សមាគមក្រុមការងារ១០០រាត្រី ចូលរួមកិច្ចប្រជុំពិនិត្យពិភាក្សាលើសំណើសុំជូនផ្ដល់យោបល់អំពីការស្ដារបឹង ប្រឡាយស្ថិតនៅក្នុងខេត្តកំពង់ឆ្នាំង
ភ្នំពេញ៖ កាលពីថ្ងៃទី២២ ខែកក្កដា ឆ្នាំ២០២៤ លោក ពេជ្រ កែវមុនី អភិបាលរងខេត្តកំពង់ឆ្នាំង បានបើកកិច្ចប្រជុំពិនិត្យពិភាក្សាលើសំណើរបស់សមាគមក្រុមការងារ១០០រាត្រី សុំជូនផ្ដល់យោបល់អំពីការស្ដារបឹង ប្រឡាយស្ថិតនៅក្នុងខេត្តកំពង់ឆ្នាំង។
លោកអភិបាលរងខេត្ត បានលើកឡើងអំពីកិច្ចខិតខំជួយដល់ពលរដ្ឋតាមមូលដ្ឋានកន្លងមក ក្នុងគ្រោះទឹកជំនន់ គ្រោះរាំងស្ងួតងាប់ស្រូវជាដើម និងជម្រុញសម្របសម្រួលឲ្យមានប្រព័ន្ធទឹកធ្វើកសិកម្ម។
លោក មួង សូនី ក៏បានលើកឡើងអំពីសារៈសំខាន់ការអនុវត្តគោលនយោបាយទឹកដើម្បីឲ្យរដ្ឋចំនេញជៀសវាងចំណាយថវិការរដ្ឋច្រើន និងដើម្បីជម្រុញការធ្វើប្រព័ន្ឋធារាសាស្ត្រលឿន ដូច្នេះទាមទារឲ្យមានកិច្ចសហការជាមួយក្រុមហ៊ុនឯកជន។ លោក មួង សូនីបន្តថា ស្រុកចំនួន៤ក្នុងខេត្តកំពង់ឆ្នាំង ដែលមានទីតាំងស្ថិតនៅជាប់ទន្លេសាប និងដៃទន្លេសាប ព្រែកជាដើមមានដីដាំស្រូវ ងាយស្រួលបង្កបង្កើតប្រព័ន្ឋធារាស្ត្រទំនើបបាន និងបង្កការដាំស្រូវបានរាប់ម៉ឺនហិចតា ក្នុងមួយឆ្នាំ២ដង ឬ៣ដង។
លោក មួង សូនី ក៏បានលើកឡើងអំពីប្រទេសវៀតណាម ដែលបានទាញយកអត្ថប្រយោជន៍ពីទន្លេមេគង្គដោយប្រជាពលរដ្ឋវៀតណាមរាប់លាននាក់ ទទួលប្រយោជន៍យ៉ាងច្រើនពីទឹកទន្លេមេគង្គក្នុងវិស័យកសិកម្ម ជលផលជាដើម។
បន្ថែមពីនេះ លោក អភិបាលរង ស្រុកជល់គរី ស្រុកកំពង់លែង ស្រុកបរិបូរណ៍ និងតំណាងប្រធានមន្ទីរធនធានទឹក ក៏បានលើកឡើងអំពីឧបសគ្គមួយចំនួន ដូចជា ការអនុវត្តច្បាប់តឹងរឹងដោយមិនអាចប៉ះពាល់តំបន់៣បាន និងគ្មានសិទ្ឋក្នុងការសម្រេចឯកភាពអោយស្ដារបឹង ឬប្រឡាយ និងពិបាករឿងសារព៌តមានរករឿង។ តំណាងជលផល នៃមន្ទីរកសិកម្ម លើកឡើងថា លោកបានខិតខំពង្រឹងច្បាប់ ជាពិសេសមិនអាចប៉ះពាល់តំបន់៣បាន ដោយពុំបានគិតដល់ជីវភាពប្រជាពលរដ្ឋមូលដ្ឋាន។ លោក មួង សូនី ក៏បានបន្តថា ថ្នាក់ដឹកនាំត្រូវគិតរាស្រ្តជាធំអំពីជីវភាពពួកគាត់ និងជម្រុញស្ថាប័នពាក់ព័ន្ធសហការគ្នារកមធ្យោបាយជួយដល់ពលរដ្ឋ ជាពិសេសវិស័យកសិកម្ម និងនេសាទត្រីជាដើម។
សរុបលទ្ធផលកិច្ចប្រជុំ អភិបាលរងខេត្ត ស្នើឱ្យមន្ទីរ និងស្រុកទាំងអស់ធ្វើបច្ចុប្បន្នភាពបឹងប្រឡាយដែលមានស្រាប់ និងចំនួនពលរដ្ឋដែលធ្វើដំណាំស្រូវ ចំនួនពលរដ្ឋដែលទទួលបានផលពីបឹងប្រឡាយ ព្រមទាំងសំណូមពរធ្វើកិច្ចសហប្រតិបត្តិការជាមួយសមាគមក្រុមការងារ១០០រាត្រីបន្តទៀត និងសំណើរធ្វើរបាយការណ៍កិច្ចប្រជុំនេះជូនអភិបាលខេត្តសុំគោលការណ៍បន្ថែម។
ផ្អែកតាមលទ្ធផលកិច្ចប្រជុំ លោក មួង សូនី យល់ឃើញថាការគិតគូរអំពីស្ដារប្រឡាយរបស់ស្រុកមួយចំនួនក្នុងខេត្តកំពង់ឆ្នាំង ពុំទាន់មានផែនការជាក់លាក់ ឆន្ទៈគ្រប់គ្រាន់ក្នុងការស្ដារបឹងប្រឡាយនៅឡើយ បើទោះបីជាមានការលើកឡើងពីមន្ទីរឬស្រុក។លោក បញ្ជាក់ថាមានវិស័យឯកជនចូលរួមសហប្រតិបត្តិការក៏ដោយ ក៏នីតិវិធីក្នុងការសម្រេចស្ដារបឹងប្រឡាយក៏មិនទាន់ដឹងប្រាកដថាអ្នកណាជាអ្នកចេញ ដែលនេះគឺជាឧបសគ្គធំ។
សមាគមក្រុមការងារ១០០រាត្រី យល់ឃើញថាការអនុវត្តគោលនយោបាយទឹកមានសារៈសំខាន់ណាស់ ដើម្បីជួយលើកកម្ពស់ជីវភាពប្រជាពលរដ្ឋកម្ពុជា ដែលពឹងពាក់លើការអាស្រ័យផលធ្វើដំណាំស្រូវជាង ២លានគ្រួសារ ដើម្បីកាត់បន្ថយភាពក្រីក្រឱ្យបានឆាប់រហ័ស ស្របតាមការគិតគួរ និងខិតខំរបស់សម្តេច មហាបវរធិបតី ហ៊ុន ម៉ាណែត និងសម្តេច តេជោ ហ៊ុន សែន៕
