សមយុទ្ធកងទ័ពជើងទឹកលើកដំបូង កម្ពុជា-ចិន ក្រោមប្រធានបទ “ប្រតិបត្តិការរំដោះចំណាប់ខ្មាំងពីក្រុមភេរវករ ចាប់ជំរិតនាវាដឹកទំនិញ” ត្រូវបានបិទបញ្ចប់នៅថ្ងៃនេះ
ភ្នំពេញ៖ សមយុទ្ធកងទ័ពជើងទឹកលើកដំបូង “នាគមាស-២០២៤” រវាងកងទ័ពកម្ពុជា-ចិន ក្រោមប្រធានបទ “ប្រតិបត្តិការរំដោះចំណាប់ខ្មាំងពីក្រុមភេរវករ ចាប់ជំរិតនាវាដឹកទំនិញ” ដែលធ្វើឡើងនៅលើផ្ទៃសមុទ្រកម្ពុជា ក្នុងខេត្តព្រះសីហនុ ត្រូវបានរៀបចំពិធីបិទនៅព្រឹកថ្ងៃទី២៧ ខែឧសភា ឆ្នាំ២០២៤នេះ។
កម្មវិធីបិទនេះធ្វើឡើងក្រោមអធិបតីភាពនាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ និងជាប្រធានគណៈកម្មការដឹកនាំធ្វើលំហាត់ និងសមយុទ្ធកងយោធពលខេមរភូមិន្ទ និងលោកឧត្តមនាវីទោ កៅ សីវឈឹង នាយរងសេនាធិការតំបន់ភូមិភាគខាងត្បូង នៃកងទ័ពរំដោះប្រជាជនចិន និងជាប្រធានក្រុមការងារដឹកនាំសមយុទ្ធភាគីចិន។
កងទ័ពជើងទឹកកម្ពុជា និងចិន បានធ្វើសមយុទ្ធរួមគ្នាដែលមានឈ្មោះថា «សមយុទ្ធកងទ័ពជើងទឹកនាគមាស-ឆ្នាំ២០២៤»នេះគឺជាលើកដំបូង គឺធ្វើឡើងដើម្បីជាការផ្លាស់ប្ដូរបទពិសោធន៍ រក្សាបានកិច្ចការប្រតិបត្តិការ បង្កើនទំនុកចិត្តជាមួយគ្នាកាន់តែរឹងមាំ និងបន្តជំរុញអភិវឌ្ឍន៍ទំនាក់ទំនងរវាងកងទ័ពជើងទឹកប្រទេសទាំងពីរឲ្យកាន់តែល្អប្រសើរបន្ថែមទៀត។
សមយុទ្ធរវាងកងទ័ពជើងទឹកកម្ពុជា និងកងទ័ពជើងទឹកចិននេះ គឺមានរយៈពេល១២ថ្ងៃ ដែលបានចាប់ផ្ដើមពីថ្ងៃទី១៦ដល់ថ្ងៃទី២៧ ខែឧសភា ឆ្នាំ២០២៤នេះ នៅលើផ្ទៃសមុទ្រកម្ពុជា ក្នុងខេត្តព្រះសីហនុ។ សមយុទ្ធនេះមានការចូលរួមពីកងទ័ពជើងទឹកកម្ពុជា-ចិនសរុប៧៨២នាក់ នាវាចំនួន១៤គ្រឿង និងឧទ្ធម្ភាគចក្រ២គ្រឿង ក្នុងប្រតិបត្តិការរំដោះចំណាប់ខ្មាំងពីក្រុមភេរវករដែលចាប់ជំរឹតនាវាដឹកទំនិញ៕
