សម្តេចធិបតី៖ ការផ្តល់បណ្ណក្រីក្រត្រូវបានអនុវត្តដោយតម្លាភាព មិនមែនផ្តល់ឱ្យតែបក្ខពួកដូចការមួលបង្កាច់របស់អ្នកនយោបាយប្រឆាំងនោះទេ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា ការផ្តល់បណ្ណក្រីក្រ ត្រូវបានអនុវត្តប្រកបដោយតម្លាភាពនិងបរិយាបន្ន មិនមែនផ្តល់ឱ្យតែបក្ខពួកដូចការមួលបង្កាច់របស់អ្នកនយោបាយប្រឆាំងនោះទេ។

សម្តេចធិបតី បានថ្លែងបែបនេះ ក្នុងឱកាសដែលសម្តេចអញ្ជើញប្រកាសដាក់ឱ្យអនុវត្តជាផ្លូវការ «ផែនទីបង្ហាញផ្លូវឆ្ពោះទៅការគ្របដណ្តប់សុខភាព ជាសកលនៅកម្ពុជា ឆ្នាំ២០២៤-២០៣៥» នៅព្រឹកថ្ងៃទី២៣ ខែឧសភា ឆ្នាំ២០២៤។

សម្តេចធិបតី ហ៊ុន ម៉ាណែត បានមានប្រសាសន៍ថា មានអ្នកនយោបាយប្រឆាំងមួយចំនួន បានផ្សព្វផ្សាយវាយប្រហារមកលើគោលនយោបាយរបស់រាជរដ្ឋាភិបាលទៅលើកិច្ចគាំពារសង្គម ដោយបានចោទប្រកាន់ថា បានផ្តល់បណ្ណសមធម៌ឱ្យតែបក្ខពួករបស់ខ្លួន។ ប្រការនេះត្រូវបានសម្តេចធិបតី គូសបញ្ជាក់ថា គោលនយោបាយនេះ បានគ្របដណ្តប់ទៅលើប្រជាពលរដ្ឋគោលដៅទូទាំងប្រទេសប្រមាណ ៤,៧លាននាក់ ដោយបានអនុវត្តទៅលើកម្មវិធីជំនួយសង្គមនិងរបបសន្តិសុខសង្គមនានា។

សម្តេចធិបតី នាយករដ្ឋមន្ត្រី បានបន្តថា ក្រោយមកក៏មានអ្នកនយោបាយប្រឆាំងបានលើក យកបញ្ហានេះទៅផ្សព្វផ្សាយឱ្យប្រជាពលរដ្ឋចូលរួមជាមួយខ្លួនដើម្បីទទួលបានបណ្ណក្រីក្រទៅវិញ ក្នុងគោលបំណងកេងចំណេញនយោបាយ។

សម្តេចធិបតី ហ៊ុន ម៉ាណែត បានគូសបញ្ជាកថា គោលនយោបាយរបស់រាជរដ្ឋាភិបាល ត្រូវបានដាក់ចេញសម្រាប់ប្រជាពលរដ្ឋទូទៅដោយមិនប្រកាន់និន្នាការនយោបាយនោះឡើយ ៕