លោកជំទាវរដ្ឋមន្ត្រីក្រសួងវប្បធម៌ និងវិចិត្រសិល្បៈ អញ្ជើញបើកមហោស្រពភាពយន្តអន្តរជាតិកម្ពុជា លើកទី១៣

ភ្នំពេញ៖ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ មានប្រសាសន៍ថា មហោស្រពភាពយន្តអន្តរជាតិកម្ពុជា លើកទី១៣ ឆ្នាំ២០២៤ មានភាពយន្តចំនួន១៥៣ចំណងជើង មកពីប្រទេសចំនួន៤៣ និងមានផលិតករបរទេសចំនួន៥០នាក់ចូលរួម។

លោកជំទាវរដ្ឋមន្ត្រីក្រសួងវប្បធម៌ និងវិចិត្រសិល្បៈ បញ្ជាក់ថា នៅឆ្នាំ២០២៣ មានក្រុមហ៊ុនផលិតភាយន្តបរទេស៤០ក្រុម បានស្នើមកថតនៅកម្ពុជា ដែលកត្តានេះបានជះផលវិជ្ជមានដល់សេដ្ឋកិច្ចជាតិ និងជាការផ្សព្វផ្សាយនូវសក្តានុពលបេតិកភណ្ឌវប្បធម៌ជាតិរបស់កម្ពុជា។

ការថ្លែងនេះរបស់លោកបណ្ឌិតបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ  ដោយមានការអញ្ជើញចូលពីសំណាក់លោកជំទាវ ជា សិរី អគ្គទេសាភិបាលធនាគារជាតិនៃកម្ពុជា ឯកឧត្តម ខៀវ កាញារិទ្ធ សមាជិករដ្ឋសភានិងលោកជំទាវ ឯកឧត្តម លោកជំទាវតំណាងក្រសួងស្ថាប័ននានា ឯកឧត្តម លោកជំទាវ ឯកអគ្គរាជទូត រដ្ឋទូត តំណាងអង្គការស្ថាប័នអន្តរជាតិព្រមទាំងសិល្បៈករ សិល្បៈការីទាំងជាតិ និងអន្តរជាតិជាច្រើនកុះករ ក្នុងឱកាសអញ្ជើញជាអធិបតីភាពបើកម្មវិធីមហោស្រពភាពយន្តអន្តរជាតិកម្ពុជា ហៅកាត់ថា CIFF លើកទី១៣ នាល្ងាចថ្ងៃទី២៥ ខែមិថុនា ឆ្នាំ២០២៤ នៅសាលសន្និសីទចតុមុខ រាជធានីភ្នំពេញ។

ក្នុងឱកាសនេះ លោកជំទាវរដ្ឋមន្ត្រី មានប្រសាសន៍ថា មហោស្រពភាពយន្តអន្តរជាតិកម្ពុជា CIFF លើកទី១៣ នឹងក្លាយជាព្រឹត្តិការណ៍សំខាន់មួយនៅក្នុងវិស័យភាពយន្តរបស់កម្ពុជា។ សម្រាប់ឆ្នាំនេះមហោស្រពភាពយន្តអន្តរជាតិកម្ពុជា លើកទី១៣ មានភាពយន្តចំនួន១៥៣ចំណងជើង មកពីប្រទេសចំនួន៤៣ និងមានផលិតករបរទេសចំនួន៥០នាក់ចូលរួម ។

លោកជំទាវបណ្ឌិតសភាចារ្យ បានរម្លឹកថា កាលពីឆ្នាំ២០២៣ មានក្រុមហ៊ុនផលិតភាយន្តបរទេស៤០ក្រុម ស្នើមកថតនៅកម្ពុជា ដែលកត្តានេះបានជះផលវិជ្ជមានដល់សេដ្ឋកិច្ចជាតិ និងជាការផ្សព្វផ្សាយនូវសក្តានុពលបេតិកភណ្ឌវប្បធម៌ជាតិរបស់កម្ពុជា ពិសេសរួមចំណែកទាក់ទាញភ្ញៀវទេសចរនានាមកទស្សនានៅប្រទេសកម្ពុជា។ លោកជំទាវរដ្ឋមន្ត្រីបានគូសបញ្ជាក់ថា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា សម្តេចបានបន្តព្យួរនូវការអនុវត្តកាតព្វកិច្ចពន្ធដល់ផលិតករក្នុងស្រុកចាប់ពីឆ្នាំ២០២៤ ដល់ ឆ្នាំ២០២៨ និងបានដាក់ចេញនូវលក្ខខណ្ឌអនុគ្រោះសម្រាប់លើកទឹកចិត្តដល់ផលិតករភាពយន្តបរទេសដែលមកថតនៅកម្ពុជាផងដែរ។

យោងតាមរបាយការណ៍របស់នាយកដ្ឋានសិល្បៈភាពយន្តបង្ហាញថា ឆ្នាំ២០២៣វិស័យឧស្សាហកម្មភាពយន្តបានផ្តល់ចំណូលដល់សេដ្ឋកិច្ចជាតិប្រមាណជាង១៥លានដុល្លារ ដែលបានមកពីការទិញសំបុត្រចូលទស្សនាភាពយន្តរបស់ប្រជាជនជាង៤លាននាក់។ ក្រៅពីនេះ វិស័យឧស្សាហកម្មភាពយន្តដែលមានដូចជា ការផលិតភាពយន្ត ការចែកចាយភាពយន្ត និងរោងភាពយន្តបានផ្តល់ការងារក្នុងប្រព័ន្ធនិងក្រៅប្រព័ន្ធដល់ប្រជាជន ជាពិសេសយុវជនប្រមាណជាង៧.០០០កន្លែងផងដែរ។

ថ្លែងក្នុងឱកាសនោះ លោកជំទាវបណ្ឌិតសភាចារ្យបានស្វាគមន៍ លោកជំទាវបណ្ឌិត ជា សេរី អគ្គទេសាភិបាលធនាគារជាតិកម្ពុជា ដែលបានធ្វើជាអភិបាលកិត្តិយសនៃមហោស្រពភាពយន្តអន្តរជាតិកម្ពុជានាឆ្នាំនេះ ដែលការចូលរួមនេះបានបង្ហាញនូវការគំាទ្រយ៉ាងមោះមុតសំដៅជំរុញលើកកម្ពស់ការយល់ដឹង ព្រមទាំងសារៈសំខាន់នៃឧស្សាហកម្មភាពយន្តដើម្បីរួមចំណែកដល់ការជំរុញការអភិវឌ្ឍសេដ្ឋកិច្ចជាតិ ប្រកបដោយនិរន្តរភាព។ លោកជំទាវបានបន្តថា មហោស្រពភាពយន្តអន្តរជាតិកម្ពុជា បានបំពេញតួនាទីយ៉ាងសំខាន់ក្នុងការបង្កើតបរិស្ថានភាពយន្តដ៏សំបូរបែប និងរស់រវើកនៅក្នុងប្រទេសកម្ពុជា ព្រមទាំងបានរួមចំណែកយ៉ាងសំខាន់ដល់ ក្នុងការជុំរុញព្រះរាជាណាចក្រកម្ពុជា ជាដែនដីស្វាគមន៍ការថតភាពយន្តជាតិ និងអន្តរជាតិ ព្រមទាំងជួយលើកកម្ពស់កិតិ្តនាមកម្ពុជាឲ្យល្បីរន្ទឺលើឆាកអន្តរជាតិ ក្នុងបរិបទសុខសន្តិភាព  ស្ថេរភាពនយោបាយ ព្រមទាំងការអភិវឌ្ឍនៅគ្រប់ហេដ្ឋារចនាសម្ព័ន្ធជារូបវ័ន្ត ក្រោមគោលនយោបាយឈ្នះឈ្នះ។

សូមបញ្ជាក់ជូនថា ឆ្នាំនេះគឺ ជាឆ្នាំទី១៣ ដែលមហោស្រពភាពយន្តអន្តរជាតិកម្ពុជារៀបចំឡើង ហើយបានក្លាយជាព្រឹត្តិការណ៍ភាពយន្តដ៏ធំបំផុតក្នុងប្រទេស និងតំបន់អាស៊ាន ដែលមានភាពយន្តសរុបជិត២០០ចំណងជើង មកពី៤១ប្រទេសបានចូលរួមចាក់បញ្ចាំងរយៈពេល០៥ថ្ងៃនៅលើផ្ទាំងសំពត់សនៃរោងភាពយន្តជាច្រើនក្នុងរាជធានីភ្នំពេញ៕