របន្ថែមនៅខេត្តព្រះសីហនុ ដែលមានប្រវែង២៥៣ម៉ែត្រនេះ នឹងក្លាយទៅជាជម្រើសបន្ថែមទៀត ក្នុងការទាក់ទាញនាវាដឹកទំនិញធំៗ មកកាន់កម្ពុជាឱ្យបានកាន់តែច្រើន។

សម្តេចធិបតី នាយករដ្ឋមន្ត្រី បានបន្ដថា កំពង់ផែនេះបានដើរតួនាទីយ៉ាងសំខាន់ ដើម្បីអភិវឌ្ឍន៍សេដ្ឋកិច្ចជាតិឱ្យកាន់តែរីកចម្រើនសម្រាប់ចូលរួមលើកកម្ពស់ជីវភាពរបស់ប្រជាពលរដ្ឋ។

ទន្ទឹមនឹងនេះ សម្តេចធិបតី បានបញ្ជាក់ថា រាជរដ្ឋាភិបាលបានកំពុងរៀបចំកំពង់ផែស្វយ័តក្រុងព្រះសីហនុ ឱ្យក្លាយជជាមជ្ឈមណ្ឌល ភស្តុភាកម្មប្រចាំតំបន់ ដើម្បីពង្រឹងមូលដ្ឋានឱ្យរឹងមាំ ធ្វើឱ្យសេដ្ឋកិច្ចមានភាពរីកចម្រើន និងអាចប្រគួតប្រជែកកាន់តែខ្លាំងក្លាបន្ថែមទៀត។ ជាពិសេស រាជរដ្ឋាភិបាល បានបង្កើតឱ្យមានកំពង់ផែកំពង់ទឹកជ្រៅ នៅកំពង់ផែស្វយ័តក្រុងព្រះសីហនុ នេះ។

សម្ដេចធិបតី បានថ្លែងអរគុណចំពោះរដ្ឋាភិបាលជប៉ុន និងប្រជាជនជប៉ុន ដែលបានជួយកសាងសមិទ្ធផលជាច្រើន ដែលបម្រើដល់ផលប្រយោជន៍របស់ប្រជាពលរដ្ឋកម្ពុជាផងដែរ ៕