ឯកឧត្តម ប៊ុន ហ៊ាន ក្រសួងធនធានទឹក ចុះពិនិត្យគម្រោងសាងសង់ទំនប់អាងទឹកពាម ក្នុងខេត្តកំពង់ធំ និងគម្រោងជួសជុលទំនប់អាងទឹកសួង៧៨ ក្នុងខេត្តសៀមរាប

ភ្នំពេញ៖ ឯកឧត្តម ប៊ុន ហ៊ាន រដ្ឋលេខាធិការ និងជាប្រធានអង្គភាពត្រួតពិនិត្យគម្រោងនៃក្រសួងធនធានទឹក និងឧតុនិយម បានដឹកនាំក្រុមការងាររបស់អង្គភាព សហការជាមួយមន្ត្រីបច្ចេកទេសនាយកដ្ឋានវិស្វកម្ម ចុះពិនិត្យគម្រោងការងារសាងសង់ទំនប់អាងទឹកពាម ក្នុងខេត្តកំពង់ធំ និងគម្រោងការងារជួសជុលទំនប់អាងទឹកសួង៧៨ ក្នុងភូមិសាស្ត្រខេត្តសៀមរាប។

សូមជម្រាបថា ទំនប់អាងទឹកពាមទទួលប្រភពទឹកពីស្ទឹងស្ទោង និងផ្ទៃរងទឹកភ្លៀងក្នុងតំបន់។ ទំនប់អាងទឹកនេះមានសារសំខាន់សម្រាប់បម្រើឱ្យប្រជាជនចំនួន១១ភូមិ នៃឃុំម្សាក្រង ស្រុកស្ទោង ខេត្តកំពង់ធំ សម្រាប់ការងារស្រោចស្រពលើផ្ទៃដីបង្កបង្កើនផលស្រូវវស្សាចំនួន ៦២៦ហិកតា ស្រូវរដូវប្រាំងចំនួន ១.៩៤៩ហិកតា និងផ្ទៃដីដំណាំរួមផ្សំមួយចំនួន ១៥ហិកតា។

ឯកឧត្តមរដ្ឋលេខាធិការបានឱ្យដឹងថា គម្រោងជួសជុលទំនប់អាងទឹកពាម ក្នុងខេត្តកំពង់ធំ រួមមាន៖ សាងសង់ទំនប់ប្រវែង ២០០០ម៉ែត្រ សាងសង់សំណង់បង្ហៀរចំនួន ១កន្លែង និងសាងសង់សំណង់ទ្វារទឹកចំនួន ១កន្លែង គិតរហូតមកដល់ពេលនេះលទ្ធផលការងារសម្រេចបាន ២៥%។

នៅក្នុងខេត្តសៀមរាប ឯកឧត្តមរដ្ឋលេខាធិការ និងក្រុមការងារបានចុះពិនិត្យវឌ្ឍនភាពគម្រោងជួសជុលទំនប់អាងទឹកសួង៧៨ ដែលរួមមាន៖ ជួសជុលទំនប់ប្រវែង ៤.២០០ម៉ែត្រ សាងសង់សំណង់លូជ្រុងចំនួន ១កន្លែង សាងសង់សំណង់ទ្វារទឹកចំនួន ៤កន្លែង និងសាងសង់សំណង់ទ្វារទឹកចំនួន ១កន្លែង។ បើគិតមកដល់ពេលនេះ វឌ្ឍនភាពការងារសម្រេចបានប្រមាណ ៥៥%។

សូមបញ្ជាក់ថា ទំនប់អាងទឹកសួង៧៨ មានសារសំខាន់សម្រាប់បម្រើឱ្យប្រជាជនចំនួន ៦ភូមិ នៃឃុំអន្លង់សំណរ ស្រុកជីក្រែង ខេត្តសៀមរាប។ អាងទឹកនេះទទួលប្រភពទឹកពីស្ទឹងជីក្រែង និងផ្ទៃរងទឹកភ្លៀងក្នុងតំបន់ មកធ្វើការស្រោចស្រពលើផ្ទៃដីបង្កបង្កើនផលស្រូវវស្សាចំនួន ១ ០៥០ហិកតា ស្រូវប្រាំងចំនួន ២៥០ហិកតា និងផ្ទៃដីដំណាំរួមផ្សំចំនួន ១០ហិកតា។

ឆ្លៀតក្នុងឱកាសនោះ ឯកឧត្តមរដ្ឋលេខាធិការបានផ្តាំផ្ញើដល់ក្រុមការងារអនុវត្តគម្រោងរបស់នាយកដ្ឋានវិស្វកម្ម ឱ្យបន្តយកចិត្តទុកដាក់លើការងារជួសជុលទំនប់ និងការសាងសង់សំណង់សិល្បការ្យថ្មីឱ្យមានគុណភាព សោភ័ណភាព និងត្រឹមត្រូវតាមលក្ខណៈបច្ចេកទេស ព្រមទាំងបានណែនាំដល់សហគមន៍កសិករប្រើប្រាស់ទឹក និងអាជ្ញាធរដែនដីចុះផ្សព្វផ្សាយការប្រើប្រាស់ទំនប់អាងទឹក និងចូលរួមថែរក្សាទំនប់ឱ្យមាននិរន្តរភាព សម្រាប់ការងារស្រោចស្រព និងការប្រើប្រាស់ប្រចាំថ្ងៃជូនប្រជាពលរដ្ឋបានយូរអង្វែង ៕