អ្នកការទូតកំពូលរបស់កូរ៉េខាងត្បូង គ្រោងនឹងធ្វើដំណើរទស្សនកិច្ចនៅប្រទេសចិននៅសប្តាហ៍ក្រោយ

ប៉េកាំង៖ ប្រទេសទាំងពីរបានឲ្យដឹងនៅថ្ងៃនេះថា អ្នកការទូតកំពូលរបស់កូរ៉េខាងត្បូង គ្រោងនឹងធ្វើដំណើរទស្សនកិច្ចនៅប្រទេសចិននៅដើមសប្តាហ៍ក្រោយនេះ មុនពេលកិច្ចប្រជុំកំពូលត្រីភាគីដែលរំពឹងទុកដែលប្រទេសជប៉ុនក៏គ្រោងនឹងចូលរួមផងដែរ។

ក្រសួងការបរទេសចិនបានឲ្យដឹងនៅក្នុងសេចក្តីថ្លែងការណ៍មួយថា រដ្ឋមន្ត្រីការបរទេសលោក Cho Tae-yul នឹងធ្វើដំណើរទស្សនកិច្ចនៅទីក្រុងប៉េកាំងនៅថ្ងៃចន្ទ និងថ្ងៃអង្គារ។

សូមបញ្ជាក់ថា នេះគឺជាដំណើរទស្សនកិច្ចលើកដំបូងរបស់រដ្ឋមន្ត្រីការបរទេសកូរ៉េខាងត្បូងទៅកាន់ទីក្រុងប៉េកាំងក្នុងរយៈពេលជាងប្រាំមួយឆ្នាំ។

ទីភ្នាក់ងារព័ត៌មាន Yonhap របស់ទីក្រុងសេអ៊ូល ដែលបានដកស្រង់សម្តីពីក្រសួងការបរទេសបានឲ្យដឹងថា លោក Cho Tae-yul នឹងជួបសមភាគីចិន លោក Wang Yi ផងដែរ។

ដំណើរទស្សនកិច្ចនេះធ្វើឡើងមុនជំនួបកំពូលដែលគេរំពឹងទុករវាងប្រទេសទាំងបីដែលទីភ្នាក់ងារព័ត៌មាន Yonhap បានរាយការណ៍ថាត្រូវបានគេរំពឹងទុកនៅចុងខែនេះ។

ទីភ្នាក់ងារនេះបានដកស្រង់សម្តីរបស់ក្រសួងថា លោក Cho Tae-yul និងលោក Wang Yi នឹងពិភាក្សាអំពី បញ្ហាផលប្រយោជន៍រួម ពីទំនាក់ទំនងទ្វេភាគី កិច្ចប្រជុំកំពូលត្រីភាគី និងឧបទ្វីបកូរ៉េ រហូតដល់បញ្ហាក្នុងតំបន់ និងពិភពលោក។

ទីក្រុងប៉េកាំងគឺជាដៃគូពាណិជ្ជកម្មដ៏ធំបំផុតរបស់ទីក្រុងសេអ៊ូល ប៉ុន្តែក៏ជាសម្ព័ន្ធមិត្តដ៏សំខាន់ និងជាអ្នកផ្តល់ផលប្រយោជន៍សេដ្ឋកិច្ចរបស់ប្រទេសកូរ៉េខាងជើងផងដែរ។