ក្រសួងព័ត៌មាន តែងតែយកចិត្តទុកដាក់ជានិច្ចដល់គុណតម្លៃកុមារដែលជាទំពាំងស្នងឬស្សីរបស់សង្គមជាតិ

ភ្នំពេញ៖ នាព្រឹកថ្ងៃទី១ ខែមិថុនា ឆ្នាំ ២០២៤នេះ ក្រសួងព័ត៌មាន បានរៀបចំពិធីអបអរសាទរខួបលើកទី៧៥ ទិវាកុមារអន្តរជាតិ១មិថុនា ខួបលើកទី ២៤ទិវាពិភពលោកប្រឆាំងពលកម្មកុមារ ១២មិថុនា និងទិវាកុមារកម្ពុជាឆ្នាំ២០២៤ ដោយពិធីនេះមានការអញ្ជើញចូលរួមជាអធិបតីភាពដ៏ខ្ពង់ខ្ពស់ពីសំណាក់ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងលោកជំទាវ ព្រមទាំងឯកឧត្តម លោកជំទាវ លោក លោកស្រី ជាថ្នាក់ដឹកនាំ មន្ត្រីរាជការក្រសួងព័ត៌មាន។

កម្ពុជាតែងតែប្រារព្ធទិវាកុមារអន្តរជាតិ ១មិថុនា ទិវាពិភពលោកប្រឆាំងពលកម្មកុមារ ១២ មិថុនា និងទិវាកុមារកម្ពុជា ដើម្បីរំឭកដល់ការអនុវត្តសិទ្ធិជាមូលដ្ឋាន របស់កុមារ និងបង្ហាញពីការយកចិត្តទុកដាក់របស់រាជរដ្ឋាភិបាលចំពោះកុមារ ស្របតាមរដ្ឋធម្មនុញ្ញនៃព្រះរាជាណាចក្រកម្ពុជា អនុសញ្ញាស្តីពីសិទ្ធិកុមាររបស់អង្គការសហប្រជាជាតិ អនុសញ្ញារបស់អង្គការអន្តរជាតិ ខាងការងារលេខ១៨២ ស្តីពីការហាមប្រាម និងសកម្មភាពបន្ទាន់សម្រាប់ការលុបបំបាត់ទម្រង់ធ្ងន់ធ្ងរបំផុតនៃពលកម្មកុមារ និងលិខិតបទដ្ឋានគតិយុត្តជាតិ និងលិខិតូបករណ៍អន្តរជាតិពាក់ព័ន្ធនឹងសិទ្ធិកុមារផ្សេងទៀត។

ជាមួយគ្នានេះ សម្រាប់ក្រសួងព័ត៌មានផ្ទាល់ តែងតែយកចិត្តទុកដាក់ខ្ពស់ ទៅលើគុណតម្លៃរបស់កុមារដែលជាទំពាំងស្នងឬស្សីរបស់សង្គមជាតិនាពេលអនាគត តួយ៉ាងកាលពីពេលថ្មីៗនេះ ក្រសួងព័ត៌មានក្រោមការដឹករបស់ ឯកឧត្ដម នេត្រ ភក្ត្រា ទើបតែបានបិទបញ្ចប់មហោស្រពតន្ត្រី និងចម្រៀងកុមារ លើកទី៩ ឆ្នាំ ២០២៤ យ៉ាងជោគជ័យ ។

នៅក្នុងសន្ទរកថារបស់ឯកឧត្តមរដ្ឋមន្ត្រីក្រសួងព័ត៌មាន ក្នុងឱកាសពិធីបិទមហោស្រពតន្ត្រី និងចម្រៀងកុមារ ពានរង្វាន់ក្រសួងព័ត៌មាន ឆ្នាំ២០២៤ កាលពីថ្ងៃទី ២៧ ខែឧសភា ឆ្នាំ ២០២៤ កន្លងទៅនេះ បានឱ្យដឹងថា ក្នុងនាមក្រសួងព័ត៌មាន ដែលមានប្រព័ន្ធផ្សព្វផ្សាយជាតិ និងក្រុមការងារដើម្បីកុមារ ជាសេនាធិការ នឹងខិតខំប្រឹងប្រែងបង្កើនការផលិតកម្មវិធីល្អៗ គ្រប់រូបភាព ប្រកបដោយភាពទាក់ទាញជាច្រើនទៀត ដើម្បីអប់រំកុមារឱ្យប្រព្រឹត្តអំពើល្អ និងកម្ពស់ការយល់ដឹងរបស់ប្រជាពលរដ្ឋអំពីតម្លៃរបស់កុមារ ក៏ដូចជាអំពីបញ្ហាប្រឈមនានារបស់កុមារ ផងដែរ ។

“មហោស្រពតន្ត្រី និងចម្រៀងកុមារពានរង្វាន់ ក្រសួងព័ត៌មាន ឆ្នាំ២០២៤” ទៀតសោត បង្កើតឡើងក្នុងគោលបំណងដើម្បីលើកកម្ពស់ស្មារតីកុមារតាមរយៈ នៃការបង្កើតឱ្យមាននូវកម្មវិធីកំសាន្តគ្រប់ទម្រង់ស្របតាម វ័យកុមារ ដែលជាវ័យត្រូវក្រេបជញ្ជក់នូវចំណេះវិជ្ជាប្រកបដោយការអប់រំ ផ្នែកសុជីវធម៌ គុណធម៌ សីលធម៌ ជាកូនល្អ សិស្សល្អ មិត្តល្អ និងពលរដ្ឋល្អ ។ ជាពិសេសដើម្បីអបអរសាទរ ខួបលើកទី៧៥ ទិវាកុមារអន្តរជាតិ១ មិថុនា និងខួបលើកទី២៣ ទិវាពិភពលោកប្រឆាំងពលកម្មកុមារ ១២មិថុនា និងទិវាកុមារកម្ពុជា ឆ្នាំ២០២៤៕