ឯកឧត្តម ចាន់ ស៊ីណាត ដឹកនាំគណៈប្រតិភូក្រុមការងារបេសកកម្មធនាគារអភិវឌ្ឍន៍អាស៊ី ចុះពិនិត្យវឌ្ឍនភាពការងារសាងសង់អគារមជ្ឈមណ្ឌលជាតិគ្រប់គ្រងទិន្នន័យធនធានទឹក

ភ្នំពេញ៖ ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម អមដំណើរដោយថ្នាក់ដឹកនាំរបស់អង្គភាពនានាចំណុះក្រសួង និងសហការីជាតិ-អន្តរជាតិ បានដឹកនាំគណៈប្រតិភូក្រុមបេសកកម្មធនាគាអភិវឌ្ឍន៍អាស៊ី (ADB) មកពីស្នាក់ការកណ្តាលទីក្រុងម៉ានីល ប្រទេសហ្វីលីពីន ចុះពិនិត្យវឌ្ឍនភាពនៃការសាងសង់អគារមជ្ឈមណ្ឌលជាតិគ្រប់គ្រងទិន្នន័យធនធានទឹកដ៏សំខាន់នៃព្រះរាជាណាចក្រកម្ពុជា។

ឯកឧត្តមរដ្ឋលេខាធិការបានបញ្ជាក់ឱ្យដឹងថា គម្រោងនេះបានដំណើរការប្រកបដោយប្រសិទ្ធភាពខ្ពស់ក្រោមហិរញ្ញប្បទានពីធនាគារអភិវឌ្ឍន៍អាស៊ី (ADB) និងក្រោមកិច្ចសហប្រតិបត្តិការគាំទ្រយ៉ាងជិតស្និទ្ធពីសំណាក់ក្រសួងសេដ្ឋកិច្ច និងហិរញ្ញវត្ថុ។

ទន្ទឹមនឹងនេះ ឯកឧត្តមរដ្ឋលេខាធិការបានបញ្ជាក់ឱ្យដឹងបន្ថែមទៀតថា គណៈប្រតិភូក្រុមបេសកកម្មធនាគារអភិវឌ្ឍន៍អាស៊ី (ADB) បានសម្តែងនូវក្តីរីករាយ និងវាយតម្លៃខ្ពស់ចំពោះលទ្ធផលដែលសម្រចបានជោគជ័យជាប្រវត្តិសាស្រ្តនេះ និងបានបញ្ជាក់ពីការគាំទ្រយ៉ាងពេញទំហឹងចំពោះការអនុវត្តបន្តលើផែនការការងារធ្វើទំនើបកម្មប្រព័ន្ធព័ត៌មានវិទ្យាគ្រប់ប្រភេទ ដើម្បីធានាបាននូវឯករាជ្យភាពលើការព្យាករធនធានទឹក និងឧតុនិយមឱ្យបានទាន់ពេលវេលា ព្រមទាំងធានាបាននូវសុក្រឹត្យភាពលើប្រព័ន្ធនិងបច្ចេកទេសបញ្ជាពីចម្ងាយ ការងារផ្សព្វផ្សាយ និងការងារប្រកាសអាសន្នជាដើម៕