គ.ជ.ប នឹងមិនប្រកាសលទ្ធផលបណ្តោះអាសន្ន នៃការបែងចែកអាសនៈ ការបោះឆ្នោតជ្រើសរើសក្រុមប្រឹក្សា អាណត្តិទី៤ឡើយ

ភ្នំពេញ៖ ឯកឧត្ដម ហង្ស ពុទ្ធា អ្នកនាំពាក្យគណៈកម្មាធិការជាតិ រៀបចំការបោះឆ្នោត (គ.ជ.ប) បានថ្លែងឲ្យដឹងថា គ.ជ.ប នឹងមិនប្រកាសលទ្ធផល ជាបណ្តោះអាសន្ន នៃការបែងចែកអាសនៈនៃការបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក ខណ្ឌ អាណត្តិទី៤ឡើយ ដោយរង់ចាំប្រកាសជាផ្លូវការតែម្ដង ពោលគឺនៅថ្ងៃ៨ មិថុនា ខាងមុខនេះ ។

ឯកឧត្ដម ហង្ស ពុទ្ធា បន្ថែមថា ការប្រកាសលទ្ធផលផ្លូវការ នៃចំនួនអ្នកទៅបោះឆ្នោតក៏ធ្វើឡើងព្រមគ្នាជាមួយនឹង ការប្រកាសលទ្ធផលផ្លូវការ នៃការបែងចែកអាសនៈផងដែរ ។ ឯកឧត្ដមថា ការបែងចែកអាសនៈ គឺគ.ជ.ប បានធ្វើឡើងដោយល្អិតល្អន់ណាស់ មិនមែនចេះតែធ្វើឲ្យបាននោះទេ។

ជាមួយគ្នានោះឯកឧត្ដម ហង្ស ពុទ្ធា ក៏បានបញ្ជាក់ពីមូលហេតុ ដែលគ.ជ.ប មិនប្រកាសលទ្ធផលបណ្តោះអាសន្ន នៃការបែងចែកអាសនៈ ដោយហេតុថា “គ.ជ.ប ទាល់តែប្រកាសលទ្ធផលផ្លូវការ ហើយបានយកលទ្ធផលផ្លូវការហ្នឹង ទៅបែងចែកជាអាសនៈ និងប្រកាសសមាសភាពក្រុមប្រឹក្សា ដែលជាប់ឆ្នោតតែម្តង ព្រោះថា លទ្ធផលបណ្តោះអាសន្ន ក៏នៅតែមិនបញ្ជាក់ថា គណបក្សណាបានប៉ុន្មាន គណបក្សណាបានប៉ុន្មាននោះទេ នេះដោយសារវិធីធ្វើការងារ របស់គ.ជ.ប។ ពាក្យថា បណ្តោះអាសន្ន មានន័យថា វាអាចប្រែប្រួលទៀត ។ ចឹងបើសិនជាប្រែប្រួល ទៅយើងគណនាអាសនៈមុននាំឲ្យឃើញតែថា…បើសិនជាមានបណ្តឹងអីមកវាអាច កែប្រែខុសតួលេខ ចែកអាសនៈខុសអាហ្នឹង វាជាកំហុសរបស់គ.ជ.ប” ។

សូមបញ្ជាក់ថា ក្រោយការបោះឆ្នោត ជ្រើសរើស ក្រុមប្រឹក្សាអាណត្តិទី៤ ថ្ងៃអាទិត្យទី២៦ ឧសភា គណៈកម្មាធិការជាតិរៀបចំការបោះឆ្នោត បានប្រកាសលទ្ធផលបណ្តោះអាសន្ន អ្នកបានទៅបោះឆ្នោតសរុបមានចំនួន ១១.៥៩៨នាក់ ស្មើនឹង ៩៩,៧៩% នៃអ្នកមានឈ្មោះក្នុងបញ្ជីបោះឆ្នោត ចំនួនសរុប ១១.៦២២នាក់ ៕