អ៊ីស្រាអែលបើកការវាយឆ្មក់ថ្មីនៅតំបន់ហ្គាហ្សា ខណៈពេលដែលលោក Netanyahu កំពុងបំពេញទស្សនកិច្ចនៅអាមេរិក

ហ្គាហ្សា៖ កងកម្លាំងអ៊ីស្រាអែលបានធ្វើការវាយឆ្មក់ថ្មីនៅតំបន់ហ្គាហ្សាស្ទ្រីបកាលពីថ្ងៃពុធ ប៉ុន្មានម៉ោងមុនពេលនាយករដ្ឋមន្ត្រីអ៊ីស្រាអែល លោក Benjamin Netanyahu ត្រូវទៅថ្លែងសុន្ទរកថានៅសភាអាមេរិក។

អ្នកស្រុកបានឲ្យដឹងថា ការវាយប្រហារចុងក្រោយរបស់អ៊ីស្រាអែលបានបំផ្លាញផ្ទះនៅក្នុងទីប្រជុំជនភាគខាងកើតនៃតំបន់ Khan Younis នៅភាគខាងត្បូងហ្គាហ្សា ហើយមនុស្សរាប់ពាន់នាក់ត្រូវបានបង្ខំឱ្យឆ្ពោះទៅភាគខាងលិចដើម្បីស្វែងរកទីជម្រក។

សេវាសង្គ្រោះបន្ទាន់ស៊ីវិលប៉ាឡេស្ទីនបានបញ្ជាក់ថា ខ្លួនបានទទួលការអំពាវនាវពីអ្នកស្រុកដែលជាប់នៅក្នុងផ្ទះរបស់ពួកគេនៅ Bani Suhaila ភាគខាងកើតនៃតំបន់ Khan Younis ប៉ុន្តែមិនអាចទៅដល់ទីប្រជុំជនបានទេ។

យោធាអ៊ីស្រាអែល ដែលកំពុងព្យាយាមលុបបំបាត់ក្រុមសកម្មប្រយុទ្ធឥស្លាម ហាម៉ាស បន្ទាប់ពីការវាយប្រហារកាលពីថ្ងៃទី៧ ខែតុលា លើអ៊ីស្រាអែល បានបញ្ជាក់ថា ខ្លួនបាននិងកំពុងប្រតិបត្តិការនៅតំបន់ដែលក្រុមយុទ្ធជនអាចបាញ់គ្រាប់រ៉ុក្កែតចូលអ៊ីស្រាអែល និងវាយប្រហារទាហានអ៊ីស្រាអែល។

មន្ត្រីសុខាភិបាលនៅតំបន់ហ្គាហ្សាបានឲ្យដឹងថា ការវាយប្រហារដោយយោធារបស់អ៊ីស្រាអែលក្នុងរយៈពេល២៤ម៉ោងចុងក្រោយនេះបានសម្លាប់មនុស្សយ៉ាងហោចណាស់ ៥៥នាក់ ដែលជាអ្នកស្លាប់និងរបួសចុងក្រោយបំផុតនៅក្នុងសង្គ្រាមដែលអាជ្ញាធរសុខាភិបាលក្នុងតំបន់បានបញ្ជាក់ថាបានសម្លាប់ប្រជាជនប៉ាឡេស្ទីនជាង ៣៩,០០០នាក់។