៦ខែឆ្នាំនេះ អគ្គនាយកដ្ឋានរដ្ឋបាល បានតាមដាន និងគាំទ្ររដ្ឋបាលខេត្តជាប់ព្រំដែនថៃ និងឡាវ ក្នុងការផ្តល់សេវាប័ណ្ណព្រំដែនជូនពលរដ្ឋប្រើប្រាស់ចំនួន ៩១.៨៨៦ក្បាល
ភ្នំពេញ៖ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ បានថ្លែងឲ្យដឹងថា ក្នុងរយៈពេល៦ខែកន្លងមកនេះ អគ្គនាយកដ្ឋានរដ្ឋបាល បានតាមដាន និងគាំទ្ររដ្ឋបាលខេត្តជាប់ព្រំដែនថៃ និងឡាវក្នុងការផ្តល់សេវាប័ណ្ណព្រំដែនជូនប្រជាពលរដ្ឋប្រើប្រាស់សរុបចំនួន ៩១.៨៨៦ក្បាល ក្នុងនោះ រដ្ឋបាលក្រុង ស្រុកនៃខេត្តជាប់ព្រំដែនកម្ពុជា-ថៃ បានចេញប័ណ្ណជូនប្រជាពលរដ្ឋសរុបចំនួន ១០.១៧២ក្បាល ។
ក្នុងឱកាសអញ្ជើញផ្ដល់កិច្ចសម្ភាសន៍ ស្ដីពី «វឌ្ឍនភាពការងាររបស់ អគ្គនាយកដ្ឋានរដ្ឋបាល ក្រសួងមហាផ្ទៃ» នាថ្ងៃទី១២ ខែសីហា ឆ្នាំ២០២៤នេះ ឯកឧត្ដម សួស ប្រាថ្នា បានមានប្រសាសន៍ឲ្យដឹងថា បច្ចុប្បន្ន ព្រះរាជាណាចក្រកម្ពុជាមានច្រកទ្វារសរុបចំនួន៨២ច្រក ក្នុងនោះច្រកទ្វារអន្តរជាតិមានចំនួន ១៦ និងច្រកទ្វារព្រំដែនចំនួន៦៦។ ក្នុងចំណោមច្រកទ្វារអន្តរជាតិចំនួន១៦ មានអាកាសយានដ្ឋាន អន្តរជាតិចំនួន៣ កំពង់ផែអន្តរជាតិចំនួន៤ និងកំពង់ផែ សមុទ្រចំនួន៩។ ដោយឡែកច្រកទ្វារព្រំដែនចំនួន៦៦ ដែលស្ថិតនៅតាមព្រំដែនរវាងព្រះ-រាជាណាចក្រកម្ពុជា និងប្រទេសជិតខាងរួមមាន៖ ច្រកទ្វារ ព្រំដែនអន្តរជាតិចំនួន២៦ ច្រកទ្វារព្រំដែនទ្វេភាគីចំនួន១៤ និងច្រកទ្វារតំបន់ព្រំដែនចំនួន២៦។
ឯកឧត្ដមបានលើកឡើងថា ដើម្បីលើកកម្ពស់ប្រសិទ្ធភាព និងបង្ខិតការផ្តល់សេវាប័ណ្ណព្រំដែនកម្ពុជា-ថៃ បានឆាប់រហ័ស ងាយស្រួល និងកាត់បន្ថយបន្ទុកចំណាយរបស់ប្រជាពលរដ្ឋ អគ្គនាយកដ្ឋានរដ្ឋបាលបានខិតខំ អនុវត្តតាមស្មារតីនៃសេចក្តីសម្រេចលេខ ១៨៧ សសរ ចុះថ្ងៃទី២២ ខែវិច្ឆិកា ឆ្នាំ២០២៣ របស់រាជរដ្ឋាភិបាលស្ដីពីការអនុវត្តសាកល្បងការផ្តល់សេវាប័ណ្ណព្រំដែនកម្ពុជា-ថៃ នៅរដ្ឋបាលក្រុង ស្រុកនៃខេត្តជាប់ព្រំដែនជាមួយព្រះរាជាណាចក្រថៃ ដែលត្រូវចាប់ផ្តើមអនុវត្តនៅក្នុងខែមករា ឆ្នាំ២០២៤។
ឯកឧត្ដម សួស ប្រាថ្នា បន្ថែមថា ទន្ទឹមនេះ អគ្គនាយកដ្ឋានរដ្ឋបាល ក៏បានសម្របសម្រួលជាមួយភាគីថៃដើម្បីពង្រីកវិសាលភាពនៃការប្រើប្រាស់ប័ណ្ណព្រំដែននេះផងដែរ ដោយអនុញ្ញាតឱ្យអ្នកកាន់ប័ណ្ណព្រំដែនថៃអាចធ្វើដំណើរចូលមកទឹកដីកម្ពុជារហូតដល់ខេត្តសៀមរាប ក្នុងគោលដៅទេសចរណ៍។ ដើម្បីគាំទ្រដល់ការងារនេះ អគ្គនាយកដ្ឋានរដ្ឋបាលបានអនុវត្តនូវកិច្ចការសំខាន់ៗ មួយចំនួនដូចខាងក្រោម៖
-បានធ្វើការផ្សព្វផ្សាយ និងណែនាំអនុវត្តនូវសេចក្តីសម្រេចរបស់រាជរដ្ឋាភិបាលខាងលើដល់រដ្ឋបាលខេត្ត និងរដ្ឋបាលក្រុង ស្រុកជាប់ព្រំដែនពាក់ព័ន្ធ
-បានបណ្តុះបណ្តាលដល់មន្រ្តីរដ្ឋបាលក្រុង ស្រុកនៃខេត្តជាប់ព្រំដែនថៃ នៅក្នុងការ ផ្តល់សេវាបណ័្ណព្រំដែនជូនប្រជាពលរដ្ឋ ព្រមទាំងបំពាក់ឧបករណ៍បោះពុម្ព និងបង្រៀនពីវិធីបោះពុម្ពលើប័ណ្ណព្រំដែន
-បានធ្វើការបណ្តុះបណ្ដាលដល់មន្ត្រីអង្គភាពច្រកចេញចូលតែមួយរបស់រដ្ឋបាលខេត្តបន្ទាយមានជ័យ និងខេត្តបាត់ដំបង អំពីការបោះពុម្ព QR Code លើប័ណ្ណព្រំដែនកម្ពុជា-ថៃ
-បានសម្របសម្រួលកិច្ចការមួយចំនួន ដើម្បីដាក់ឱ្យដំណើរការនូវការប្រើប្រាស់ប្រព័ន្ធ QR Code សម្រាប់ប្រជាពលរដ្ឋដែលប្រើប្រាស់ប័ណ្ណព្រំដែនកម្ពុជា-ថៃ ធ្វើដំណើរចេញចូលឆ្លងកាត់ ព្រំដែនអន្តរជាតិប៉ោយប៉ែត។
ជាមួយគ្នានោះឯកឧត្ដមបញ្ជាក់ថា អគ្គនាយកដ្ឋានរដ្ឋបាលបានដឹកនាំក្រុមការងារបច្ចេកទេសនាំមុខកម្ពុជាចុះត្រួតពិនិត្យរួមគ្នាជាមួយក្រុមនាំមុខវៀតណាមនៅលើទីតាំងជាក់ស្តែង ព្រមទាំងជួបពិភាក្សាជាមួយក្រុមនាំមុខភាគីវៀតណាម ពិភាក្សារៀបចំខ្លឹមសារសេចក្តីព្រាងកំណត់ហេតុកិច្ចប្រជុំលើកទី២ របស់ក្រុមការងារចំរុះកម្ពុជា-វៀតណាម ដើម្បីដោះស្រាយបញ្ហាបាក់ច្រាំងទន្លេបាសាក់-ទន្លេហ៊ូវ និងព្រែកជ្រៃធំ-ព្រែកប៊ិញយី ដែលបានប្រព្រឹត្តទៅកាលពីថ្ងៃទី៩-១០ ខែមិថុនា ឆ្នាំ២០២៤ នៅទីស្តីការក្រសួងមហាផ្ទៃ ៕
