ឯកឧត្ដម អាន ពេជ្រ ហត្ថដា រដ្ឋលេខាធិការក្រសួងធនធានទឹក ដឹកនាំកិច្ចប្រជុំគណៈគ្រប់គ្រងក្រុមការងារបច្ចេកទេសចម្រុះស្តីពីកសិកម្ម និងទឹក
ភ្នំពេញ៖ នៅសាលប្រជុំនៃគណៈកម្មាធិការជាតិទន្លេមេគង្គកម្ពុជា សហប្រធានក្រុមការងារបច្ចេកទេសចម្រុះស្ដីពីកសិកម្ម និងទឹក ឯកឧត្ដម អាន ពេជ្រ ហត្ថដា រដ្ឋលេខាធិការក្រសួងធនធានទឹក និងឧតុនិយម រួមជាមួយឯកឧត្ដម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំកិច្ចប្រជុំគណៈគ្រប់គ្រងក្រុមការងារបច្ចេកទេសចម្រុះស្តីពីកសិកម្ម និងទឹក ដោយមានការចូលរួមពីតំណាងដៃគូអភិវឌ្ឍន៍ដែលជាសហដៃគូសម្របសម្រួលដូចជា អង្គការស្បៀង និងកសិកម្មនៃអង្គការសហប្រជាជាតិ (FAO) ប្រចាំកម្ពុជា និងតំណាងមូលនិធិអន្តរជាតិសម្រាប់អភិវឌ្ឍន៍កសិកម្ម (IFAD) ប្រចាំកម្ពុជា។
សូមជម្រាបថា កិច្ចប្រជុំបានពិនិត្យ ពិភាក្សា និងផ្តល់យោបល់លើសេចក្តីព្រាងផែនការសកម្មភាពទូទៅរយៈពេលបួនឆ្នាំ(២០២៥-២០២៨) សេចក្ដីព្រាងបឋមលក្ខខណ្ឌការងារ (ToR) របស់ក្រុមការងារ TWG-AW ដែលបានរៀបចំឡើងដោយលេខាធិការដ្ឋានក្រុមការងារ TWG-AW និងពិភាក្សាពីការចាប់ផ្តើមសកម្មភាពការងាររបស់ក្រុមការងារអន្តរក្រសួង កសិកម្ម-អភិវឌ្ឍន៍ជនបទ-ធនធានទឹក ដែលទើបនឹងបង្កើតឡើង។
ឯកឧត្តមរដ្ឋលេខាធិការបានបញ្ជាក់ឱ្យដឹងថា កិច្ចប្រជុំបានឯកភាព និងកំណត់នូវកិច្ចការបន្ទាន់មួយចំនួនដូចជា៖
ទី១)លេខាធិការដ្ឋានក្រុមការងារ TWG-AW នឹងធ្វើការជាមួយដៃគូអភិវឌ្ឍន៍ទាំងពីរដើម្បីកែសម្រួលខ្លឹមសារលក្ខខណ្ឌការងាររបស់ក្រុមការងារ TWG-AW ដូចដែលបានពិភាក្សា និងឯកភាព មុននឹងដាក់ឆ្លងសុំការឯកភាពពីក្រុមការងារ TWG-AW នាកិច្ចប្រជុំប្រចាំឆ្នាំ ពេលខាងមុខ។
ទី២)ផ្អែកលើលក្ខខណ្ឌការងាររបស់ក្រុមការងារ TWG-AW ដែលបានកែសម្រួលខាងលើ លេខាធិការដ្ឋានការងារ TWG-AW នឹងធ្វើការកែសម្រួលខ្លឹមសារដូចដែលបានពិភាក្សា និងសម្រេច ហើយផ្ញើសេចក្តីព្រាងផែនការដែលបានកែសម្រួលជូនតំណាងដៃគូអភិវឌ្ឍន៍ទាំងពីរ ដើម្បីពិនិត្យ ពិភាក្សា និងផ្តល់យោបល់ក្នុងចំណោមដៃគូអភិវឌ្ឍន៍សម្រាប់ការគាំទ្រផ្នែកថវិកាមុននឹងដាក់ឆ្លងសុំការឯកភាពពីក្រុមការងារ TWG-AW នាកិច្ចប្រជុំប្រចាំឆ្នាំនាពេលខាងមុខ។ លេខាធិការដ្ឋានក្រុមការងារ TWG-AW ក៏នឹងរៀបចំសេចក្ដីសង្ខេបបន្ថែម (ឯកសារទស្សនទាន) សម្រាប់សកម្មភាពការសិក្សារៀបចំយុទ្ធសាស្ត្រវិស័យ កសិកម្ម និងទឹក (២០២៩-២០៣៩)។
ទី៣)ស្នើឱ្យលេខាធិការដ្ឋានក្រុមការងារ TWG-AW រៀបចំកិច្ចប្រជុំលើកទី១ របស់ក្រុមការងារអន្តរក្រសួង កសិកម្ម-អភិវឌ្ឍន៍ជនបទ-ធនធានទឹក ដើម្បីណែនាំសមាសភាពក្រុមការងារ ការបែងចែកការងារទទួលខុសត្រូវ ក៏ដូចជាពិភាក្សាអំពីការកំណត់កិច្ចការជាអាទិភាពដែលត្រូវអនុវត្ត៕
