ហ្សេរុយសាឡឹម៖ កងកម្លាំងអ៊ីស្រាអែលកាលពីថ្ងៃសៅរ៍បានជួយសង្គ្រោះចំណាប់ខ្មាំងអ៊ីស្រាអែល ចំនួន ៤នាក់ ដែលត្រូវបានចាប់ពង្រត់ដោយក្រុមហាម៉ាសចូលទៅក្នុងតំបន់ហ្គាហ្សាស្ទ្រីបកាលពីថ្ងៃទី០៧ ខែតុលាឆ្នាំមុន ខណៈដែលជនជាតិប៉ាឡេស្ទីនយ៉ាងហោចណាស់ ៩៤នាក់ ត្រូវបានសម្លាប់នៅក្នុងការវាយប្រហារតាមអាកាសនៅក្នុងតំបន់តែមួយ។
ចំណាប់ខ្មាំងទាំង៤នាក់ដែលបានជួយសង្គ្រោះរួមមាន៖ Noa Argamani អាយុ ២៥ឆ្នាំ, Shlomi Ziv អាយុ ៤០ឆ្នាំ, Almog Meir Jan អាយុ ២១ឆ្នាំ និងAndrey Kozlov អាយុ ២៧ឆ្នាំ។
អ្នកនាំពាក្យកងកម្លាំងការពារអ៊ីស្រាអែល (IDF) លោក Daniel Hagari បានឲ្យដឹងថា អ្នកទាំង៤ មានស្ថានភាពសុខភាពត្រឹមត្រូវនៅក្នុងអគារពីរនៅចំកណ្តាលជំរុំជនភៀសខ្លួន Nuseirat នៃតំបន់ហ្គាហ្សា។
អ្នកនាំពាក្យ IDF បានបន្តថា ប្រតិបត្តិការដែលត្រូវបានគ្រោងទុកជាច្រើនសប្តាហ៍ ត្រូវបានអនុវត្តរួមគ្នាជាមួយអង្គភាពប្រឆាំងភេរវកម្មជាតិវរជនរបស់ប៉ូលីស និងទីភ្នាក់ងារសន្តិសុខអ៊ីស្រាអែល ខណៈអ្នកប្រយុទ្ធម្នាក់បានរងរបួសយ៉ាងធ្ងន់ធ្ងរអំឡុងពេលប្រតិបត្តិការ។
បន្ទាប់ពីការជួយសង្គ្រោះមនុស្ស៤នាក់ ចំណាប់ខ្មាំងជនជាតិអ៊ីស្រាអែលចំនួន ១២០នាក់នៅតែស្ថិតក្នុងតំបន់ហ្គាហ្សាស្ទ្រីប ដោយពួកគេចំនួន ៤៣នាក់ត្រូវបានអ៊ីស្រាអែលចាត់ទុកថាបានស្លាប់។ លោក Daniel Hagari បានបញ្ជាក់ថា យើងនឹងធ្វើអ្វីគ្រប់យ៉ាងដើម្បីឱ្យពួកគេត្រលប់មកវិញ។
ទន្ទឹមនឹងនេះដែរ ប្រភពវេជ្ជសាស្ត្រក្នុងតំបន់បានឲ្យដឹងថា យ៉ាងហោចណាស់ជនជាតិប៉ាឡេស្ទីន ៩៤នាក់ត្រូវបានសម្លាប់ និងរាប់សិបនាក់ផ្សេងទៀតបានរងរបួសកាលពីថ្ងៃសៅរ៍នៅក្នុងការវាយប្រហារតាមអាកាសរបស់អ៊ីស្រាអែលលើជំរុំ Nuseirat និងតំបន់មួយចំនួនទៀតនៅកណ្តាលហ្គាហ្សាស្ទ្រីប។
ប្រភពសន្តិសុខប៉ាឡេស្ទីនបានឲ្យដឹងថា ការប៉ះទង្គិចគ្នាយ៉ាងសាហាវបានផ្ទុះឡើងនៅលើដីរវាងក្រុមសកម្មប្រយុទ្ធប៉ាឡេស្ទីន និងទាហានអ៊ីស្រាអែលដែលវាយឆ្មក់ជំរុំ Nuseirat ក្រោមគម្របកាំភ្លើងធំ និងការទម្លាក់គ្រាប់បែកពីលើអាកាស។
