ភ្នំពេញ៖ ឯកឧត្ដម សុទ្ធគឹម កុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយមានប្រសាសន៍ប្រាប់អ្នកសារព័ត៌មានថា ក្នុងរយៈពេល១៥ថ្ងៃ ខែឧសភា ឆ្នាំ២០២៤នេះ ខ្យល់កន្ត្រាក់និងរន្ទះបាញ់បានបណ្តាលឱ្យមនុស្សស្លាប់និងរងរបួស៥០នាក់និងប៉ះពាល់ផ្ទះសម្បែងប្រជាពលរដ្ឋជាង១ពាន់ខ្នងព្រមទាំងហេរដ្ឋារចនាសម្ព័ន្ធមួយចំនួនទៀត។
ឯកឧត្ដម សុទ្ធគឹម កុលមុនី បានបន្តថា ចាប់ពីថ្ងៃទី១ដល់ថ្ងៃទី១៥ ខែឧសភា ឆ្នាំ២០២៤ខ្យល់កន្ត្រាក់បានកើតឡើងទៅលើរាជធានីខេត្តចំនួន២២ លើកលែងខេត្តកំពង់ចាម ព្រះសីហនុ និងខេត្តកណ្តាលបណ្តាលឱ្យផ្ទះរលំ និងខូចខាតធ្ងន់ធ្ងរ ១៧២ខ្នង, របើកដំបូលនិងខូចមធ្យម ១១៤៤ខ្នង របើកដំបូលសាលារៀន ១២ អគារ សាលាឃុំ សាលាឆាន់ និងការិយាល័យស្រុក៣កន្លែង ដួលរលំគ្រោងអគាររោងចក្រ២ខ្នង ឃ្លាំងស្តុកទំនិញ ១កន្លែង និងរោងចញ្ចឹមមាន់១កន្លែងខូចខាតដើមស្វាយចន្ទីរ ៧,៦ហិកតាមនុស្សស្លាប់២នាក់ និងរបួស៩នាក់។
ឯកឧត្ដម បានបន្ថែមថា ដោយឡែកគ្រោះថ្នាក់រន្ទះបាញ់បានកើតឡើងចំនួន ៤០លើក នៅតាមបណ្តាខេត្តចំនួន១៥បណ្តាលឱ្យមនុស្សស្លាប់២១ នាក់ របួស១៨នាក់ ងាប់គោរក្របី១១ក្បាល និងខូចខាតផ្ទះ១០ខ្នង៕
