ម៉ានីល៖ ប្រមុខយោធាហ្វីលីពីនបានជំរុញឱ្យអ្នកនេសាទរបស់ខ្លួន បន្តការនេសាទនៅក្នុងតំបន់សេដ្ឋកិច្ចផ្តាច់មុខរបស់ប្រទេសក្នុងសមុទ្ទចិនខាងត្បូង បើទោះបីជាច្បាប់ឆ្មាំឆ្នេរសមុទ្ទថ្មីរបស់ចិនអនុញ្ញាតកំណត់ការឃុំខ្លួនជនល្មើសដោយគ្មានការកាត់ទោសដែលចូលជាធរមាននៅថ្ងៃទី១៥ ខែមិថុនាក៏ដោយ។
ចិនទាមទារស្ទើរតែទាំងអស់នៃសមុទ្ទចិនខាងត្បូងរួមទាំងផ្នែកដែលទាមទារដោយ៖ ហ្វីលីពីន ប្រ៊ុយណេ ម៉ាឡេស៊ី តៃវ៉ាន់ និងវៀតណាម ហើយបានចេញច្បាប់ថ្មីដែលនឹងអនុវត្តច្បាប់ឆ្នាំ២០២១ ដែលអនុញ្ញាតឱ្យឆ្មាំឆ្នេរសមុទ្ទរបស់ខ្លួនប្រើកម្លាំងយោធាដ៏សាហាវប្រឆាំងនឹងនាវាបរទេសនៅក្នុងដែនទឹកដែលខ្លួនការទាមទារ។ ច្បាប់ថ្មីដែលអនុញ្ញាតឱ្យឆ្មាំឆ្នេរសមុទ្ទរបស់ចិនអាចឃុំខ្លួនជនល្មើសដែលសង្ស័យដោយគ្មានការកាត់ទោសរយៈពេល ៦០ថ្ងៃបានបង្កឱ្យមានការព្រួយបារម្ភជាអន្តរជាតិ ខណៈហ្វីលីពីនបានពណ៌នាថាជារឿងគួរឱ្យព្រួយបារម្ភ និងជាការបង្កហេតុ។
ប្រមុខកងកម្លាំងប្រដាប់អាវុធនៃប្រទេសហ្វីលីពីន លោក រ៉ូមីអូ ប្រ៊នដឺ (Romeo Brawner) បានប្រាប់អ្នកយកព័ត៌មានកាលពីថ្ងៃសុក្រ ទី១៤ ខែមិថុនាថា នោះជាសាររបស់យើងចំពោះអ្នកនេសាទរបស់យើង សម្រាប់ពួកគេមិនឱ្យភ័យខ្លាច ប៉ុន្តែគ្រាន់តែបន្តសកម្មភាពធម្មតារបស់ពួកគេនៅក្នុងតំបន់សេដ្ឋកិច្ចផ្តាច់មុខរបស់យើង។
លោកបានបន្ថែមថាយើងមានសិទ្ធិទទួលបានធនធានក្នុងតំបន់ ដូច្នេះអ្នកនេសាទយើងគ្មានហេតុផលដែលត្រូវខ្លាចនោះទេ។ ទន្ទឹមគ្នានេះ ឆ្មាំសមុទ្ទរបស់កោះតៃវ៉ាន់បានអះអាងនៅក្នុងសេចក្តីថ្លែងការណ៍មួយថា ខ្លួននឹងពង្រឹងការងារការពារការនេសាទ ការពារយ៉ាងម៉ឺងម៉ាត់នូវសុវត្ថិភាពនៃប្រតិបត្តិការរបស់អ្នកនេសាទរបស់យើង និងធានាសិទ្ធិ និងផលប្រយោជន៍នៃការដឹកជញ្ជូន និងការពារអធិបតេយ្យភាពជាតិ។
ជុំវិញច្បាប់ថ្មីរបស់ចិន បងធំសហរដ្ឋអាម៉េរិកប្រតិកម្មថា ច្បាប់ក្នុងស្រុករបស់ចិនគឺមិនអាចអនុវត្តបានចំពោះនាវាដែលមានទង់ជាតិរបស់រដ្ឋផ្សេងទៀតនៅក្នុងតំបន់សេដ្ឋកិច្ចផ្តាច់មុខរបស់រដ្ឋផ្សេងទៀត ឬនៅក្នុងលំហសមុទ្ទទឹកជ្រៅបានទេ ដោយយោងតាមច្បាប់នៃអនុសញ្ញាសមុទ្ទឆ្នាំ១៩៨២។ អ្នកនាំពាក្យក្រសួងការបរទេសអាម៉េរិកបានបន្ថែមថា សកម្មភាពចិននឹងកើនឡើងខ្លាំង និងធ្វើឱ្យប៉ះពាល់ដល់សន្តិភាព និងសន្តិសុខក្នុងតំបន់។ យ៉ាងណា ក្រសួងការបរទេសចិនបានអះអាងកាលពីមុនថា ច្បាប់ថ្មីនេះគឺសំដៅលើការការពារសណ្តាប់ធ្នាប់ដែនសមុទ្ទ។
