ឯកឧត្តមទេសរដ្ឋមន្ត្រី សក់ សេដ្ឋា ដឹកនាំកិច្ចប្រជុំផ្ដល់ការណែនាំដល់ថ្នាក់ដឹកនាំនៃរដ្ឋបាលរាជធានី ខេត្ត អំពីដំណើរការរៀបចំវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ
ភ្នំពេញ៖ នាពេលព្រឹកថ្ងៃចន្ទ ១៤រោច ខែស្រាពណ៍ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី០២ ខែកញ្ញា ឆ្នាំ២០២៤ នៅទីស្តីការក្រសួងមហាផ្ទៃ ឯកឧត្តម សក់ សេដ្ឋា ទេសរដ្ឋមន្រ្តីទទួលបន្ទុកបេសកកម្មពិសេស អនុប្រធានអចិន្ដ្រៃយ៍ នៃ គ.ជ.អ.ប. និងជាប្រធានក្រុមការងារអន្តរក្រសួង បានអញ្ជើញដឹកនាំកិច្ចប្រជុំផ្តល់ការណែនាំ និងតម្រង់ទិសអំពីដំណើរការនៃការរៀបចំវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ ស្តីពី “កំណែទម្រង់វិមជ្ឈការ និងវិសហមជ្ឈការ ដើម្បីចូលរួមសម្រេចបានចក្ខុវិស័យកម្ពុជាឆ្នាំ២០៥០” ដោយមានការចូលរួមពី ក្រុមការងារអន្តរក្រសួងគាំទ្រដល់ដំណើរការរៀបចំវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិប្រធានក្រុមការងារប្រចាំការ ប្រធានក្រុមប្រឹក្សារាជធានី ខេត្តទាំង២៥ អភិបាលរាជធានី ខេត្តទាំង២៥ អភិបាលរងរាជធានី ខេត្តទាំង២៥ដែលទទួលបន្ទុក នាយករដ្ឋបាលរាជធានី ខេត្ត សរុបចំនួនប្រមាណ ១៤០រូប។
កិច្ចប្រជុំនេះមានរបៀបវារៈសំខាន់ៗដូចខាងក្រោម៖
១.មតិបើកកិច្ចប្រជុំ ឯកឧត្តម សក់ សេដ្ឋា ទេសរដ្ឋមន្រ្តីទទួលបន្ទុកបេសកកម្មពិសេស អនុប្រធានអចិន្ដ្រៃយ៍នៃគ.ជ.អ.ប. និងជាប្រធានក្រុមការងារអន្តរក្រសួង
២.សេចក្តីរាយការណ៍អំពីដំណើរការនៃការរៀបចំវេទិកាវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ
៣. មតិយោបល់ និងការពិភាក្សារួម
៤.មតិណែនាំ និងអនុសាសន៍របស់ ឯកឧត្តម សក់ សេដ្ឋា ទេសរដ្ឋមន្រ្តីទទួលបន្ទុកបេសកកម្មពិសេស អនុប្រធានអចិន្ដ្រៃយ៍នៃគ.ជ.អ.ប. និងជាប្រធានក្រុមការងារអន្តរក្រសួង។
គួរបញ្ជាក់ដែរថាកិច្ចការសំខាន់ៗសម្រាប់ត្រៀមរៀបចំវេទិកានៅថ្នាក់រាជធានី ខេត្ត មានដូចខាងក្រោម៖
១.បូកសរុបរបាយការណ៍របស់រដ្ឋបាលក្រុង ស្រុក ខណ្ឌ និងរៀបចំរបាយការណ៍របស់ខ្លួនសម្រាប់ដាក់ជូនវេទិកាថ្នាក់រាជធានី ខេត្ត
២.កំណត់ទីកន្លែង កាលបរិច្ឆេទ និងសមាសភាពអ្នកចូលរួមជាក់លាក់ (ព្រមទាំងចម្លងជូនក្រុមការងារប្រចាំការ)
៣.កំណត់យករដ្ឋបាលឃុំ សង្កាត់ ក្រុង ស្រុក ខណ្ឌ មន្ទីរ និងស្ថាប័នពាក់ព័ន្ធដែលត្រូវធ្វើបទអន្តរាគមន៍ ឬបទបង្ហាញនៅក្នុងវេទិកា
៤.បន្ទាប់ពីរៀបចំវេទិការួច អភិបាលរាជធានី ខេត្តត្រូវរៀបចំចាត់ចែងបូកសរុបជារបាយការណ៍ស្តីពីលទ្ធផលនៃវេទិកា ដោយកំណត់ឱ្យ បានច្បាស់លាស់នូវបញ្ហាប្រឈមដែលត្រូវដោះស្រាយដោយរដ្ឋបាលថ្នាក់ក្រោមជាតិតាមថ្នាក់នីមួយៗ និងបញ្ហាប្រឈមដែលត្រូវ ស្នើសុំការអន្តរាគមន៍ដោះស្រាយដោយថ្នាក់ជាតិ
៥.ខេត្តកំពតគឺជាខេត្តដែលត្រូវរៀបចំវេទិកានេះមុនគេ ដោយមានការចូលរួមដកស្រង់បទពិសោធន៍ពីថ្នាក់ដឹកនាំរាជធានី ខេត្ត ដទៃទៀត។ បន្ទាប់ពីវេទិកាខេត្តកំពត រដ្ឋបាលរាជធានី ខេត្តផ្សេងទៀតអាចរៀបចំវេទិកានេះរហូតដល់ដំណាច់ខែតុលា ឆ្នាំ២០២៤ ដើម្បីធានាដល់ក្របខណ្ឌពេល វេលាសម្រាប់ការរៀបចំវេទិកានៅថ្នាក់ជាតិនៅចុងឆ្នាំ២០២៤ ឬដើមឆ្នាំ២០២៥ ៕
