ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសបន្តកំចាត់ក្រុមក្មេងស្ទាវ ដាវសាមូរ៉ៃ ដើម្បីរក្សា សុខសុវត្ថិភាពជូនប្រជាពលរដ្ឋនៅតាមភូមិ សង្កាត់ ឃុំ ឱ្យមានសន្តិសុខល្អប្រសើរ។
ក្នុងឱកាសអញ្ជើញបើកការដ្ឋានសាងសង់ស្ពានអាកាសភ្លោះ ចំណុចប្រសព្វមហាវិថីសម្ដេចតេជោ ហ៊ុន សែន និងផ្លូវជាតិលេខ២ ស្ថិតនៅព្រំប្រទល់រាជធានីភ្នំពេញ និងខេត្តកណ្តាល នាព្រឹកថ្ងៃទី១៧ ខែមិថុនា ឆ្នាំ២០២៤នេះ សម្តេចធិបតី ហ៊ុន បានថ្លែងថា បង្ក្រាបប៉ុណ្ណឹងហើយនៅមិនទាន់អស់ទៀត ងើបមួយវ៉ៃមួយ ងើបមួយក្រុមវ៉ៃមួយក្រុម ដើម្បីឱ្យរាង កុំឱ្យគាត់បំផ្លាញអនាគតរបស់គាត់ បំផ្លាញអនាគតសន្តិសុខរបស់ប្រទេសជាតិ ភូមិឃុំនោះទេ សូមបន្តធ្វើ។
ការប្រកាសបន្តកំចាត់នេះត្រូវបានសម្ដេចធិបតី នាយករដ្ឋមន្ត្រី បានអះអាងថា ដើម្បីជួយក្មួយៗខ្លួនឯង គ្រួសារឳពុកម្ដាយ កុំឱ្យរងទុក្ខខ្លោចផ្សារ ដោយសារអំពើពាលាអាវ៉ាសែរបស់កូន។
ជាមួយគ្នានោះ សម្ដេចធិបតី បានអរគុណសមត្ថកិច្ចគ្រប់លំដាប់ថ្នាក់ដែលបានបង្ក្រាបងតូចបងធំយ៉ាងសកម្មជារៀងរាល់ថ្ងៃ និងជំរុញឱ្យបន្តសកម្មភាពនេះបន្ថែមទៀត កំចាត់ឱ្យបានចំពោះក្រុមមួយចំនួនដែលកំពុងតែឌឺថតសំញ៉ែងដាវសាមូរ៉ៃដាក់ក្នុងកែបម៉ូតូជាដើម ៕
