កាកបាទក្រហមកម្ពុជា បើកវគ្គផ្សព្វផ្សាយស្តីអំពី “បរិយាបន្ន និងទប់ស្កាត់ការកេងប្រវ័ញ្ចផ្លូវភេទលើកុមារតាមអនឡាញ”

ភ្នំពេញ៖ នៅព្រឹកថ្ងៃទី ១៦ ខែឧសភា ឆ្នាំ២០២៤ លោកជំទាវ ពុំ ចន្ទីនី អគ្គលេខាធិការបានអញ្ជើញ បើកវគ្គផ្សព្វផ្សាយស្តីអំពី “បរិយាបន្ន និងទប់ស្កាត់ការកេងប្រវ័ញ្ចផ្លូវភេទលើកុមារតាមអនឡាញ” ដែលប្រព្រឹត្តទៅនៅព្រឹកថ្ងៃទី១៦-១៧ ខែឧសភា ឆ្នាំ២០២៤ ដោយមានការចូលរួមសម្របសម្រួលពីឧត្តមសេនីយ៍ទោ គឹម ភាព អនុប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន នៃអគ្គស្នងការនគរបាលជាតិ និងលោក បុត្រ ភិមាន ប្រធានកម្មវិធីអង្គការ PafiD ព្រមទាំងមានការចូលរួមពីមន្ដ្រីថ្នាក់កណ្ដាល និងមន្ដ្រីក្រុមប្រតិបត្តិសាខាកាកបាទក្រហមកម្ពុជា ខេត្ត២៤ និងរាជធានីភ្នំពេញ សរុបប្រមាណ ១២០នាក់។

ក្នុងឱកាសនេះដែរ លោកជំទាវអគ្គលេខាធិការ បាននាំប្រសាស៍ផ្តាំផ្ញើសួរសុខទុក្ខរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងកោតសរសើរចំពោះថ្នាក់ដឹកនាំ មន្ត្រី អ្នកស្ម័គ្រចិត្ត យុវជនកាកបាទក្រហមកម្ពុជា សាខាទាំង២៥ ដែលបានខិតខំប្រឹងប្រែងជួយសម្រាលការលំបាករបស់បងប្អូនប្រជាជនដែលរងគ្រោះនិងងាយរងគ្រោះបំផុត។

លោកជំទាវបានបន្តថា សម្រាប់ការផ្សព្វផ្សាយនៅថ្ងៃនេះពិតជាមានសារៈសំខាន់ណាស់ សូមសាខាទាំងអស់បន្ដផ្សព្វផ្សាយ ជូនដល់យុវជន អ្នកស្ម័គ្រចិត្ត និងប្រជាពលរដ្ឋឱ្យបានទូលាយ និងយកចិត្តទុកដាក់ឱ្យបានខ្ពស់ដល់ក្រុមគ្រួសារ ពិសេសជនមានពិការភាព កុមារតូចៗ ក្មេងស្រី ស្រ្តី និងសមាជិកគ្រួសារយើង ដែលរងផលប៉ះពាល់ខ្លាំងពីការប្រើប្រាស់ទូរសព្ទ ធ្វើឱ្យកុមារធ្លាក់ខ្លួនពិការ និងត្រូវគេកេងប្រវ័ញ្ច ឬរំលោភបំពានតាមអនឡាញ។

លោកជំទាវអគ្គលេខាធិការ ក៏បានបញ្ជាក់ផងដែរថា កាកបាទក្រហមកម្ពុជា មានគោលនយោបាយការពារកុមារ ដែលតម្រូវឱ្យមន្រ្តីទាំងអស់ត្រូវចូលរួមការពារកុមារ និងផ្សព្វផ្សាយបន្ត ហើយផ្នែកពិការភាព ជាការងារអាទិភាព១ដែលកាកបាទក្រហមកម្ពុជា បានកំណត់ និងយកចិត្តទុកដាក់។ ដូចនេះ បន្ទាប់ពីបញ្ចប់វគ្គនេះ មន្រ្តីក្រុមប្រតិបត្តិសាខានឹងផ្សព្វផ្សាយបន្តជូនដល់យុវជន ស្ម័គ្រចិត្តកាកបាទក្រហមកម្ពុជា និងលើកផែនការផ្សព្វផ្សាយបន្តដូចភ្លៀងរលឹម៕