រដ្ឋមន្ត្រីក្រសួងអធិការកិច្ច អញ្ជើញជួបប្រជុំទ្វេភាគីជាមួយភាគីវៀតណាម ដើម្បីលើកកម្ពស់អភិបាលកិច្ចល្អ និងភាពស្អាតស្អំក្នុងរដ្ឋបាលសាធារណៈ

ភ្នំពេញ៖ នៅទីស្តីការអធិការកិច្ចរដ្ឋាភិបាលវៀតណាម នាព្រឹកថ្ងៃចន្ទ ទី១០ ខែមិថុនា ឆ្នាំ២០២៤ ឯកឧត្តម ហួត ហាក់ រដ្ឋមន្រ្តីក្រសួងអធិការកិច្ច បានដឹកនាំគណៈប្រតិភូជាន់ខ្ពស់ក្រសួងអធិការកិច្ច នៃព្រះរាជាណាចក្រកម្ពុជា អញ្ជើញជួបប្រជុំទ្វេភាគីជាមួយឯកឧត្តម ឌ័ន ហុង ហ្វុង (Doan Hong Phong) អគ្គអធិការ នៃអធិការកិច្ចរដ្ឋាភិបាល នៃសាធារណរដ្ឋសង្គមនិយមវៀតណាម ដើម្បីដកស្រង់បទពិសោធពីគ្នាទៅវិញទៅមក ជាពិសេសលើការកសាងសមត្ថភាព ការលើកកម្ពស់អភិបាលកិច្ចល្អ និងភាពស្អាតស្អំក្នុងរដ្ឋបាលសាធារណៈ ការងារអធិការកិច្ច ការដោះស្រាយបណ្តឹងតវ៉ា បណ្តឹងបរិហារ និងការរៀបចំលិខិតបទដ្ឋានគតិយុត្ត ដែលនឹងនាំផលប្រយោជន៍ដល់ការពង្រឹង និងពង្រីកទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងពីរ។

ថ្លែងក្នុងកិច្ចប្រជុំ ឯកឧត្តមរដ្ឋមន្រ្តី បានសម្តែងនូវក្តីសោមនស្សរីករាយក្រៃលែង និងបានថ្លែងអំណរគុណ ឯកឧត្តមអគ្គអធិការ ដែលបានអញ្ជើញគណៈប្រតិភូជាន់ខ្ពស់ក្រសួងអធិការកិច្ចកម្ពុជា មកបំពេញទស្សនកិច្ចផ្លូវការនៅពេលនេះ ព្រមទាំងថ្លែងអំណរគុណដល់ក្រុមការងារនៃប្រទេសទាំងពីរ ដែលបានខិតខំប្រឹងប្រែងផ្តល់កិច្ចសហការដ៏ល្អ និងសម្របសម្រួលតាមគ្រប់មធ្យោបាយ ក្នុងការសម្រេចឱ្យបាននូវអនុស្សរណៈនៃការយោគយល់គ្នា ដែលជាឯកសារដ៏មានសារៈសំខាន់ និងជាសក្ខីភាពនៃការពង្រឹងកិច្ចសហប្រតិបត្តិការលើវិស័យអធិការកិច្ចថែមមួយកម្រិតទៀត។

ជាមួយគ្នានេះដែរ ឯកឧត្តមរដ្ឋមន្រ្តី បានពាំនាំនូវការផ្តាំផ្ញើសាកសួរសុខទុក្ខពីសំណាក់ សម្តេចមហាបវរធិបតី នាយករដ្ឋមន្ត្រី និង សម្តេចកិត្តិសង្គហបណ្ឌិត ម៉ែន សំអន អតីតឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងបច្ចុប្បន្នជាឧត្តមប្រឹក្សាផ្ទាល់ព្រះមហាក្សត្រ ជូនចំពោះឯកឧត្តមអគ្គអធិការ និងសហការី នៃអធិការកិច្ចរដ្ឋាភិបាលវៀតណាមទាំងអស់។

ឯកឧត្តមរដ្ឋមន្រ្តី ក៏បានយកឱកាសនេះ អបអរសារទរយ៉ាងកក់ក្តៅនូវសមិទ្ធផល និងជោគជ័យដ៏ធំធេងរបស់រដ្ឋាភិបាលវៀតណាម ក្រោមការដឹកនាំរបស់បក្សកុំម្មុយនិស្តវៀតណាម ដែលបានធ្វើឱ្យប្រទេសវៀតណាមក្លាយជាប្រទេសឧស្សាហកម្មជឿនលឿន មានឋានៈកាន់តែខ្ពស់នៅលើឆាកអន្តរជាតិ ព្រមទាំងបានកោតសរសើរ និងវាយតម្លៃខ្ពស់ចំពោះឯកឧត្តម លោកជំទាវ លោក លោកស្រី និងមន្ត្រីគ្រប់លំដាប់ថ្នាក់នៃអធិការកិច្ចរដ្ឋាភិបាលវៀតណាម ដែលបានខិតខំប្រឹងប្រែងបំពេញភារកិច្ចរបស់ខ្លួនប្រកបដោយស្មារតីទទួលខុសត្រូវខ្ពស់ មានក្រមសីលធម៌វិជ្ជាជីវៈ ឈានសម្រេចបាននូវភារកិច្ចដែលរដ្ឋាភិបាលបានប្រគល់ជូន ជាមួយនឹងលទ្ធផលគួរជាទីមោទនៈ។

បន្ថែមពីនេះ ឯកឧត្តមរដ្ឋមន្រ្តី ក៏បានជម្រាបជូនអង្គប្រជុំ អំពីការផ្លាស់ប្តូរឈ្មោះក្រសួងពី «ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច » ទៅជា «ក្រសួងអធិការកិច្ច» ដែលផ្តោតកាន់តែខ្លាំងលើការងារអធិការកិច្ច ការកែទម្រង់, ការពង្រឹងអភិបាលកិច្ច, ការធ្វើទំនើបកម្មស្ថាប័នរដ្ឋឱ្យក្លាយជារដ្ឋបាលសាធារណៈដែលប្រកបដោយ សមត្ថភាពខ្ពស់ ខ្លាំង វៃឆ្លាត និងស្អាតស្អំ។

ជាការឆ្លើយតប ឯកឧត្តមអគ្គអធិការ បានសម្តែងការស្វាគមន៍យ៉ាងកក់ក្តៅ និងបានថ្លែងអំណរគុណយ៉ាងជ្រាលជ្រៅជាទីបំផុត ជូនចំពោះឯកឧត្តមរដ្ឋមន្រ្តី ដែលបានចំណាយពេលវេលាដ៏មមាញឹក ដឹកនាំគណៈប្រតិភូជាន់ខ្ពស់ក្រសួងអធិការកិច្ចមកបំពេញទស្សនកិច្ចផ្លូវការនៅសាធារណរដ្ឋសង្គមនិយមវៀតណាមដោយផ្ទាល់នាពេលនេះ ៕