រដ្ឋមន្ត្រី ឈាង រ៉ា ជួបសំណេះសំណាលជាមួយថ្នាក់ដឹកនាំ មន្រ្តីរាជការ និងបុគ្គលិកសុខាភិបាល នៃមន្ទីរសុខាភិបាលខេត្តកំពត

ភ្នំពេញ៖ នារសៀលថ្ងៃព្រហស្បតិ៍ ១២រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១ ខែសីហា ឆ្នាំ២០២៤ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីសុខាភិបាល និងប្រតិភូអមដំណើរ បានជួបសំណេះសំណាល ព្រមទាំងផ្តល់អនុសាសន៍ ដល់មន្រ្តីរាជការបុគ្គលិកសុខាភិបាល ជាថ្នាក់ដឹកនាំ នៃមន្ទីរសុខាភិបាលខេត្តកំពត។

ជាកិច្ចចាប់ផ្តើម ឯកឧត្តមសាស្រ្តាចារ្យរដ្ឋមន្រ្តីបានសំដែងអំណរគុណ និងសំដែងក្តីរីករាយ ចំពោះការខិតខំបំពេញការងារនៃបុគ្គលិកសុខាភិបាល មន្ទីរសុខាភិបាលនៃរដ្ឋបាលខេត្តទាំងមូល ទាំងមុនជំងឺឆ្លងកាចសាហាវសាកល Covid-19 និងជាពិសេសកំឡុងCovid-19 ដែលជាវីរៈភាពរួមជាធ្លុងមួយ ជាមួយសហភាតរសុខាភិបាលទូទាំងប្រទេស និងអន្តរវិស័យ។ ឯកឧត្តមសាស្រ្តាចារ្យ បានផ្តាំផ្ញើដល់មន្រ្តីសុខាភិបាលគ្រប់លំដាប់ថ្នាក់ទាំងអស់ បន្តស្មារតីរួបរួមគ្នា ចេះជួយគ្នា ស្មោះត្រង់គ្នានឹងគ្នា សាមគ្គីភាពភាពទូលាយ និងប្រកាន់ខ្ជាប់ក្រមសីលធម៌វិជ្ជាជីវៈ។

ឯកឧត្តមសាស្ត្រាចារ្យរដ្ឋមន្រ្តី បានជូនអោយរំលឹកបញ្ជាក់ពីមន្ត្រីដឹកនាំក្នុងសុខាភិបាលនៃខេត្ត អំពីអ្វីដែលត្រូវប្រុងប្រយត្ន័ កុំអោយកើតមាន និងកាន់តែកុំអោយទៅជាការពិត ឧទាហរណ៍ដូចជា៖

១-រាល់កិច្ចការប្រជុំទាំងឡាយ មិនសំដៅយកបានខ្លឹមសារយកទៅអនុវត្ត ដោយមិនបានកត់ត្រាខ្លឹមសារ។ ក្នុងន័យនេះត្រូវខិតខំកត់ត្រាខ្លឹមសារនៃការប្រជុំនីមួយៗ យកទៅអនុវត្ត និងផ្ទៀងផ្ទាត់លទ្ធផល។

២-សេវាមណ្ឌលសុខភាពនៅមិនទាន់រលូនល្អ ពេទ្យមិននៅកន្លែង។ ក្នុងន័យនេះត្រូវធានាអោយបាន មានវត្តមានក្នុងម៉ោងវេលាការងារ ដោយមានការកត់ត្រាវត្តមានជាមួយការទទួលខុសត្រូវ។

៣-មិនមានថ្នាំគ្រប់គ្រាន់ ព្រោះយកពីសាធារណៈ (យកពីរដ្ឋ) ទៅប្រើក្រៅ(ឯកជន)។ ក្នុងន័យនេះត្រូវធានាអោយបានយន្តការត្រួតពិនិត្យ និងតម្លាភាព ជាមួយកំនត់ត្រាផ្ទៀងផ្ទាត់។

៤-ពេលមន្ទីរសុខាភិបាលចុះពិនិត្យ ទៅយកថ្នាំពីមណ្ឌលផ្សេងមកដាក់ជំនួសជាមុន (មិនងាយចាប់បាន)។ ក្នុងន័យនេះត្រូវធានាអោយបានការទទួលខុសត្រូវ ពីមណ្ឌលមួយ ទៅមណ្ឌលមួយ ដោយមិនមានមណ្ឌលណាទទួលខុសត្រូវជំនួសទេ។

បន្ថែមពីការប្រុងប្រយ័ត្ន និងជៀសវាងខាងលើ ចំនុចគន្លឹះខាងក្រោមត្រូវបានជំរុញដោយឯកឧត្តមសាស្រ្តាចារ្យរដ្ឋមន្រ្តី ដើម្បីបន្តអនុវត្ត៖

១-ការសម្រួលការទទួលអ្នកជំងឺ អោយបានរហ័ស ទូលំទូលាយ និងជាមួយការពន្យល់ក្បោះក្បាយ។

២-រក្សាទំនាក់ទំនងល្អរវាងសហភាតរ ក៏ដូចជាមួយបងប្អូនមកទទួលសេវាសុខភាព។ ទំនាក់ទំនងល្អ បង្កើនទំនុកចិត្ត បង្កើតភាពរីករាយ និងគំនិតវិជ្ជមាន។

៣-ស្មោះត្រង់ និងតម្លាភាព ជាគន្លឹះសំខាន់លើភាពជោគជ័យ និងដំណោះស្រាយទាំងឡាយ។

៤-យកចិត្តទុកដាក់លើការថែទាំសុខភាពបងប្អូនអ្នកជំងឺ ទាំងសុខភាពផ្លូវកាយ ពិសេសទាំងផ្លូវចិត្ត តាមរយៈអាកប្បកិរិយារួសរាយ ញញឹមរាក់ទាក់ បន្ថូភាពតាងតឹង ក្តីបារម្ភនៃអ្នកជំងឺ និងក្រុមគ្រួសារ និងឆ្លើយតបបានតម្រូវការសុខភាពបន្ទាន់ៗប្រជាពលរដ្ឋ។

៥-បង្កើនគំនិតឆ្នៃប្រឌិតថ្មីៗ (នវានុវត្តន៍) ក្នុងការងារ ដែលកាន់តែសម្រួលរបៀបធ្វើការ ជាមួយប្រសិទ្ធិភាពកាន់តែខ្ពស់។

ក្នុងពិធីនេះដែរ មានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ អគ្គនាយក អគ្គនាយករងបច្ចេកទេស ជាប្រតិភូក្រសួងសុខាភិបាល អមដោយសមាសភាពចូលរួមពីអាជ្ញាធរមូលដ្ឋាន ឯកឧត្តម តាក ហាប់ ប្រធានក្រុមប្រឹក្សាខេត្តកំពត លោកជំទាវ យូ សុគន្ធ អភិបាលរងនៃគណៈអភិបាលខេត្តកំពត អភិបាលនៃគណៈអភិបាល សមាជិកក្រុមប្រឹក្សាខេត្ត និងអនុប្រធានមន្ទីរសុខាភិបាល ប្រធានការិយាល័យមន្ទីរសុខាភិបាល ប្រធានការិយាល័យសុខាភិបាលស្រុកប្រតិបត្តិ ប្រធាន អនុប្រធានមន្ទីរពេទ្យ និងប្រធាន អនុប្រធានមណ្ឌលសុខភាព ៕