ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការន់ប្រតិបត្តិការសឹករងកំពង់ធំ យោធភូមិភាគទី៤ នៅថ្ងៃទី៨ ខែកក្កដា ឆ្នាំ២០២៤ បានផ្សព្វផ្សាយសភាពកាណ៍ថ្មីៗ ដែលកើតមានឡើងនៅក្នុងប្រទេស និងព្រឹត្តិការណ៍អន្តរជាតិមួយចំនួនន ព្រមទាំងបានប្រគល់ភារកិច្ចសំខាន់ៗចំនួន ៣ ចំណុចជូនដល់កងកម្លាំង ដែលពិធីនេះប្រព្រឹត្តិទៅនៅបញ្ជាការដ្ឋានតំបន់ប្រតិបត្តិការសឹករងកំពង់ធំ ស្ថិតនៅភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ។
ឧត្តមសេនីយ៍ទោ សោម ស៊ុន បានផ្សព្វផ្សាយសភាពការណ៍ថ្មីៗ និងការអភិវឌ្ឍន៍រីកចម្រើនលើគ្រប់វស័យ។ ការដោះស្រាយការលំបាកនានារបស់ប្រជាជន ពិសេសការគ្រប់គ្រងក្នុងវស័យសន្តិសុខនិងសណ្ដាប់ធ្នាប់សង្គម ដែលជាបន្តបន្ទាប់បានលប់បំបាត់ការជួញដូរប្រើប្រាស់គ្រឿងញៀន ការលេងល្បែងស៊ីសងគ្រប់ប្រភេទ និងបន្តសកម្មភាពលប់បំបាត់ឲ្យបានក្រុមក្មេងទំនើង ដែលបង្ករបញ្ហាក្នុងសង្គម ដើម្បីភាពសុខដុមរមនារបស់យើងទាំងអស់គ្នា ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ។
ឧត្តមសេនីយ៍ទោ សោម ស៊ុន បានប្រគល់ភារកិច្ចសំខាន់ៗចំនួន៣ចំណុច ជូនដល់កងកម្លាំង នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ៖
ទី១ មេបញ្ជាការគ្រ់បណ្តកងឯកភាព និងគ្រប់ស្ថាប័នចំណុះ ត្រូវផ្សព្វផ្សាយអំពីសារាចរលេខ១០ ស.រ ស្តីពីការអបអរសាទរការបើកការដ្ឋានសាងសង់ព្រែកជីកហ្វូណនតេជោ នៅថ្ងៃទី០៥ ខែសីហា ឆ្នាំ២០២៤ ដើម្បីឲ្យយោធិនគ្រប់រូប និងក្រុមគ្រួសារបានជ្រួតជ្រាប និងចូលរួមអបអរសាទរ ដោយត្រូវវាយជួង ទូងស្គរ បង្ករសម្លេង ឲ្យបានអធឹកអធម ។ ទី២ យោធិនគ្រប់រូប និងក្រុមគ្រួសារ ត្រូវភ្ជាប់ប្រព័ន្ធបណ្តាញសង្គម ដែលមានឈ្មោះថា Coolapp ឲ្យបានគ្រប់ៗគ្នា ដែលជាស្នាដៃកូនខ្មែរ ជាអ្នកបង្កើត ដើម្បីបម្រើឲ្យការទំនាក់ទំនងការងារទូទៅក្នុងសង្គមបានល្អប្រសើរបន្ថែមទៀត និងទី៣ ត្រូវបន្តធ្វើសកម្មភាពសហប្រតិបត្តិការក្នុងការការពារ ទប់ស្កាត់ និងបង្ក្រាបបទល្មើសធនធានធម្មជាតិ ឲ្យដូចភ្លៀងរលឹម មិនឲ្យជនល្មើសលួចកាប់ទន្រ្ទានព្រៃឈើជាថ្មី និងសហការគ្រប់គ្រងដីដែលជនល្មើសបានកាប់ទន្ទ្រានកន្លងទៅ ដែលជាដីរបស់រដ្ឋ ឲ្យបានជាដាច់ខាត។
នៅក្នុងឱកាសនេះផងដែរ កងកម្លាំង នៃបញ្ជាការដ្ឋានតំបន់ប្រតិបត្តិការសឹករងកំពង់ធំ និងក្រុមគ្រួសារ សូមប្រកាសគាំទ្រជាថ្មីម្តងទៀត នូវគម្រោងព្រែកជីកហ្វូណនតេជោ ដែលជាព្រែកជីកប្រវត្តិសាស្ត្រ ដែលនិងត្រូវបើកការដ្ឋានសាងសង់នៅថ្ងៃទី០៥ ខែសីហា ឆ្នាំ២០២៤ ខាងមុខនេះ ឲ្យទទួលបានជោគជ័យ ដើម្បីសេដ្ឋកិច្ចជាតិ និងផលប្រយោជន៍របស់ប្រជាជនកម្ពុជា ៕
