កងពលតូចថ្មើរជើងលេខ៥២ ត្រួតពិនិត្យកម្លាំងអន្តរាគមន៍ និងសម្ភារមធ្យោបាយបម្រើឲ្យការជួយសង្គ្រោះ ពលរដ្ឋរងគ្រោះមហន្តរាយផ្សេងៗ ដោយជំនន់ទឹកភ្លៀង
ភ្នំពេញ៖ ដោយអនុវត្តតាមបទបញ្ជារបស់ មេបញ្ជាការកងពលតូចថ្មើរជើងលេខ៥២ លោកវរសេនីយ៍ឯក ម៉ី សឹង្ហវាសនា មេបញ្ជាការរងកងពល នាថ្ងៃទី១៩ ខែកក្កដា ឆ្នាំ២០២៤ បានត្រួតពិនិត្យកម្លាំងត្រៀមអន្តរាគមន៍នៅនឹងកន្លែង និងត្រួតពិនិត្យទាំងសម្ភារ មធ្យោបាយ ដើម្បីត្រៀមចុះជួយសង្គ្រោះបានទាន់ពេលវេលា ជូនប្រជាពលរដ្ឋរងគ្រោះដោយមហន្ដរាយផ្សេងៗ ដែលកើតមានឡើងក្នុងភូមិសាស្ត្រទទួលខុសត្រូវ។
សូមជម្រាបជូនថា ដោយស្ថានភាពអាកាសធាតុនៅតំបន់ខាងលើនៃស្រុកសំឡូត នៅតែមានភ្លៀងជាប់គ្នា៣ថ្ងៃកន្លងមកជាហេតុធ្វើឲ្យតំបន់មួយចំនួនមានភ្លៀងធ្លាក់ខ្លាំង លាយឡំខ្យល់កន្រ្តាក់ ដែលបង្កឱ្យមានការគួរព្រួយបារម្ភ។
វរសេនីយ៍ឯក ម៉ី សឹង្ហវាសនា មេបញ្ជាការរង បានផ្សព្វផ្សាយ និងដាក់បទបញ្ជា គ្រប់បណ្ដាអង្គភាពចំណុះកងពលទាំងអស់ ត្រៀមកម្លាំងអន្តរាគមន៍នៅនឹងកន្លែង ២៤ម៉ោង លើ២៤ម៉ោង រងចាំបទបញ្ជាថ្នាក់លើ ដើម្បីត្រៀមលក្ខណៈចល័តអន្តរាគមន៍ ជួយសង្រ្គោះប្រជាពលរដ្ឋដែលរងគ្រោះដោយមហន្តរាយផ្សេងៗឱ្យបានទាន់វេលា ក្នុងភូមិសាស្រ្តទទួលខុសត្រូវ។
លោកមេបញ្ជាការរងក៏បានថ្លែងការកោតសរសើរដល់ នាយទាហាន នាយទាហានរង និងពលទាហានទាំងអស់ ដែលបានអនុវត្តនូវតួនាទីភារកិច្ចតបតាមបទបញ្ជារបស់កងពលដាក់ចុះ ក៏ដូចជាអនុវត្តតាមផែនការរបស់ថ្នាក់លើប្រគល់ជូន ប្រកបដោយភាពទទួលខុសត្រូវខ្ពស់ ដើម្បីបុព្វហេតុជាតិមាតុភូមិ និងប្រជាជន៕
