ឯកឧត្ដមទេសរដ្ឋមន្ត្រី សក់ សេដ្ឋា លើកឡើងពីតួនាទី និងសារៈសំខាន់នៃ ការចាត់តាំងក្រុមការងារចុះមូលដ្ឋាន

ភ្នំពេញ៖ ឯកឧត្ដមទេសរដ្ឋមន្ត្រី សក់ សេដ្ឋា ប្រធានក្រុមការងាររាជរដ្ឋាភិបាល ចុះមូលដ្ឋានស្រុកបវេល បានលើកឡើងពីតួនាទី និងសារៈសំខាន់នៃ ការចាត់តាំងក្រុមការងារចុះមូលដ្ឋាន ក្នុងពិធីប្រកាសសមាសភាពក្រុមការងារ រាជរដ្ឋាភិបាលចុះមូលដ្ឋានស្រុកបរវេល ខេត្តបាត់ដំបង នៅសាលាស្រុកបវេល នាព្រឹកថ្ងៃទី១៦ ខែឧសភា ឆ្នាំ២០២៤ ។

តួនាទីនិងសារៈសំខាន់ នៃការចាត់តាំងក្រុមការងារចុះមូលដ្ឋាន រួមមានដូចខាងក្រោម៖
– ចាប់តាំងពីប្រទេសជាតិត្រូវបានរំដោះចេញពីរបបប្រល័យពូជសាសន៍ ប៉ុល ពត រាជរដ្ឋាភិបាលបានបង្កើតឱ្យមានក្រុមការងារចុះមូលដ្ឋានជាបន្តបន្ទាប់ ពីមួយអាណត្តិទៅមួយអាណត្តិ ដើម្បីចុះជួយគាំទ្រនិងពង្រឹងការអភិវឌ្ឍនមូលដ្ឋាន ក្នុងការបម្រើសំណូមពរ សេចក្តីត្រូវការរបស់ ប្រជាពលរដ្ឋ និងការចូលរួមដោះស្រាយបញ្ហាប្រឈមនានានៅមូលដ្ឋាន។

– ការចាត់បញ្ជូនមន្ត្រីពីថ្នាក់ជាតិ ថ្នាក់ខេត្ត បង្កើតឡើងនូវក្រុមការងារចុះមូលដ្ឋាន គឺជា របៀបរបបបំពេញការងារនិងការធ្វើគណនេយ្យភាពដោយផ្ទាល់របស់រាជរដ្ឋាភិបាលមកពីគណបក្ស ប្រជាជនកម្ពុជាចំពោះប្រជាពលរដ្ឋ ដើម្បីផ្សារភ្ជាប់ រួមសុខរួមទុកជាមួយប្រជាពលរដ្ឋ គ្រប់កាលៈ ទេសៈ។

– ម្យ៉ាងទៀត ការចុះបំពេញការងារតាមមូលដ្ឋាន ក៏ជាឱកាសដែលមន្ត្រីរាជការគ្រប់ លំដាប់ថ្នាក់ហ្វឹកហ្វឺនរបៀបរបបបំពេញការងារដោយផ្ទាល់ជាមួយប្រជាពលរដ្ឋ ជាមួយមន្ត្រីអាជ្ញា ធរមូលដ្ឋានដើម្បីបម្រើសំណូមពរ សេចក្តីត្រូការរបស់ប្រជាពលរដ្ឋដែលធ្វើឱ្យមន្ត្រីរបស់យើងគ្រប់ ថ្នាក់បានហាត់ពត់លត់ដំខ្លួនជាមួយជីវភាពរស់នៅរបស់ប្រជាពលរដ្ឋ។

– ទន្ទឹមនេះ ការចុះបំពេញការងារដោយផ្ទាល់នៅតាមមូលដ្ឋានរបស់ថ្នាក់ដឹកនាំ និងមន្ត្រី នៅថ្នាក់ជាតិ គឺជាឱកាសដែលថ្នាក់ដឹកនាំ និងមន្ត្រីតាមក្រសួង ស្ថាប័ននានា បានស្រាវជ្រាវវាយ តម្លៃដោយផ្ទាល់នៅមូលដ្ឋានអំពីប្រសិទ្ធភាព និងបញ្ហាប្រឈមក្នុងការអនុវត្តគោលនយោបាយ ច្បាប់ និងលិខិតបទដ្ឋានគតិយុត្ត និងវិធានការណ៍នានាដែលបានដាក់ចេញដើម្បីកែលម្អជំរុញការ អនុវត្តឱ្យកាន់តែមានប្រសិទ្ធភាព និងកាន់តែឆ្លើយតបថែមទៀត ៕