ប្រធានរដ្ឋសភា ផ្តល់អនុសាសន៍ ៦ចំនុចដល់អគ្គលេខាធិការដ្ឋានរដ្ឋសភា ដើម្បីសម្រេចបានគោលដៅ កំណែទម្រង់កាន់តែស៊ីជម្រៅ លើកកម្ពស់អភិបាលកិច្ចល្អ និងការអភិវឌ្ឍស្ថាប័នជាសភាឌីជីថល

ភ្នំពេញ៖ មានប្រសាសន៍នៅពេលអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីបិទកិច្ចប្រជុំបូកសរុបលទ្ធផលការងារមួយឆ្នាំ និងការលើកទិសដៅការងារបន្ត របស់អគ្គលេខាធិការដ្ឋានរដ្ឋសភា នៅដើមនីតិកាលទី៧ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា បានលើកទឹកចិត្តនិងជំរុញដល់អគ្គលេខាធិការដ្ឋានរដ្ឋសភាបន្តយកចិត្តទុកដាក់ ដើម្បីប្រើប្រាស់ឱ្យអស់សក្តានុពលរបស់ខ្លួន ក្នុងការបំពេញបេសកកម្មដ៏ឧត្តុង្គឧត្តមនេះ ជាពិសេសធ្វើយ៉ាងណាឱ្យសម្រេចបានគោលនយោបាយគន្លឹះជាអាទិភាពរបស់រដ្ឋសភា ដែលសម្តេចរដ្ឋសភាធិបតីបានដាក់ចេញកាលពីដើមនីតិកាល គឺ អភិបាលកិច្ចល្អ កំណែទម្រង់ស៊ីជម្រៅ និងការប្រែក្លាយជាសភាឌីជីថល ដើម្បីគំាទ្រដល់ការងាររបស់តំណាងរាស្រ្ត នៅក្នុងការបំពេញតូនាទីរបស់ខ្លួន បម្រើប្រជាពលរដ្ឋ។

ដើម្បីសម្រេចបាននូវគោលដៅនេះ សម្តេចប្រធានរដ្ឋសភា បានផ្តល់នូវអនុសាសន៍គន្លឹះមួយចំនួន ដល់អគ្គលេខាធិការដ្ឋានរដ្ឋសភា យកទៅអនុវត្តបន្ត ដើម្បីកសាងស្នាដៃថ្មីៗបន្តទៀត ដោយអនុវត្តយ៉ាងខ្ជាប់ខ្ជួននូវគោលការណ៍ និងសេចក្តីសម្រេចនានា ពាក់ព័ន្ធនឹងការកែទម្រង់ស្ថាប័ន និងអភិបាលកិច្ចល្អ សំដៅឈានទៅសម្រេចបានគោលដៅពង្រឹង និងលើកកម្ពស់ស្ថាប័នរដ្ឋសភា រួមចំណែកដល់ការអភិវឌ្ឍប្រទេសកម្ពុជាឱ្យកាន់តែរីកចម្រើន ជឿនលឿនប្រកបដោយបរិយាបន្ន និងចីរភាព។

សូមជម្រាបថា អគ្គលេខាធិការដ្ឋានរដ្ឋសភា បានរៀបចំកិច្ចប្រជុំបូកសរុបលទ្ធផលការងារប្រចាំឆ្នាំនិងការលើកទិសដៅបន្តសម្រាប់អនុវត្តបន្ត កាលពីព្រឹកថ្ងៃទី២២ ខែសីហាឆ្នាំ២០២៤។ កិច្ចប្រជុំនេះ បានធ្វើឡើងចំពេលដែលរដ្ឋសភា នីតិកាលទី៧ មានអាយុកាលគម្រប់មួយឆ្នាំគត់។
អគ្គលេខាធិការដ្ឋានរដ្ឋសភា ជាសេនាធិការសំខាន់របស់រដ្ឋសភាដែលមានតួនាទីផ្តល់សេវានិងបច្ចេកទេសជូនសមាជិក សមាជិការដ្ឋសភា ក្នុងការបំពេញតួនាទីបម្រើប្រជាពលរដ្ឋ លើការងារស្នូលសំខាន់ៗរបស់ខ្លួន មានជាអាទិ៍ ការងារនីតិកម្ម ការងារតាមដានត្រួតពិនិត្យការអនុវត្តច្បាប់ ភាពជាតំណាងប្រជាពលរដ្ឋ និងការងារការទូតសភា។

សម្តេចប្រធានរដ្ឋសភា បានស្នើដល់ថ្នាក់ដឹកនាំ អគ្គលេខាធិការដ្ឋាន បន្តដឹកនាំ និងជំរុញមន្រ្តីក្រោមឱវាទឱ្យមានការចូលរួមអនុវត្តការងារឱ្យបានសកម្ម និងផុលផុសប្រកបដោយស្មារតីសាមគ្គីភាព និងទំនួលខុសត្រូវ ហើយចៀសវាងចេតនា «ដុតឱ្យខ្លោចរោចឱ្យឆៅ» និងត្រូវបើកចិត្តឱ្យទូលាយធ្វើការរួមគ្នា ដោយគប្បីមិនត្រូវមានជំងឺតួឯក ឬយកប្រយោជន៍សួនតួជាធំ នោះទេ។ ត្រូវប្រកាន់ខ្ជាប់ នូវគោលការណ៍គុណាធិបតេយ្យ ដោយកំណត់ឱ្យឃើញ និងផ្តល់ការលើកទឹកចិត្តដល់មន្រ្តីដែលមានស្នាដៃ។ ត្រូវពង្រឹងបន្ថែមទៀត នូវក្រុមប្រឹក្សាវិន័យ ដើម្បីអនុវត្តគុណតម្លៃ និងគោលការណ៍ស្នូល របស់ស្ថាប័នឱ្យមានលក្ខណៈត្រឹមត្រូវយុត្តិធម៌ និងគោលដៅជាក់លាក់។ បន្តជំរុញ និងពន្លឿនការកែទម្រង់ស្ថាប័ន ជាពិសេស ជំរុញការប្រើប្រាស់ប្រព័ន្ធបច្ចេកវិទ្យាព័ត៌មាន និងឌីជីថល សំដៅប្រែក្លាយរដ្ឋសភាកម្ពុជា ជាសភាឌីជីថល ហើយមន្រ្តីម្នាក់ៗក៏នឹងត្រូវមានសមត្ថភាព ចំណេះដឹងក្នុងការប្រើប្រាស់ប្រព័ន្ធទាំងនោះ។ បន្តជំរុញ និងលើកកម្ពស់អភិបាលកិច្ចល្អ និងទំនើបកម្មស្ថាប័ន ដោយផ្តោតលើការអភិវឌ្ឍធនធានមនុស្សមានសមត្ថភាព និងកំណែទម្រង់ហិរញ្ញវត្ថុសាធារណៈ ស្របតាមកាលៈទេសៈនៃបរិបទថ្មីសព្វថ្ងៃ សំដៅធានាឱ្យបាន នូវការចូលរួមប្រកបដោយបរិយាបន្ន សមភាព តម្លាភាព និងគណនេយ្យភាព ជាដើម។

សម្តេចប្រធានរដ្ឋសភា បានលើកទឹកចិត្តឱ្យអគ្គលេខាធិការដ្ឋាន អនុវត្តកិច្ចប្រជុំបូកសរុបលទ្ធផលការងារនេះ ជារៀងរាល់ឆ្នាំ ដើម្បីធ្វើការបូកសរុប និងវាយតម្លៃនូវរាល់គម្រោង និងសកម្មភាពដែលបានអនុវត្តនិងមានផែនការច្បាស់លាស់ក្នុងការអនុវត្តបន្ត៕