ឯកឧត្តម ស៊ូ សុជាតិ ដឹកនាំសហការីចូលរួមសន្និសីទអន្តរជាតិ ស្តីពី “យន្តការគ្រប់គ្រងតាមផ្លូវច្បាប់លើទ្រព្យឌីជីថលក្នុងយុគសម័យថ្មី” តាមប្រព័ន្ធអនឡាញ

ភ្នំពេញ៖ នាថ្ងៃសុក្រ ៧កើត ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១២ ខែកក្កដា ឆ្នាំ២០២៤ ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា (ន.ម.ក.) អមដោយឯកឧត្តមបណ្ឌិត វិន​ ភក្តី អគ្គនាយករង និងជាប្រធានក្រុមការងារបច្ចេកវិទ្យាហិរញ្ញវត្ថុ (Fintech) នៃ ន.ម.ក. បានដឹកនាំសហការីចូលរួមសន្និសីទអន្តរជាតិ ស្តីពី “យន្តការគ្រប់គ្រងតាមផ្លូវច្បាប់លើទ្រព្យឌីជីថលក្នុងយុគសម័យថ្មី” តាមប្រព័ន្ធអនឡាញ ក្រោមការរៀបចំដោយក្រសួងយុត្តិធម៍ នៃព្រះរាជាណាចក្រថៃ។ សន្និសីទនេះ មានគោលបំណងចែករំលែកបទពិសោធន៍ និងផ្លាស់ប្ដូរមតិយោបល់លើវិធីសាស្រ្តផ្លូវច្បាប់ចំពោះទ្រព្យឌីជីថលនៅក្នុងអាស៊ាន ជាមួយដៃគូសន្ទនា។

ជាមួយគ្នានេះ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមប្រតិភូ លោក ពេជ្រ រិទ្ធី ប្រធានការិយាល័យគ្រប់គ្រងអាជីវកម្មគម្រោងវិនិយោគរួម និងអាជីវកម្មឧបករណ៍និស្សន្ទ នៃនាយកដ្ឋានត្រួតពិនិត្យអន្តរការីមូលបត្រ តំណាង ន.ម.ក. បានចូលរួមធ្វើជាវាគ្មិននៅក្នុងកិច្ចពិភាក្សា ស្ដីពី “និន្នាការអន្តរជាតិ បញ្ហាប្រឈម និងកាលានុវត្តភាពនៃការគ្រប់គ្រងទ្រព្យឌីជីថល” ដោយបានធ្វើបទបង្ហាញលើប្រធានបទស្តីពី “និន្នាការសកលលោក និងអនាគតនៃការគ្រប់គ្រងទ្រព្យឌីជីថលនៅកម្ពុជា”។

សន្និសីទអន្តរជាតិនេះ មានការចូលរួមពីគណៈប្រតិភូមកពីតំបន់អាស៊ាន ក៏ដូចជាទីម័រខាងកើត ដែលជាអ្នកសង្កេតការណ៍អាស៊ាន រួមជាមួយដៃគូសន្ទនានានា រួមមាន៖ សាធារណរដ្ឋប្រជាមានិតចិន ប្រទេសជប៉ុន សាធារណរដ្ឋកូរ៉េ និងសហព័ន្ធរុស្ស៊ី ជាដើម ៕