ហ្សេរុយសាឡឹម៖ ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី១៩ ខែសីហា ឆ្នាំ២០២៤ថា អ៊ីស្រាអែលបានទទួលយកសំណើថ្មី មួយសម្រាប់បទឈប់បាញ់នៅតំបន់ហ្គាហ្សា និងការដោះលែងចំណាប់ខ្មាំង នេះបើតាមរដ្ឋមន្ត្រីការបរទេសអាមេរិក លោក Antony Blinken បានបញ្ជាក់កាលពីថ្ងៃចន្ទ បន្ទាប់ពីកិច្ចប្រជុំជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu។
ក្នុងអំឡុងសន្និសីទសារព័ត៌មាននៅទីក្រុង Tel Aviv លោក Blinken បានឲ្យដឹងថា លោក Netanyahu បានអះអាងថាអ៊ីស្រាអែលយល់ព្រម នូវសំណើថ្មីដែលគាំទ្រដោយសហរដ្ឋអាមេរិក។ សំណើនេះត្រូវបានបង្ហាញដល់អ៊ីស្រាអែល និងក្រុមហាម៉ាសដោយអ្នកសម្របសម្រួលកាតា អេហ្ស៊ីប និងសហរដ្ឋអាមេរិកកាលពីចុងសប្តាហ៍។
លោក Blinken បានជំរុញឱ្យក្រុមហាម៉ាស់យល់ព្រមលើសំណើស្ពាន ដោយសង្កត់ធ្ងន់លើភាពបន្ទាន់នៃការដោះស្រាយទុក្ខលំបាកនៅតំបន់ហ្គាហ្សា ដែលជាកន្លែងដែលមនុស្សជាង ៤០,០០០នាក់ត្រូវបានសម្លាប់នៅក្នុងការវាយលុករបស់អ៊ីស្រាអែល ហើយតម្រូវការក្នុងការដោះលែងចំណាប់ខ្មាំងដែលនៅតែត្រូវបានក្រុមហាម៉ាស់កាន់កាប់។
លោក Blinken បានទៅបំពេញទស្សនកិច្ចនៅអ៊ីស្រាអែល ចំពេលមានកិច្ចខិតខំប្រឹងប្រែងបន្តដើម្បីទទួលបានបទឈប់បាញ់ជាថ្នូរនឹងការដោះលែងចំណាប់ខ្មាំងអ៊ីស្រាអែល និងអ្នកទោសប៉ាឡេស្ទីន មុនពេលធ្វើដំណើរទៅកាន់ប្រទេសអេហ្ស៊ីប និងកាតា ដែលជាអ្នកសម្រុះសម្រួលដ៏សំខាន់ក្នុងការចរចា។
នាយករដ្ឋមន្ត្រីអ៊ីស្រាអែល បានឲ្យដឹងថា សហរដ្ឋអាមេរិក បានបង្ហាញការយល់ដឹងចំពោះតម្រូវការសន្តិសុខដ៏សំខាន់របស់យើង ចំពេលមានកិច្ចខិតខំប្រឹងប្រែងរួមគ្នាដើម្បីដោះលែងចំណាប់ខ្មាំងរបស់យើង។
ហាម៉ាសពីមុនបានច្រានចោលសំណើរស្ពាននេះ ដោយអះអាងថា វាសមស្របនឹងការទាមទាររបស់អ៊ីស្រាអែលពេក ជាពិសេសទាក់ទងនឹងការទទូចរបស់អ៊ីស្រាអែលលើការរក្សាកងកម្លាំងយោធានៅក្នុងក្របខណ្ឌប៉ាឡេស្ទីន ហើយបានចោទប្រកាន់អ៊ីស្រាអែលថាបានណែនាំការទាមទារថ្មី។
