ប្រធានាធិបតីចិន និងប្រធានាធិតបីរុស្សី ផ្ញើលិខិតអបអរ លោក គីម ជុងអ៊ុន ក្នុងឱកាសខួបនៃការបង្កើតប្រទេសកូរ៉េខាងជើង
បរទេស៖ នៅថ្ងៃចន្ទ ទី៩ ខែកញ្ញា ឆ្នាំ២០២៤នេះ ប្រព័ន្ធផ្សព្វផ្សាយរដ្ឋ KCNA បានរាយការណ៍ថា ប្រធានាធិបតីចិន លោក ស៊ី ជីងពីង និងប្រធានាធិបតីរុស្ស៊ី លោក វ្ល៉ាឌីមៀរ ពូទីន បានផ្ញើលិខិតអបអរទៅកាន់មេដឹកនាំកូរ៉េខាងជើងលោក គីម ជុងអ៊ុន ក្នុងឱកាសខួបនៃការបង្កើតប្រទេសកូរ៉េខាងជើង។
យោងតាម KCNA លោក ពូទីន បានថ្លែងថា លោកប្រាកដថា ភាពជាដៃគូយុទ្ធសាស្ត្រគ្រប់ជ្រុងជ្រោយ រវាងរុស្ស៊ី និងកូរ៉េខាងជើង នឹងត្រូវបានពង្រឹងតាមរបៀបដែលបានគ្រោងទុក ដោយសារកិច្ចខិតខំប្រឹងប្រែងរួមគ្នារបស់យើង។ កូរ៉េខាងជើងមានឈ្មោះពេញថា សាធារណរដ្ឋប្រជាមានិតប្រជាធិបតេយ្យកូរ៉េ និងហៅកាត់ថា DPRK។
KCNA បានរាយការណ៍បន្តថា ចំណែកលោក ស៊ី ជីងពីង បានអំពាវនាវឱ្យមានទំនាក់ទំនងជាយុទ្ធសាស្ត្រ និងកិច្ចសហ-ប្រតិបត្តិការកាន់តែស៊ីជម្រៅជាមួយកូរ៉េខាងជើង នៅក្នុងលិខិតរបស់លោក។
កាលពីឆ្នាំមុន លោក គីម ជុងអ៊ុន បានប្រារព្ធទិវាបង្កើតប្រទេសនៅថ្ងៃទី០៩ ខែកញ្ញា ជាមួយនឹងក្បួនដង្ហែរនៃក្រុមទាហានប៉ារ៉ា និងការផ្លាស់ប្តូរការទូត ដែលលោកបានប្តេជ្ញានឹងធ្វើឱ្យទំនាក់ទំនងកាន់តែស៊ីជម្រៅជាមួយចិន និងរុស្ស៊ី។
