ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២២ ខែសីហា ឆ្នាំ២០២៤ បានទទួលជួបសម្តែងការគួរសម និងសំណេះសំណាលការងារជាមួយសមាគមអតីតកម្មសិក្សាការី JICA-AC ដោយមានការចូលរួមពី ឯកឧត្តម លោកជំទាវ ថ្នាក់ដឹកនាំ និងមន្ត្រីមកពីនាយកដ្ឋានពាក់ព័ន្ធ។
ជាកិច្ចចាប់ផ្តើម ភាគីសមាគម បានណែនាំពីសមាសភាពថ្មីដែលទើបតែងតាំង និងរាយការណ៍ជូន ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី អំពីវឌ្ឍនភាព សកម្មភាពការងាររបស់សមាគមនាពេលកន្លងមក ។ ឆ្លៀតក្នុងឱកាសនេះដែរ ប្រធានសមាគម បានថ្លែងអំណរគុណដល់ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ដែលបានឈរឈ្មោះជាប្រធានកិត្តិយសសមាគមអតីតកម្មសិក្សាការី JICA-AC ក្នុងរយៈពេល២ អាណត្តិមកនេះ។
តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណចំពោះការខិតខំប្រឹងប្រែង និងការប្តេជ្ញាចិត្តរបស់សមាគមក្នុងការចូលរួមលើកកម្ពស់ចំណេះដឹង និងរួមចំណែកក្នុងការអភវិឌ្ឍសង្គមជាតិ។
ទន្ទឹមនឹងនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានលើកឡើងថា ជប៉ុនគឺជាដៃគូអភិវឌ្ឍដ៏សំខាន់របស់កម្ពុជា លើគ្រប់វិស័យ ដោយបានផ្តល់ជំនួយគាំទ្រកម្ពុជាលើការអភិវឌ្ឍហេដ្ឋារចនាសម័្ពន្ធ បណ្តុះបណ្តាលធនធានមនុស្សដែលក្នុងនោះរួមមានអាហារូបករណ៍ កម្មសិក្សា និងវគ្គបណ្តុះបណ្តាលជាច្រើន ការសាងសង់សាលារៀន មន្ទីរពេទ្យ និងបានដើរតួនាទីយ៉ាងសំខាន់ក្នុងការសម្របសម្រួលជាសកលដើម្បីស្វែងរកសន្តិភាពជូនកម្ពុជា។
ក្នុងឱកាសនេះដែរ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្តល់អនុសាសន៍ ឱ្យសមាគមបន្តខិតខំប្រឹងប្រែងចូលរួមចំណែកក្នុងការអភិវឌ្ឍប្រទេសជាតិ និងបន្ថែមការយកចិត្តទុកដាក់លើការផ្សព្វផ្សាយអំពីសមិទ្ធផលថ្មីៗនៃការអភិវឌ្ឍរបស់កម្ពុជា ជាពិសេសគោលនយោបាយអភិវឌ្ឍន៍សេដ្ឋកិច្ចសង្កមជាតិ របស់រាជរដ្ឋាភិបាលអាណត្តិទី៧ នៃរដ្ឋសភាព ក្រោមការដឹកនាំរបស់ សម្តេចមហាបវរធិបតី នាយករដ្ឋមន្ត្រី និងភាពចាំបាច់ក្នុងការរក្សាឱ្យបាននូវសុខសន្តិភាពស្ថិរភាពសង្គម ដើម្បីឈានទៅសម្រេចនូវគោលដៅអភិវឌ្ឍន៍ប្រកបដោយចីរភាពឆ្លើយតបទៅនឹងចក្ខុវិស័យកម្ពុជា ២០៥០។
គួរបញ្ជាប់ដែរថា សមាគមអតីតកម្មសិក្សាការី JICA-AC ត្រូវបានបង្កើតឡើង ដើម្បីប្រមូលផ្ដុំនូវនិស្សិតបញ្ញវន្តដែលបានទៅសិក្សានៅប្រទេសជប៉ុន ទាំងរយៈពេលវែង និងខ្លី ដែលវិលត្រលប់មកមាតុប្រទេសវិញដើម្បីចូលរួមជួយបម្រើផលប្រយោជន៍សង្គមជាតិ ក៏ដូចជាចែករំលែកបទពិសោធន៍ ចំណេះដឹង រវាងអ្នកទៅរៀនមុន និងអ្នកជំនាន់ក្រោយៗទៀត តាមរយៈការផ្តល់នូវវគ្គបណ្តុះបណ្តាលក្នុងស្រុក និងក្រៅស្រុក លើគ្រប់វិស័យ។ ក្នុងឆ្នាំនេះ សមាគមនគ្រោងនឹងធ្វើសិក្ខាសាលា ស្តីពីការការពារជំងឺទឹកនោមផ្អែមនៅខេត្តបាត់ដំបង និងកម្មវិធីសប្បុរសធម៌ “កែលម្អអគារសិក្សា ១ខ្នងនៅខេត្តព្រៃវែង” ក្រោមជំនួយឧបត្ថម្ភរបស់សប្បុរសជន និងសមាគម៕
