ឧបនាយករដ្ឋមន្ត្រី ហង់ជួន ណារ៉ុន អញ្ជើញបំពេញទស្សនកិច្ចនៅវិទ្យាល័យទួលទំពូង ដើម្បីពិនិត្យវឌ្ឍនភាពការងារអប់រំ និងជំរុញការអនុវត្តស្តង់ដាសាលារៀនគំរូ

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា នាថ្ងៃទី៧ ខែសីហា ឆ្នាំ ២០២៤ បានដឹកនាំក្រុមការងារទស្សនកិច្ច ពិនិត្យវឌ្ឍនភាពការងារអប់រំ ជំរុញការអនុវត្តស្តង់ដាសាលារៀនគំរូ នៅវិទ្យាល័យវិទ្យាល័យទួលទំពូង ដោយមានការចូលរួមពីសំណាក់ ឯកឧត្ដម លោកជំទាវថ្នាក់ដឹកនាំក្រសួង លោក លោកស្រី មន្ត្រីពាក់ព័ន្ធក្រោមឱវាទ គណៈគ្រប់គ្រងសាលា លោកគ្រូ អ្នកគ្រូ មាតាបិតា អ្នកអាណាព្យាបាល តំណាងសហគមន៍ និងអាជ្ញាធរដែនដី សរុបប្រមាណ ១៥០នាក់។

មានប្រសាសន៍ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានបញ្ជាក់ ពីគោលបំណងសំខាន់មួយទៀត នៃការជួបសំណេះសំណាលជាមួយលោកគ្រូអ្នកគ្រូនៅថ្ងៃនេះ គឺដើម្បីពិនិត្យពិភាក្សាផ្លាស់ប្តូរយោបល់ រកឱ្យឃើញនូវឫសគល់នៃបញ្ហាដែលធ្វើឱ្យសាលាមានអត្រាសិស្សប្រឡងជាប់មធ្យមសិក្សាទុតិយភូមិនៅទាបជាងអត្រាថ្នាក់ជាតិ ដើម្បីរកដំណោះស្រាយឆ្លើយតបឱ្យមានប្រសិទ្ធភាពខ្ពស់ ឈានទៅលើកកម្ពស់លទ្ធផលសិក្សាសិស្ស និងបង្កើនអត្រាសិស្សប្រឡងជាប់ ខណៈថ្ងៃប្រឡងមធ្យមសិក្សាទុតិយភូមិកំពុងខិតចូលរមកដល់ និងបានបំផុសលើកទឹកចិត្តឱ្យលោកគ្រូ អ្នកគ្រូទាំងអស់ឱ្យចូលរួមចែករំលែកការយល់ឃើញ និងបញ្ហាប្រឈមនានា ដើម្បីកែលម្អការរៀន និងបង្រៀន ក៏ដូចជាដើម្បីអាចឱ្យក្រសួងចាត់វិធានការ ឬក្រុមការងារជំនាញឆ្លើយតបឱ្យទាន់ពេលវេលា និងចំគោលដៅ។

ទន្ទឹមនឹងនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានរំលឹកដល់វិធានគន្លឹះដើម្បីជំរុញវិស័យអប់រំចំនួន ៤ ដែលបានដាក់ចេញដោយសម្តេចមហាបវរធិបតី នាយករដ្ឋមន្ត្រី រួមមាន៖ (១). ការពង្រឹងអភិបាលកិច្ចសាលារៀន, (២). ការអនុវត្តសកម្មភាពក្រៅម៉ោងសិក្សាឱ្យស្របទៅតាមតម្រូវការ ក្នុងការពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស, (៣). ការយកចិត្តទុកដាក់លើសុខភាពរបស់សិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលា, និង (៤). ការជំរុញ និងលើកទឹកចិត្តការចូលរួមរបស់មាតាបិតា អ្នកអាណាព្យាបាល និងសហ គមន៍ក្នុងការអប់រំ ស្របតាមពាក្យស្លោក ភាពជាដៃគូរដ្ឋ និងសហគមន៍ដើម្បីការអប់រំ។ វិធានគន្លឹះទាំង ៤នេះ ត្រូវបានបញ្ជ្រាបក្នុងស្តង់ដាសាលាគំរូ ទាំង ៥ ដែលរួមមាន៖ ស្តង់ដា(ទី១).លទ្ធផលសិក្សារបស់សិស្ស, ស្តង់ដា(ទី២). ការបង្រៀននិងរៀន, ស្តង់ដា(ទី៣).ការចូលរួមរបស់សហគមន៍, ស្តង់ដា (ទី៤). ដំណើរការប្រតិបត្តិនិងរដ្ឋបាលសិក្សា និង ស្តង់ដា(ទី៥).គណនេយ្យភាពសាលារៀន។

ដើម្បីលើកកម្ពស់លទ្ធផលសិក្សាសិស្ស ជំរុញឱ្យមានកំណើនអត្រាសិស្សប្រឡងជាប់ ឈានទៅសម្រេចគោលដៅប្រែក្លាយជាសាលារៀនគំរូ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្តល់អនុសាសន៍គន្លឹះមួយចំនួនដូចជា៖
– ត្រូវបង្កើនម៉ោងសិក្សា ឈរលើមូលដ្ឋាន “រៀនច្រើន ចេះច្រើន” ជាពិសេសត្រូវបន្តបង្រៀនបំប៉នសិស្សដែលកំពុងត្រៀមប្រឡងមធ្យមសិក្សាទុតិយភូមិ រហូតដល់ថ្ងៃប្រឡងពង្រឹងវិន័យ ។
– ពង្រឹងការអនុវត្តវិន័យ អាកប្បកិរិយា សីលធមី ពង្រឹងវត្តមានសិស្ស ពិនិត្យលើការដាក់ពិន្ទុលើអត្តចរិក ដោយមានការលើកទឹកចិត្តចំពោះសិស្សដែលឧស្សាហ៍ព្យាយាមរៀនសូត្រ
– ជាគន្លឹះសូមលើកទឹកចិត្តឱ្យបង្រៀនបន្ថែមម៉ោង ដើម្បីឱ្យសិស្សអាចរៀនពេញមួយថ្ងៃ ទន្ទឹមនឹងការប ង្រៀនក្នុងម៉ោង ឱ្យពេញលេញផងដែរ។ ការរៀនពេញមួយថ្ងៃ នឹងជួយពង្រឹងគុណភាពអប់រំ ដោយបង្កើនម៉ោងសិក្សា និងបន្ថែមសកម្មភាពក្រៅម៉ោងសិក្សាសម្រាប់សិស្ស និងគ្រូ ដោយប្រើប្រាស់ធនធានសម្ភារៈសាលារៀន និងម៉ោងសិក្សាឱ្យអស់លទ្ធភាព ក៏ដូចជាកៀរគរមាតាបិតា អ្នកអាណាព្យាបាល និងសហគមន៍ ឱ្យចូលរួមគំាទ្រ។
– សាលារៀនត្រូវជំរុញឱ្យសិស្សមានឱកាសរៀនឱ្យបានច្រើន តាមរយៈការបង្កើតជាក្លឹបសិក្សា ឬ ស្វ័យសិក្សា។ សូមលោកគ្រូ អ្នកគ្រូ បន្តដឹកនាំសិស្សឱ្យបន្តហាត់ធ្វើលំហាត់វិញ្ញាសាឆ្នាំមុនៗឱ្យច្រើន។
– ត្រូវយកចិត្តទុកដាក់បន្ថែមទៀតលើការអភិវឌ្ឍវិធីសាស្រ្តបង្រៀន ក៏ដូចជារបៀបនៃការសិក្សារៀនសូត្ររបស់សិស្ស
– ស្នើឱ្យបន្តស្មារតីចូលរួមសហការគ្នាឱ្យកាន់តែប្រសើរឡើង ដើម្បីឆ្លើយតបនឹងសូចនាករស្តង់ដាសាលាគំរូនិងសូមជូនពរឱ្យវិទ្យាល័យទួលទំពូងសម្រេចបានគោលដៅប្រែក្លាយជាវិទ្យាល័យគំរូនាពេលអនាគត៕