អភិបាលខេត្តរតនគិរី ដាក់បទបញ្ជាឲ្យរដ្ឋបាលក្រុងស្រុកទាំង៩ បន្តពង្រឹងលើកកម្ពស់ថែរក្សាសន្តិសុខសណ្តាប់ធ្នាប់ ការទប់ស្កាត់ និងបង្រ្កាបក្មេងទំនើង និងបទល្មើសនានាក្នុងភូមិសាស្រ្តខេត្ត

ភ្នំពេញ៖ ថ្លែងនៅក្នុងកិច្ចប្រជុំគណៈបញ្ជាការឯកភាពរដ្ឋបាលខេត្តរតនគិរី ដែលបានប្រារព្ធធ្វើឡើងនៅសាលប្រជុំអគារA សាលាខេត្ត នារសៀលថ្ងៃទី២៨ ខែឧសភា ឆ្នាំ២០២៤នេះ ឯកឧត្តម ញ៉ែម សំអឿន អភិបាលខេត្តរតនគិរី និងជាប្រធានគណៈបញ្ជាការឯកភាពរដ្ឋបាលខេត្ត បានដាក់បទបញ្ជាយ៉ាងមុឹងម៉ាត់ឲ្យរដ្ឋបាលក្រុងស្រុកទាំង៩ ក្នុងខេត្តរតនគិរី ត្រូវបន្តការពង្រឹងការអនុវត្តច្បាប់បទបញ្ជារបស់រាជរដ្ឋាភិបាលសំដៅលើកកម្ពស់ថែរក្សាសន្តិសុខសណ្តាប់ធ្នាប់សាធារណៈ ការទប់ស្កាត់ និងបង្រ្កាបក្មេងទំនើង និងបទល្មើសគ្រឿងញៀន បទល្មើសព្រៃឈើ សត្វព្រៃ ក្នុងភូមិសាស្ត្ររបស់ខ្លួនអោយមានប្រសិទ្ធភាព។

ក្នុងកិច្ចប្រជុំនេះដែរ ឯកឧត្ដមអភិបាលខេត្ក បានធ្វើការណែនាំដល់អាជ្ញាធរក្រុង-ស្រុក និងកងកម្លាំងមានសមត្ថកិច្ច ត្រូវបន្តអប់រំផ្សព្វផ្សាយដល់សិស្សានុសិស្សនៅតាមសាលារៀនអោយយល់ដឹងអំពីផលវិបាកនៃការប្រើប្រាស់គ្រឿងញៀន និងបញ្ហាក្មេងទំនើង។ ជាពិសេសត្រូវរៀបចំផែនការ និងកំណត់មុខសញ្ញារបស់ក្មេងទំនើង និងបទល្មើសគ្រឿងញៀន នៅតាមទីតាំងនានាដែលក្រុមទាំងនេះតែងតែធ្វើសកម្មភាព។

ឯកឧត្តមអភិបាលខេត្ត បានបញ្ជាក់ថា គណៈបញ្ជាការឯកភាពរដ្ឋបាលក្រុង-ស្រុកទាំង៩ ត្រូវយកចិត្តទុកដាក់ និងទទួលខុសត្រូវលើបញ្ហានេះ ហើយរាល់ការចុះបង្ក្រាបត្រូវធ្វើដោយគ្មានការលើកលែង ត្រូវរាយការណ៍មកថ្នាក់លើ មានកិច្ចសហការគ្នាឲ្យបានល្អជាមួយនឹងស្ថាប័នពាក់ព័ន្ធ ក្នុងករណីចាំបាច់ត្រូវស្នើសម្របសម្រួលពីព្រះរាជអាជ្ញា ៕