លទ្ធផលបណ្តោះអាសន្ន គណបក្សប្រជាជន បាននាំមុខគេលើដំណើរការបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក នៅទូទាំងខេត្តកោះកុង
ភ្នំពេញ៖ លោក សេង ណេង ប្រធានលេខាធិការដ្ឋានរៀបចំការបោះឆ្នោតខេត្តកោះកុង បានអះអាងថា គណបក្សប្រជាជនកម្ពុជា បាននាំមុខគេលើដំណើរការបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក នៅថ្ងៃទី២៦ ឧសភា ២០២៤នេះ ខណៈអ្នកបោះឆ្នោត ១៦៧រូប នៅខេត្តកោះកុង បានចូលរួមបោះឆ្នោតក្រុមប្រឹក្សារួចរាល់ដោយគ្មានអវត្តមានម្នាក់ណានោះឡើយ ក្រោមបរិយាកាសល្អប្រសើរ ប្រកបដោយលទ្ធិប្រជាធិបតេយ្យ។
បើតាមលោកប្រធានលេខាធិការដ្ឋានរៀបចំការបោះឆ្នោតខេត្ត បានឲ្យដឹងថា មានការិយាល័យបោះឆ្នោតចំនួន៧ ក្រុង ស្រុក ក្នុងខេត្តកោះកុង ដោយអង្គបោះឆ្នោតទាំងអស់បានបំពេញកាតព្វកិច្ចរបស់ខ្លួន ១០០ភាគរយ ពុំមានអ្នកអវត្តមាន គិតចាប់តាំងពីម៉ោង៧ព្រឹក រហូតដល់ម៉ោងបញ្ចប់។
លោកប្រធានលេខាធិការដ្ឋានរៀបចំការបោះឆ្នោតខេត្ត បានបញ្ជាក់ថា មានគណបក្សចំនួន៣ បានចូលរួមការប្រកួតប្រជែងការបោះឆ្នោត ជ្រើសរើសក្រុមប្រឹក្សាខេត្ត ក្រុង ស្រុក អាណត្តិទី៤នេះ ជាលទ្ធផល៖
ទី១.គណបក្សប្រជាជនកម្ពុជានាំមុខគេ
ទី២.គណបក្សឆន្ទៈខ្មែរនាំមុខទីពីរ
ទី៣.គណបក្សកម្លាំងជាតិ មិនទទួលបានសន្លឹកឆ្នោត។
សូមជម្រាបថា ទិដ្ឋភាពនៃការបោះឆ្នោតជ្រើសរើសក្រុមប្រឹក្សាខេត្តក្រុងស្រុកក្នុងខេត្តកោះកុង ប្រព្រឹត្តទៅបានដោយរលូន ទាំងក្នុង និងក្រៅការិយាល័យ ក្រោមកិច្ចសហការការពាររបស់សមត្ថកិច្ចផ្នែកសន្តិសុខសណ្តាប់ធ្នាប់ ៕
