ឧត្តមសេនីយ៍ទោ អ៉ិន សុង ចូលរួមផ្សព្វផ្សាយអប់រំ ផលប៉ះពាល់គ្រោះថ្នាក់ចររាចរណ៍ និងផលប៉ះពាល់នៃការប្រើប្រាស់គ្រឿងញៀន ដល់កម្មករ-កម្មការិនី និយោជិក និងអ្នកបើកបរដឹកកម្មករ នៅខេត្តកំពង់ចាម

ភ្នំពេញ៖ ឧត្តមសេនីយ៍ទោ អ៉ិន សុង នាយករងមន្ទីរប្រឆាំងគ្រឿងញៀន និងការិយាល័យផ្សព្វផ្សាយអប់រំ នៃមន្ទីរប្រឆាំងគ្រឿងញៀន នៅថ្ងៃទី៨ ខែសីហា ឆ្នាំ២០២៤ បានចូលរួមសហការជាមួយនាយកដ្ឋានចររាចរណ៍ផ្លូវគោក នៃអគ្គស្នងការដ្ឋាននគរបាលជាតិ រៀបចំពិធីផ្សព្វផ្សាយអប់រំ ផលប៉ះពាល់គ្រោះថ្នាក់ចររាចរណ៍ និងផលប៉ះពាល់នៃការប្រើប្រាស់គ្រឿងញៀន ដល់កម្មករ-កម្មការិនី និយោជិក និងអ្នកបើកបរដឹកកម្មករ សរុបចំនួន ៦០០នាក់ ក្នុងនោះ កម្មករ-កម្មការិនីចំនួន ៤០០នាក់ និងអ្នកបើកបររថយន្ត ដឹកកម្មករចំនួន២០០នាក់។

ពិធីនេះរៀបចំឡើងនៅទីតាំងរោងចក្រ LE GROW (CAMBODIA) CO., LTD ស្ថិតនៅបណ្តោយផ្លូវជាតិលេខ៦ ស្រុកជើងព្រៃ ខេត្តកំពង់ចាម ក្រោមធិបតីភាព ឯកឧត្តមឧត្តមសេនីយ៍ឯក ចេវ ហាក់ អគ្គស្នងការរងនគរបាលជាតិ នៃក្រសួងមហាផ្ទៃ, ឯកឧត្តម ព្រាប ច័ន្ទវិបុល ទីប្រឹក្សាក្រសួងសាធារណការ និងដឹកជញ្ជូន និងជាអនុប្រធានក្រុមការងារសុវត្ថិភាពចរាចរណ៍ផ្លូវគោក សម្រាប់គាំពារកម្មករនិយោជិត (ស.ផ.ក) ឯកឧត្តមអភិបាលរងនៃគណៈអភិបាលខេត្តកំពង់ចាម។

សុវត្ថិភាពក្នុងការធ្វើដំណើរ និងសុវត្ថិភាពលើមធ្យោបាយដឹកជញ្ជូន គឺជារឿងសំខាន់ណាស់ ដែលអាចឱ្យបងប្អូនអ្នកបើកបររថយន្តដឹកកម្មករនិយោជិត និងកម្មករនិយោជិត បានយល់ដឹងកាន់តែច្បាស់ ក្នុងការធ្វើដំណើរ និងការប្រើប្រាស់ដងផ្លូវ ការគោរពសិទ្ធិគ្នាក្នុងពេលធ្វើដំណើរ និងផលប៉ះពាល់នៃការប្រើប្រាស់គ្រឿងញៀនអំឡុងពេលបើកបរ ដែលទាំងអស់នេះ នឹងអាចកាត់បន្ថយករណីគ្រោះថ្នាក់ចរាចរណ៍មកនូវកម្រិតទាបបំផុត៕